Зи чэзу къалэнхэр щызэпкърах

25 июля, 2026 - 08:00

Террорым пэщIэтынымкIэ комиссэм и зэIущIэ Дзэлы­къуэ щIыналъэм щригъэ­кIуэкIащ КъБР-м и Iэтащхьэ КIуэкIуэ Казбек. Абы щы­хэп­лъэжащ илъэсым и пэщIэ­дзэм щегъэжьауэ зэфIагъэкIа лэжьыгъэм кърикIуахэм.

Дзэлыкъуэ, Бахъсэн, Май щIыналъэхэм, Бахъсэн къалэ округым а унэтIыныгъэмкIэ щрагъэкIуэкIа Iуэхухэм ятеу­хуауэ къэпсэлъащ зыхуэфащэ IэнатIэхэм я унафэщIхэр.
Террорым пэщIэтынымкIэ муниципальнэ комиссэхэм я къалэн нэхъыщхьэхэм ящыщу къонэж профилактикэ лэжьыгъэр щIэгъэхуэбжьэныр. 
КъимыдэкIэ, зэхуэсым и ­гугъу щащIащ УФ-м Террориз­мэм щыпэщIэтыным теухуа и план зэгъэуIуам, 2024 – 2028 гъэхэм ятещIыхьам, абы щIэ­ныгъэ егъэгъуэтын IэнатIэри хэту, щыубзыхуахэр гъэзэщIэн и лъэныкъуэкIэ мы гъэм и япэ илъэс ныкъуэм зрагъэхъулIахэм.
Зытепсэлъыхьа Iуэхухэм ятеухуа унафэхэр къащтащ. Ахэр хуэгъэзащ IэнатIэхэр зэрызэ­дэлажьэ щIыкIэр, профилактикэ лэжьыгъэхэр щIэгъэхуэбжьэ­ным.
А махуэ дыдэм КIуэкIуэ Казбек Дзэлыкъуэкъуажэ щаIущIащ щIыналъэхэмрэ къалэ округхэмрэ я Iэтащхьэхэм.
«Муниципальнэ сыхьэт» зэ­хуэсым щызэпкърахащ зи чэзу Iуэхухэр.
Къалэн нэхъыщхьэхэм ящыщу адэкIи къапэщытщ кIэрыхубжьэрыху быдэхэр щызэблэу къэ­мыхъуу зэщIэкъуэныр. Абы­кIэ щIыпIэхэм жэуап щызыхьхэм а лэжьыгъэр зэтраухуэн, ахэр щIыналъэ операторым быдэу пыщIауэ щытын хуейщ. «Эко­техпром»-м папщIэ республикэм къищэху техникэ хэхахэр, пхъэнкIийхэр дэшыным хуэщIахэр, республикэм и щIыналъэ псоми къыщагъэсэбэп.

Апхуэдэуи, гулъытэншэу къагъэнакъым лъэпкъ проектхэр ­гъэ­зэщIа зэрыхъу щIыкIэри. Муниципалитетхэм абыхэм хы­хьэу щагъэзащIэ лэжьыгъэхэм ящыщщ еджапIэхэр, щэнхабзэм, узыншагъэр хъумэным епха ухуэныгъэхэр къызыхуэтыншэу зэгъэпэщыжыныр, зи школ кIуэгъуэ мыхъуа сабийхэм щадэлэ-  жьэну IуэхущIапIэхэр ящIыныр, гъуэгухэр мардэм къитIасэу зы­хуей хуэгъэзэныр, псыкIэ къызэгъэпэщын IэнатIэр къэгъэ­щIэрэщIэжыныр.
Республикэм и Iэтащхьэм къызэхуэсахэм пщэрылъ ящищIащ ирагъэкIуэкI дэтхэнэ лэжьыгъэми я фIагъымрэ ахэр ягъэува ­пIалъэм зэфIэгъэкIынымрэ я нэIэ трагъэтыну.
Сыт щыгъуи хуэдэу, щхьэхуэу зыкIэлъыплъынухэм ящыщщ жылэхэм я къабзагъэм ехьэлIа Iуэхухэр.

 

  • 10 просмотров
Поделиться: