Гъэ еджэгъуэщIэм щIидзэным къэнэжар мазэ закъуэщ. Мы гъэм къэпщытэныгъэхэр зэратар къэзыгъэлъагъуэ бжыгъэхэр иджыблагъэ къигъэнэIуащ УФ-м егъэджэныгъэмкIэ и министр Кравцов Сергей.
ЕГЭ-р зытахэм ящыщу еджакIуэ мин 330-м балл 70-м щIигъу къахьащ, министрым зэрыжиIэмкIэ. Илъэс къэс «ику ит балл» жыхуаIэр нагъыщитI нэхърэ мынэхъ мащIэкIэ хохъуэ. Щапхъэм и хьэтыркIэ, есэпымкIэ (математикэмкIэ) ику иту еджакIуэхэм къахь баллыр 4,3-кIэ дэкIуеящ, илъэситхум къриубыдэу къагъэлъэгъуахэм балли 9,5-рэ къыхэхъуащ. ФизикэмкIэ балли 4,7-кIэ нэхъыбэ къахьу хъуащ, илъэситхум къриубыдэу а нагъыщэр балл 12,6-кIэ хэхъуащ. БиологиемкIэ илъэсым и къэпщытэныгъэм балли 3,5-рэ къыхэхъуащ, илъэситхум къриубыдэу – 7,8-кIэ нэхъыбэ хъуащ.
ЕГЭ-р зэрырагъэкIуэкI илъэс 25-м къриубыдэу, мы гъэм япэ дыдэ Мэзкуу щыщ школакIуэ Малковэ Екатеринэ балл 500 къихьащ.
ЦIыхуи 8-м балл 400-м нэс къахьащ. ЩIыналъэ 23-м щыщ еджакIуэхэм балл 300-м нэс къахьащ, апхуэдэхэр цIыху 76-рэ мэхъу. ЩIыналъэ 77-м щыщ еджакIуэ 933-м балл 200 къахьащ.
Географиемрэ биологиемкIэ ирагъэкIуэкIа олимпиадэхэм еджакIуэхэм медаль 12 къыщахьащ, абыхэм ящыщу I0-р – дыщэщ. «Зэчийрэ ехъулIэныгъэрэ» фондым министерствэм и гъусэу, олимпиадэхэм щытекIуэ сабийхэм гулъытэ яхуещI. Апхуэдэ еджакIуэхэм ящыщу процент 98-р Урысейм и еджапIэ нэхъыщхьэхэм щIотIысхьэ.
Илъэс блэкIам елъытауэ, колледжхэм щIэтIысхьэну хуитхэм я бжыгъэм мин 30-кIэ хагъэхъуащ, псори зэхэту тIысыпIэ мин 880-рэ хухахащ абыхэм щеджэну зи мурадхэм. IэщIагъэ къыхуагъэлъагъуэхэм я процент 56-р техникэм епхащ. Курыт щIэныгъэ щрат еджапIэхэм щIэтIысхьэну зи мурадхэр зы цIыхум и пIэм тIу щит зэныкъуэкъум пхыкIын хуей хъунущ.
«Профессионалитет»-м щIэтIысхьэнымкIэ зэхьэзэхуэм зы цIыхум и пIэм 4-5 итщ. ЩIалэгъуалэм нэхъыбэу программированиер, машинэ зэпкърылъхьэныр, медицинэр, ухуэныгъэр IэщIагъэу къыхах. А псом и фIыгъэкIэ, иужьрей илъэси 5-м къриубыдэу, еджапIэ нэужьым лэжьапIэ зыгъуэтхэм я бжыгъэр процент 58-м икIри 80-м нэсащ.
Къэбэрдей-Балъкъэрыр къапщтэмэ, балли 100 къэзыхьахэм я бжыгъэр 26-рэ мэхъу, ар илъэс блэкIам къагъэлъэгъуам елъытауэ, 11-кIэ нэхъыбэщ.
Урыс литературэр – 9-м, урысыбзэр – 6-м балли 100-кIэ ятащ. Адрейхэр физикэмкIэ, химиемкIэ, информатикэмкIэ къахьащ.
