Къэралым жыджэру зыхуегъэхьэзыр фокIадэм екIуэкIыну Хэхыныгъэхэм. Дэтхэнэ зы партми жылагъуэр къегъэгугъэ псэукIэр зылъахъэ лъэпощхьэпохэр IуигъэкIуэтыну, цIыхубэр зыщыгугъ лъэныкъуэхэр игъэзэкIуэну. «Урысей зэкъуэтым» дзыхь хуэзыщIхэр щогугъ а партым къызэригъэпэжынум.
«Урысей зэкъуэт» партым и лъэпкъ программэр лэжьыгъэшхуэ зытекIуэда дэфтэрщ. УФ-м и Президентым къэралым къыпэщылъ къалэну къилъытэхэмрэ абы къыхихыпхъэ унэтIыныгъэу игъэувхэмрэ тохуэ партым и Программэр лъабжьэ зыхуэхъуа дэфтэрыр.
Ар зэхагъэуващ цIыхухэм зыхуагъазэурэ, абы къыхэкIыу, жылагъуэр зыщIэупщIэ жэуапхэр къыщыгъэлъэгъуащ. Партым и тегъэщIапIэ нэхъыщхьэхэщ: нэфI-ней земыхьэныр, зэманым декIуныр, пэжыгъэм тетыныр, абы къикIращи, Партыр шэсыпIэ йоувэ зыхуигъэувыжа къалэнхэр зэригъэзэщIэнумкIэ.
Программэм и зэхэлъыкIэр Iыхьиблу зэхэтщ: демографиер, щIыналъэхэм я зыужьыныгъэр, экономикэр, технологиещIэхэр, Урысейм щэнхабзэрэ псэкупсэ лъапIэныгъэ и лъэныкъуэкIэ хэлъ щытыкIэ къызэрымыкIуэр хъумэныр, къэралым и шынагъуэншагъыр.
Партыр дяпэкIи елIэлIэнущ унагъуэмрэ щIэблэм и бжыгъэр хэгъэхъуэнымрэ.
ЗылъэIэсыпхъэ къалэнхэм язщ МРОТ-м хэгъэхъуэнымрэ дзэ Iуэху хэхам къикIыжа ветеранхэр мамыр гъащIэм хэгъэзэгъэжынымрэ. Лэжьыгъэм къыпыкI фейдэр нэхъыбэ щIыным, технологие лъагэхэр къыщагъэщхьэпэ IэнатIэхэм папщIэ IэщIагъэлIхэр гъэхьэзырыным гулъытэ хэха хуащIынущ.
Программэр хуэунэтIащ щIыналъэхэм я зыужьыныгъэр зэхуэмыдэу зэрыщытыр гъэзэкIуэным – цIыхубэр зыщIэупщIэ Iуэхугъуэхэм мы Iуэхур щыпэрытщ.
Япэ ирагъэщынухэм хохьэ экономикэм, мэкъумэшым, промышленностым я зыужьыныгъэр. Гъавэ къыщIахымрэ абы хуагъэув уасэхэмрэ зэхуэгъэкIуэным Iыхьэ щхьэхуэ щеубыд Программэм. КъинэмыщIауэ, хьэрычэтыщIэхэм защIэгъэкъуэным, къэралыбэ сатум зегъэужьыным, логистикэр егъэфIэкIуэным, щIэныгъэмрэ технологиехэмрэ я лъэныкъуэкIэ къэралыр пэрыт щIыжыным, авиацэм, энергетикэм, Iэмэпсымэ къыщIэгъэкIыным зегъэужьыным яхуэунэтIа къалэнхэр зыхуагъэувыж.
Программэм япэу хагъэуващ IуэхущIапIэхэм роботхэр къызэрыщагъэщхьэпэным, лэжьыгъэм и Iыхьэр автоматизацэм хуэгъэкIуэным, къэухь IэрыщIыр къэгъэщхьэпэным, щхьэхуэу лажьэ транспорт системэхэм зегъэубгъуным теухуа Iыхьэ.
Тхыдэр ящымыгъэгъупщэжыным, Хэкум и щэнхабзэм и хъугъуэфIыгъуэхэм лъэIэсу щытыным гулъытэ щхьэхуэ хуещI Программэм. Партым щIалэгъуалэм зиужьыну икIи щIэныгъэ зригъэгъуэтыну Iэмал езыт Iэмалхэмхэр къызэригъэпэщкIэрэ лъэIэсыну и мурадщ а плъапIэм. Къалэн щхьэхуэщ Иджырей ЛIыхъужьым и образыр зэфIэгъэувэныр: дзэ Iуэху хэхам хэтхэр, щэнхабзэм, щIэныгъэм, егъэджэныгъэм къыхэщ цIыху щэджащэхэр, ветеранхэр, Лэжьыгъэм и ЛIыхъужьхэр псоми егъэцIыхуныр.
Ебланэ къалэн пэрыту Партым зыхуегъэувыж «Ди ТекIуэныгъэр» , ар Iыхьищу зэхэтщ: къэралым и дзэ-промышленнэ комплексым зегъэужьынымрэ Iэщэхэм епха Iуэхугъуэхэмрэ, Урыс мамырыгъэ унэтIыныгъэм зегъэужьын икIи щIэгъэбыдэн, къэрал псоми я лъэпкъ гукъыдэжыр зи лъабжьэ, зым адрейм пщIэ щыхищI, лъабжьэ быдэ зиIэ, захуагъэм тет дуней ухуэным хущIэкъун.
