КъБР-м и Iэтащхьэ КIуэкIуэ Казбек мэлыжьыхьым и 30-м яIущIащ республикэм и хьэрычэтыщIэхэм. ЗэIущIэм щытепсэлъыхьащ Къэбэрдей-Балъкъэрым инвестицэ Iуэхухэр зэрыщрагъэфIэкIуэну Iэмалхэм.
КъБР-м и Iэтащхьэм къыхигъэщащ щIыналъэм и экономикэм зезыгъэужь IэнатIэхэм нэхъыщхьэ дыдэу республикэм и мэкъумэшыр, ухуэныгъэр, туризмэр зэращыщыр.
- Мэкъумэш IэнатIэ и лъэныкъуэкIэ республикэм лэжьыгъэхэр хъарзынэу щызэтеублащ, зи гугъу тщIыр илъэс куэдкIэ къызыпыкIэ жыгыщIэхэр хэсэнрами, гъавэ, хадэхэкI гъэкIынрами. ДяпэкIи а унэтIыныгъэхэм ягъуэт къэрал дэIэпыкъуныгъэхэр зэредгъэфIэкIуэнум и ужь дитынущ, - жиIащ КIуэкIуэ Казбек. - Туризмэм и гугъу пщIымэ, лъэпкъ проект зэхуэмыдэхэр къэралым щагъэзащIэ. Псалъэм папщIэ, нобэ УФ-м и Правительствэм и УнафэщIым и къуэдзэ Трутнев Юрий иригъэкIуэкIа зэIущIэм къыщигъэлъэгъуащ дэIэпыкъуныгъэ щыIэнухэм зэрахэтыр хьэщIэщхэр яухуэн папщIэ къащтэ кредитхэм щхьэкIэ субсидие зэрыхухахыну щIыкIэр. Ди дежкIэ абы мыхьэнэшхуэ иIэщ, сыту жыпIэмэ ди санаторнэ-курорт зыгъэпсэхупIэхэр едгъэфIэкIуэныр а Iуэхум хеубыдэ. Уеблэмэ а унэтIыныгъэм нэхъ жыджэру делэжьын хуейуэ къызолъытэ. КъБР-м и Правительствэм зэхигъэува планым тету, илъэсым и кIуэцIкIэ республикэм зыщызыгъэпсэхухэм я бжыгъэр мелуаным нэс хъун хуейщ. КъищынэмыщIауэ, мы зэманым къэралыр йолэжь псэупIэхэр зыухуэхэм зэрызыщIагъакъуэ Iэмалхэми. Абы къыхэкIыу инвестицэ Iуэхухэм фытезгъэгушхуэну сыхуейт.
ЗэIущIэм хэта хьэрычэтыщIэхэм жаIащ къыхалъхьэ инвестицэ Iуэхухэр и кIэм нэс ягъэзэщIэху, щIыналъэ унафэщIхэм я нэIэ тетын хуейуэ къызэралъытэр.
ЗэIущIэм и етIуанэ Iыхьэм КIуэкIуэ Казбек хьэрычэтыщIэхэм фIыщIэ яхуищIащ псапащIэ Iуэхухэм тещIыхьауэ 2020 гъэм и мэлыжьыхьым къызэрагъэпэща фондым я сом зэрыхалъхьам, коронавирусыр щекIуэкI зэманым республикэм щыпсэухэм дэIэпыкъуныгъэ зэрыратам папщIэ.
- Къалэну зыхуэвгъэувыжри, дэтхэнэри фыхущIэкъуащ ди цIыхухэм защIэвгъэкъуэну. Абы щыгъуэми фи цIэ, фи унэцIэ къэвгъэлъэгъуакъым, фи гум, фи псэм къыбгъэдэкIыу фызэкъуэуващ. ИкъукIэ мыхьэнэшхуэ зиIэщ ар, щытыкIэ гугъу гуэр урихьэлIа нэужь. Лъэпкъ, дин зэхэгъэж хэмыту, дэIэпыкъуныгъэ хуэныкъуэм зыщIэвгъэкъуащ. Си фIэщ мэхъу, адэкIи апхуэдэ лэжьыгъэфIхэр зэгъусэу едгъэкIуэкIыну, ди цIыхухэр я гур мамыру зэрыпсэуным дыхущIэкъуну», - жиIащ КъБР-м и Iэтащхьэм.
ПсапащIэ фондым и кIэлъыплъакIуэ советым и секретарь Ахъуэбэч Анзор зэIущIэм къыщызэщIикъуэжащ ирагъэкIуэкIа лэжьыгъэр. Абы зэрыжиIамкIэ, коронавирусым зыщиубгъу зэманым Къэбэрдей-Балъкъэрым и цIыхухэм зыщIагъэкъуэн мурадкIэ фондым сом мелуан 47-рэ хьэрычэтыщIэхэм зэрыщызэхуахьэсар. Ахъшэр хуаутIыпщащ сымаджэщхэм щылажьэ медицинэ IэщIагъэлIхэм я улахуэм яхущIыгъуным, зэрызахъумэж Iэмэпсымэхэр къэщэхуным. ЩытыкIэ гугъу ихуа унагъуэхэми фондым къыхэкI ахъшэкIэ зыщIагъэкъуащ: апхуэдэ унагъуэ хуэмыщIа мини 8-м ерыскъыхэкIхэр къыхуащэхуащ.
