Оркестрым и концерт

Къэрал киноконцерт гъэлъэгъуапIэм щекIуэкIащ КъБР-м и къэрал филармонием и оркестрым (художественнэ унафэщIыр УФ-м щIыхь зиIэ и артист Темыркъан Пётрщ) и концерт. 
Пшыхьым щагъэзэщIащ зи макъамэхэм дуней псом щIэупщIэшхуэ щызиIэ нэмыцэ композитор цIэрыIуэ Бетховен Ван Людвиг и симфоние №1-р, «Эгмонт», «Кориолан» увертюрэхэр, фортепианэмрэ оркестрымрэ папщIэ концерт №3-р, нэгъуэщIхэри. Лэжьыгъэхэр гукъинэжу зыгъэзэщIар Сочэ щыщ пианист, Краснодар крайм щIыхь зиIэ и артист, международнэ зэпеуэхэм я лауреат Громов Денисщ. 
Классикэ макъамэм хуэзэшауэ концертым екIуэлIахэм хьэуа Iубыгъуэ яхуэхъуа пшыхьыр щIэщыгъуэт. Псом хуэмыдэу куэдым ягу дыхьащ «Кориолан», «Эгмонт» увертюрэхэр.
Громов Денис теухуауэ: урыс музыкант цIэрыIуэр 1974 гъэм Сочэ къалэм къыщалъхуащ. Шмелёв Иван и цIэр зезыхьэ Сабий музыкэ школымрэ Сочэ къалэм ГъуазджэхэмкIэ и училищэмрэ къиухащ. И щIэныгъэм щыпищащ Москва, Чайковский Пётр и цIэр зезыхьэ къэрал консерваторэм. 1992-2000 гъэхэм пианистыр Сочэ къалэм и филармонием и пианист пажэу щытащ. Ар щытекIуащ международнэ зэпеуэ куэдым (Италие, Польшэ, н.). Музыкантым зыкъыщегъэлъагъуэ Москва къэрал консерваторэм, Санкт-Петербург и филармонием, Глинкэ и цIэр зезыхьэ музыкэ щэнхабзэмкIэ музейм, Прокофьев, Гольденвейзер я музейхэм я залхэм, нэгъуэщIхэми. Мы зэманым ар Москва Iэпхъуами, щалъхуа щIыналъэр Денис зыщигъэгъупщэркъым, щIэх-щIэхыурэ къэкIуэжурэ концертхэр щет.