«Нарспи» чуваш лъэпкъ щэнхабзэ центрым сабийхэм зэхыхьэ щIэщыгъуэ къахузэригъэпэщащ, Анэдэлъхубзэхэм я махуэм и щIыхькIэ.
Зэхыхьэр траухуат чуваш цIыхубэ хъыбарыжьхэмрэ псалъэжьхэмрэ. Пшыхь гуапэр иригъэкIуэкIащ творчествэмкIэ «ДыгъафIэ къалэ» сабий академием и «Альтернатива» гупым и унафэщI Жамбэч Маритэ.
- Илъэс зыбжанэ хъуауэ ди ныбжьэгъущ Жамбэч Маритэрэ и гъэсэнхэмрэ икIи зэхыхьэ щIэщыгъуэхэр, щхьэпэхэр зэгъусэу къызыдогъэпэщ, - жиIащ «Нарспи» центрым и унафэщI Черновэ Алёнэ.
Чуваш лъэпкъ фэилъхьэгъуэхэр зыщыгъ ныбжьыщIэхэр усэ къеджащ, хъыбарыжьхэр жаIэжащ. Чувашым и цIыхубэ усакIуэ Тургай Валерэ и жэрдэмкIэ, 2021 гъэм Къэбэрдей-Балъкъэрым къыщызэIуахащ чувашхэм я лъэпкъ щэнхабзэ центр. Иужьрей къыхэтхыкIым тепщIыхьмэ, Кэбэрдей-Балъкъэрым чуваш 70-м нэблагъэ щопсэу. Ахэращ «Нарспи» центрым и лэжьыгъэр зыхуэгъэзар.
Чуваш лъэпкъ центрым Урысеймрэ нэгъуэщI щIыналъэхэмрэ щыпсэу чувашхэр зэкъуегъэувэ. Урысейм чуваш лъэпкъ щэнхабзэ зэгухьэныгъэу 100-м нэблагъэ щыIэщ. Беларуссыр, Къэзахъстаныр, Эстониер зи хэщIапIэ чувашхэм абыхэми щаIэщ зэгухьэныгъэхэр. Абыхэм я къалэн нэхъыщхьэр чуваш щэнхабзэр, хабзэр, тхыбзэр яхъумэнырщ. Урысейм щыпсэу лъэпкъхэм я бжыгъэкIэ етхуанэ увыпIэр зыIыгъ чувашхэм я дежкIэ абы мыхьэнэуэ иIэм лейуэ утемыпсэлъыхьми хъунущ.
НэхъапэIуэкIэ Чувашымрэ Къэбэрдей-Балъкъэрымрэ ныбжьэгъугъэр зэрагъэбыдэнум, зэрызэдэлэжьэнум Iэ традзащ. Абы и щIыхькIэ Чебоксары къалэм къыщызэрагъэпэщащ «Чувашымрэ Къэбэрдей-Балъкъэрымрэ я зэныбжьэгъугъэ» зэгухьэныгъэр, лъэпкъхэм зэгъусэу къызэрагъэпэщ зэхыхьэ щхьэпэхэр. Ар я жэрдэмщ Чувашым и цIыхубэ усакIуэ Тургай Валерийрэ КъБР-м и цIыхубэ усакIуэ Беппаев МутIэлипрэ.
