IэщэщI Тумэ Аслъэн сурэтыщIхэм, дизайнерхэм, дыщэкIхэм, гъукIэхэм папщIэ екIуэкIа «Уникальные мастера России» урысейпсо зэпеуэм лауреат щыхъуащ. КъБР-м щыщ IэпщIэлъапщIэр гъущIым художественнэу елэжьынымкIэ Iыхьэм япэ увыпIэр къыщихьащ.
Зэпеуэр «Уникальная Россия» - IV художественно-промышленнэ гъэлъэгъуэныгъэм хэту екIуэкIащ. Абы хиубыдащ сурэт щIыныр, скульптурэр, гъущIым, пхъэм, фэм елэжьыныр, фэилъхьэгъуэ дахэ къэгупсысыныр, мывэр къибзыкIыныр, Iэщэ-фащэ щIыныр, нэгъуэщI куэди. Псори зэхэту лIэужьыгъуэ 40 хъурт.
Тумэм и лэжьыгъэхэр художественнэу гъэщIэрэщIащ, лъэпкъ гупсысэ къахощ, я фIэщыгъэхэми гурыIуэгъуэ зэращIщи, дэтхэнэми хъыбар щхьэхуэ иIэщ. Абы Москва щигъэлъэгъуащ «Млечный путь», «Шабаз», «Пламя солнца» зыфIища сэхэр, нарт хъыбархэм къатрищIыкIа «Тхъуэжьей» сэр, «Джокер» щIопщыр.
IэщэщIыр йолэжь гъущIым, къупщхьэм, фэм, пхъэм, дыжьыным, жэзым. Сосрыкъуэ и шым и цIэр зыфIища «Тхъуэжьей» сэм щелэжьым къыщигъэсэбэпащ гъущI, фэ, къупщхьэ, ды-жьын, уеблэмэ шы соку. Зы Iэщэм елэжьыным зэману текIуэдэнкIэ хъунущ мази, илъэс ныкъуи. Нэхъыбэу мыхьэнэ ярет лъэпкъым къыдэгъуэгурыкIуа Iэщэхэм. Адыгэ сэшхуэм пищI щыIэкъым.
Тумэр Урысейм и СурэтыщIхэм я зэгухьэныгъэм, Урысейм и IэщэщIхэм я гильдием хэтщ. Гильдием ухыхьа нэужь Iэмал уиIэ мэхъу къэрал Тхыдэ музейм, Эрмитажым, Гохраным уи IэдакъэщIэкIхэр щыбгъэлъэгъуэну.
ЗэрыцIыкIурэ гъуазджэм дехьэх IэщэщIыр. Пасэу художественнэ школым кIуэн щIидзащ. Курыт еджапIэ нэужьым Къэбэрдей-Балъкъэр къэрал университетым декоративно-прикладной гъуазджэм щыхуеджащ. Университетыр къиухри, ар Урысейм и СурэтыщIхэм я зэгухьэныгъэм хэт IэпщIэлъапщIэ цIэрыIуэ Тумэ Залым и лъэщапIэм иригъэблэгъащ. Шынэхъыжьым куэдым хуигъэсащ Аслъэн. Абы къыщицIыхуащ Фаберже Карл и орденыр зиIэ мастер цIэрыIуэ Алмэ Муса.
Тумэ Аслъэн Къулъкъужын Ищхъэрэм Къып Мухьэмэд и цIэр зэрихьэу дэт художественнэ школми щолажьэ. Езым и IэпщIэлъапщIагъэм ныбжьыщIэхэр хуегъасэ, щапхъэхэр къахуехь, IэщIагъэм дрегъэхьэх. IэщэщIхэм я гильдием хэтхэр и гъэсэнхэм я деж къригъэблагъэри, мастер-класс ирагъэкIуэкIащ. Аслъэн и гъэсэнхэм яхэтщ ехъулIэныгъэхэр зыIэрызыгъэхьахэр. Ахэр гъэлъэгъуэныгъэ зэмылIэужьыгъуэхэм хэтщ, текIуэныгъэхэр къыщахь урысей зэпеуэхэм.
Аслъэн хъуэпсапIэу иIэщ Налшык гъэлъэгъуэныгъэ IуэхущIапIэ къыщызэIуихыну. Абы ныбжьыщIэхэми уащыдэлажьи гъукIэ цIэрыIуэхэр къебгъэблагъи хъунут.
ГУГЪУЭТ Заремэ.
