Лъэпщ, и тепщэр лIа нэужькIэ, ГъукIэ закъуэу хэкум ист: Лъэпщ и сыджыр абрэмывэт, Лъэпщ и уадэр и IэштIымырт.
КIыщым блэкIыу Сэтэней-гуащэ дэплъри, Лъэпщыр къилъэгъуащ: Лъэпщ Iэ пцIанэкIэ гъущI плъар дей чы цIынэу игъэшырт, IэштIымкIэ еуэрти иупIэщIырт, ишэщIыжырти мафIэм хиIурт.
Сэтэней-гуащэ бэрэ гупсысэщ,
Сэтэней-гуащэ игу куэди къэкIщ.
Сэтэней-гуащэ Лъэпщ фIэпсэкIуэдт, быдэу игу хилъхьащ зыгуэркIэ ещхьэпэну.
Сэтэней-гуащэ кIуэжри, пхъэ тыкъырым зы уадащхьэ къыхихащ. Зей пхъэдзакIэм къыхищIыкIри, уадэм кIыуэ фIилъхьэжащ. Пхъэ тыкъыр етIуанэр къищтэри, сыдж щхьэгуэжь къыхиIущIыкIащ. Жэщым, Лъэпщыр жеижауэ, ахэр кIыщым щэхуу ихьщ, щIидзэжри Сэтэней-гуащэ гъуэлъыжащ.
Лъэпщ пщэдджыжьым кIыщым кIуауэ пхъэ уадэр, сыджыр щилъагъум, гъэщIэгъуэн къыщыхъури, гъущIу сыджрэ уадэрэ ищIащ. Еплъщ, къеплъыжри, уригъукIэ зэрыхъунум гу лъетэ. А лъэхъэнэм щыщIэдзауэ иригъукIэуи къыщIедзэ Лъэпщ гъущIым къыхищIыкIа сыджымрэ уадэмрэ.
Сыджрэ уадэрэ иIэми, Iэдэ иIэтэкъым Лъэпщ.
МафIэм иIэр хиIурт Лъэпщ,
Гупсысэным ихьырт Лъэпщ,
Щхьэр икъузу кIыщым щIэтт,
Iэдэ щIыкIэр игу къэмыкIт.
Тхьэхэм ягу къэкIауэ пIэрэ? – жиIэу, Лъэпщыр нахоупщIэ:
– Тхьэм я тхьэжу, ди Тхьэшхуэ,
Iэдэ дауэ хъуну сщIа?
– СщIэркъым!
– Ди тхьэ лъапIэу, Тхьэгъэлэдж,
Iэдэ дауэ хъуну сщIа?
– СщIэркъым!
– Уэ зи уз кIуэдын, Амыщ,
Iэдэ дауэ хъуну сщIа?
– СщIэркъым.
Тхьэхэм «тщIэркъым» щыжаIэм, Iэдэ щIыным Лъэпщ покIыж.
Махуэ гуэрым Сэтэней-гуащэ псы къихьыну псыхьэ кIуэрт. Псым здэкIуэм, зэблэдзауэ блитI зэтелъу къыщилъагъум, къегъэзэжри, Лъэпщ иреджэ. Сэтэней-гуащэ блитI зэтелъым зэблэдзыпIэм баш ныхеIу. Баш щыхиIум, блитIыр къощтэ, я шэрэзхэр кърадзри зызэрадз.
Блэм я щхьитIыр щызэхуэкIуэм,
Блэм я кIитIри зэхуокIуэж,
Блэм я кIитIыр щызэхуэкIуэм,
Блэм я щхьитIыр зэхуокIуэж.
БлитIым я щхьэр, блитIым я кIэр Лъэпщ щилъагъум, гукъэкI ещI. Iэдэ щIыным хуэпIащIэу кIыщым псынщIэу къокIуэж. Лъэпщ къосыжри гъущI башитI блитIым ещхьу нызэбледз, блащхьэм ещхьу гъущI башитIыр уадэр къещтэри еупIэщI, зы гъущI Iунэ иретыжри, Iэдэр, арыххэти, хьэзыр мэхъу.
И IэщIагъэр игъэщIагъуэу Лъэпщ и закъуэ кIыщым щIэту зы макъ гуэру къоIу:
- Уэ, гъущIытхьэуэ си Лъэпщ, гъукIэ псом я тепщэ хъуа, Iэмэпсымэр къохъулIащ. Иджы кIыщым и бжэр быдэу хуэщI, нэгъуэщI гуэрым узэхъулIар къищIэмэ, уи IэщIагъэр пфIэкIуэдынщ.
Лъэпщ къыщIэплъри зыщиплъыхьым, хэт псэлъами къилъэгъуакъым, къэгупсысэщ, нэгупсысэри «ФIым къихьакъым а макъыр» жиIэри Лъэпщи, арыххэу, Iэдэр кIыщым щыщIетIэ.
Лъэпщ а махуэм нартыжь гуэрым джатэ хуищIу гъущI игъэплъырт. ГъущI плъам Лъэпщ щыIэбэм, мафIэр бампIэу къепхъуащ. Япэм къису щымытауэ гъущIми мафIэми и Iэр къисырт:
- Дауэ? – жеIэ игъэщIагъуэу. – Щхьэ сыкъисрэ нобэ мафIэм, щхьэ сыкъисрэ гъущI гъэплъам?
Лъэпщ Iэдэр къыщIехыжри, нартым джатэр псынщIэу хуещI. Абы иужькIэ зэи Iэдэншэу Лъэпщ гъущI плъам еIусэфакъым.
