КъБР-м и цIыхубэ артист, КъБР-м щIыхь зиIэ и артист, Урысейм ис лъэпкъхэм я Артиадэм, республикэм и Къэрал саугъэтым я лауреат, артист цIэрыIуэ КIэмыргуей Валентин ЩоджэнцIыкIу Алий и цIэр зезыхьэ Къэбэрдей къэрал драмэ театрым и утыкур илъэс 40-м щIигъуауэ егъэбжьыфIэ.
КIэмыргуей Валентин Москва и театр училищэ Щукиным и цIэр зезыхьэм и адыгэ студиер 1975 гъэм къиухащ. Театрым ролищэм щIигъу щигъэзэщIащ. Апхуэдэхэщ «Уэшх зыщэ» (Джим), «Как управлять женой» (Леон), «Кукарача» (Автор), «Мыщэ и къуэ Батыр» (Батыр), «Рядовойхэр» (Одуванчик), «Дахэнагъуэ» (Джэримэс), «Си щхьэгъусэм и щхьэгъусэр» (Эльбрус), «Уафэгъуагъуэ макъ» (полковник Белянин), «ЦIыхущ икIи джентльменщ» (Аттилио), «Эдгар и фызышэ» (Эдгар), «Эдип» (Эдип), «Трактирщица» (Маркиз), нэгъуэщIхэри. КъищынэмыщIауэ, фильм зыбжанэм щыджэгуащ. Ахэр – «Белое проклятье» (Хьэжы Мурат), «Вершины не спят» (Эльдар), «Расстанемся пока хорошие» (ротмистр), «По небу босиком» (Аслъэн). КIэмыргуей Валентин 2017 гъэм къыдигъэкIащ и гъащIэм триухуа «Его величество театр – моя судьба на все времена» повестыр. Абы къыпызыщэщ иджыпсту зэлэжь «Со сцены нужно уйти не вовремя, а под аплодисменты» тхылъыр.
Валентин курыт еджапIэр къыщиуха 70 гъэхэм зэманыр нэхъ гугъуу щытащ. Арауэ къыщIэкIынут артист IэщIагъэм, театрым, гъуазджэм, щэнхабзэм хуеIэр щIэмащIэр. И анэ дэлъхумрэ анэ шыпхъумрэ макъ дахэ яIэти, удихьэхыу уэрэд ягъэзащIэрт, арщхьэкIэ уэрэд жыIэным хуеджэу я зэфIэкIым хагъэхъуэну ягу къэкIакъым. Радиомрэ телевиденэмкIэ къат нэтынхэмрэ спектаклхэмрэ фIэгъэщIэгъуэну едаIуэрт икIи еплъырт, лъэпкъ къафэхэми дахьэхырт. Кавказ Ищхъэрэм япэу балет къыщызэзыгъэпэщауэ щыта Проценкэ Александр и деж абы щыгъуэ къыщыфэрт. Абы хэтт къэфакIуэ Iэзэхэу Хьэкъул Розэ, Архэст Хьэсэнбий, Къардэн Борис сымэ, нэгъуэщIхэри. Артист IэщIагъэм щыдихьэхым, езыр-езыру мурад ищIащ абы хуеджэну. Курыт еджапIэр къыщиухым, газет гуэрым къыщеджащ Москва и театр училищэм, Щукиным и цIэр зезыхьэм, щрагъэджэну адыгэ студиер къызэрыхахым теухуа хъыбарым. Зы классым и гъусэу къыдыщIэса, иджыпсту Къэбэрдей къэрал драмэ театрым и унафэщI Шыбзыхъуэ Басиррэ абырэ а IэщIагъэм хуеджэну мурад ящIат, Басир къытригъэхьэри. Адыгэ студием и художественнэ унафэщI Калиновский Леонид ЩоджэнцIыкIу Алий и цIэр зезыхьэ Къэбэрдей къэрал драмэ театрым къакIуэри, режиссёрхэр, актёр цIэрыIуэхэр зыхэт къэпщытакIуэ гупым къыхахащ студием ягъэкIуэну цIыху 23-р. ИлъэситхукIэ егъэджакIуэ нэхъыфIхэм - Калиновский Леонид, Буров Альберт, Львовэ Верэ, Борисов Анатолий, Катин-Ярцев Юрэ, Шлезингер Владимир, Мансуровэ Цицилие, Этуш Владимир, Гриценкэ Николай, Кольцов Виктор сымэ ирагъэджащ, Калиновскэм и фIыгъэкIэ урыс студием хуащI гулъытэм хуэдэ яIэу. 1975 гъэм республикэм къагъэзэжри, ди театрым гуапэу кърагъэблэгъэжащ. Москва спектаклибл щагъэувати, тхур къашэжри ягъэлъэгъуащ. Япэу ягъэувахэм ящыщщ куэдым ягу дыхьа «Тыргъэтауэ», «Хъуэжэ и фызышэ», «Эдгар и фызышэ», «Али-баба и разбойники» спектаклхэр. Я спектаклхэм щIэупщIэ яIэу, цIыхушхуэ къекIуалIэрт, республикэм и унафэщI Мэлбахъуэ Тимборэ деж щыщIэдзауэ.
Москва къанэу щылэжьэну куэдым Iэмал яIащ, ауэ я адэ-анэхэмрэ республикэмрэ кърагъэза дзыхьыр ягъэпэжмэ, ахэр къазэрыщыгугъыр ягъэзащIэмэ нэхъ къащтащ. Лъэпкъым къыхыхьэжу, ди хабзэхэр, щэнхабзэр, щIэинхэр яхъумэныр, театр гъуазджэм зрагъэужьыныр я хъуэпсапIэу къэкIуэжат. ИкIи абы зыри хущIегъуэжакъым.
КIэмыргуей Валентин роль нэхъ цIыкIуи ини игъэзэщIащ, цIыхухэм ягу къинэжу. Пащтыхь Грозный Иванрэ и щхьэгъусэ Гуащэнейрэ ятеухуа «Пащтыхьымрэ пащтыхь гуащэмрэ» спектаклым щигъэзэщIа Курдский Андрей и ролыр нобэр къыздэсым игу илъщ.
- Лохвицкий Михаил и тхыдэ-романым къытращIыкIа «Уафэгъуагъуэ макъ» спектаклым щызгъэзэщIа полковник Беляниным и ролыр сигу къинэжащ. Ди лэжьыгъэм еплъа режиссёр цIэрыIуэ Сокуров Александр Iэгуауэ ин тхуиIэтауэ щытат. «Вечно живые» спектаклым дохутыру сыщыджэгуащ, си анэр илъэс 50-м нэблагъэкIэ дохутыру зэрылэжьам къыхэкIыу а IэщIагъэр спэгъунэгъути, сыдихьэхыу згъэзэщIат. Режиссёрхэу Теувэжыкъуэ Владимиррэ Дэбагъуэ Романрэ ягъэува лэжьыгъэ зыбжанэми сфIэфIу сыщыджэгуащ, - жеIэ Валентин.
Москва, Украинэ, гъунэгъу республикэхэм жыпIэми нэхъапэм щIыналъэ куэдым я спектаклхэр яшэу щытащ. 1982 гъэм Къэбэрдей къэрал драмэ театрыр Москва ирагъэблэгъауэ щытащ, СССР-р къызэрыунэхурэ илъэс 60, Къэбэрдейр Урысейм зэрыгухьэрэ илъэс 425-рэ зэрырикъум я щIыхькIэ. Абы IутIыж Борис и «Тыргъэтауэ», Чхеидзе Александр и «Свободная тема», Нэш Ричард и «Уэшх зыщэр» спектаклхэр щагъэлъэгъуащ. А псом ехъулIэныгъэ иIэу хэтат КIэмыргуейр.
- Артист лэжьыгъэр жэуаплыныгъэ ин зыпылъ IэщIагъэхэм ящыщщ. Утыкуми гъащIэми цIыхухэм щапхъэфI щедгъэлъагъуну ди къалэнщ, нэ лейкIэ цIыхухэр къыдоплъри. Ди япэ ита ТIыхъужь Алий сымэ я зыхуэпэкIи, дуней тетыкIи, цIыху хэтыкIи дэркIэ щапхъэт. Абыхэм гъэсэныгъэ, лэжьыгъэ ирехъуи, фIы кудым дыхуаущиящ, - жеIэ Валентин.
