Дыгъэр и лъым хэту

Лохвицкий Михаил 1922 гъэм мазаем и 22-м къалъхуащ. Зэгуэрым езым зэрыжиIамкIэ, «дуней псом усыгъэр нэхъ щызыхэпщIэ и щIыпIэм – Детское Село жылагъуэм (иджыпсту Пушкин къалэм)».

Дауэ абы и адэ-анэр абы къызэрыщыхутар? Урыс-Кавказ зауэр щиуха гъэм (1864) Лъэхъущыкъуей жылэм щыщ Зэчрей шапсыгъ щIалэ цIыкIур,  Мишэ и адэшхуэр, поручик Пригарэ Иван я деж ишащ, мазэ зыбжанэ дэкIри, ар къуэ ищIащ.  Шапсыгъ ныбжьыщIэр ТIуапсы яшащ, абдеж абы жор адэ щыхуэхъуащ Лохвицкий Пётр Давид и къуэр. Апхуэдэу Аджыкъу Зэчрей Лохвицкий Захарий Пётр и къуэ хъуащ. Абы къиухащ Гъуэгу зэпыщIэныгъэхэмкIэ Петербург къэрал институтыр.  ЕджапIэ нэужьым абы и унафэщI Гарсеванов М. Н. Лохвицкий Захарий Куржым – и хэкум пэгъунэгъуу – игъэкIуащ. Захарий иубзыхуащ икIи иухуащ Боржоми - Бакуриани гъущI гъуэгу къудамэхэр.

Гъуэгуухуэ инженер щIалэм къишащ а илъэсхэм Тифлис щылэжьа, Шадинов Иванрэ Вазоли Луизэрэ япхъу, итальян оперэ труппэм и уэрэджыIакIуэр.

Михаил и адэ Лохвицкий Юрий бынитхум я нэхъыжьт, гвардие Плъыжьым къулыкъу щищIащ, Волховстройм, ХрамГЭС-м щылэжьащ, Азие Курыхым псыщIэгъэлъадэ кIэнауэ щаухуэм щыIащ. Мишэ илъэсибл щрикъум, абы и адэ-анэм Тбилиси хэщIапIэ ящIащ. ТхакIуэ хъуну щIалэ цIыкIур акварелькIэ сурэт щIыным дихьэхырт, тхылъ куэд щIиджыкIырт, еплIанэ классым щIэсу и ныбжьэгъу Крумм Витя и гъусэу приключенческэ роман итхат. Илъэситху докIри, гъущI гъуэгу школ №5-м и еджакIуэ Лохвицкий Мишэ Куржым фехтованиемкIэ и чемпион мэхъу.

ИтIанэ зауэм щIидзащ. Илъэс 19-м ит Лохвицкэр фронтым Iухьащ. Абы зауэ гъуэгуанэр щрихьэкIащ хы ФIыцIэ флотым, Iузэв тенджызым, Индыл, Керчь, Одессэ, Днестр, Дунай псыхэм.

Зауэр иухри, илъэситI дэкIауэ абы Тбилиси къигъэзэжащ.  Илъэс 20 дэкIыжауэ Лохвицкий Михаил дзэм къыдыхэта хыдзэлIхэр щызэрихьэлIэжам, наIуэ къэхъуащ цIыху 7500-м щыщу ТекIуэныгъэм и махуэм нэсыфар 98-рауэ зэрыщытыр.

Аджыкъу-Джэрий ящыщщ Хэку зауэшхуэ нэужь лъэхъэнэм литературэм къыхыхьа тхакIуэхэм. Аращ абы и Iуэтэжхэр щызэхуэхьэса и япэ тхылъым («Встречи в пути») деж щегъэжьауэ 1987 гъэм къыдигъэкIа и «Час сенокоса» повестым деж щиухыжу и творчествэ псом зауэ темэр щIыпхрышар. Абы и лъэныкъуэкIэ критикхэм къехъулIауэ къалъытэ «Неизвестный» романыр. Ар къыщыдэкIащ хамэ къэралхэми – Польшэм, Венгрием, Чехословакием, Испанием.

УрысыбзэкIэ тхэ адыгэ тхакIуэм и творчествэм увыпIэ хэха щызыубыдыр тхыдэ Iуэхугъуэхэрщ. Революционерхэу Кецховели Лада, Джапаридзе Алешэ сымэ я образхэр къыщыгъэлъэгъуащ «Выстрел в Метехи» романым, «С солнцем в крови» повестым.