ЗылI, зекIуэ ежьауэ жэщ къытехъуэри, епсыхащ. Iуащхьэ ирихьэлIати, шыр илъахъэри, езыр Iуащхьэм тегъуэлъхьащ:
– Нэху сыкъыщекIынщ, – жери.
Нарт Сосрыкъуэ зыщIэлъ Iуащхьэрат лIым жэщыр щрихыр. Нэхущым деж пщIыхьэпIэ илъэгъуащ лIым. И нэгу щIокI: Сосрыкъуэ деж ихьэри, зы шу еджа хуэдэщ:
– Нарт Сосрыкъуэ!
– Сыт ар? – жери унэм къикIащ нарт Сосрыкъуэ.
– Нартхэ ди санэхуафэщ, нытхыхьэ.
– Сыфхыхьэнт, хьэщIэ сиIэщ армыхъу, – жиIэ хуэдэщ нарт Сосрыкъуэ.
– ХьэщIэри нытхэшэ, – къыжреIэ шум.
ХьэщIэр зыщIигъури, нарт Сосрыкъуэ санэхуафэм яхыхьащ. ХьэщIэр жьантIэм дашащ, хьэщIагъэ кърахащ. Нарт Сосрыкъуэ Iэнэм ягъэтIысакъым. Санэхуафэм къахэкIыжауэ къыздэкIуэжым, хьэщIэр нарт Сосрыкъуэ йоупщI:
– Уэр нэхъ лIыфI исакъым нарт хэкум: Iэнэм щхьэ уамыгъэтIысарэ?
– СыщIамыгъэтIысаращ, – жиIащ нарт Сосрыкъуэ, – нартхэр дунейм щехыжым сэ я ужь сыкъинати, хьэдэIус Iэнэ къысхуэзыщтэн згъуэтыжакъым. Уи унэ уихьэжмэ, зы Iэнэ нэхъ мыхъуми, си цIэкIэ къысхуэщтэ…
ЛIыр абдеж къызэщыуащ, и гъуэгу теувэжри, и Iуэху кIэлъыкIуащ, къигъэзэжри и унэ ихьэжащ, пщIыхьэпIэр ягу илъти, нарт Сосрыкъуэ хьэдэIус Iэнэ къыхуищтащ.
Абы лъандэрэ заул дэкIауэ, лIыр гъуэгу техьащ. И шыр илъахъэри, нарт Сосрыкъуэ и Iуащхьэм тегъуэлъхьащ лIыр. Нэхущ хъуауэ, пщIыхьэпIэ елъагъу лIым. Нарт Сосрыкъуэ и унэм ихьэри, зыгуэр еджа хуэдэщ:
– Сосрыкъуэ! – жери.
– Сыт ар? – жиIэ хуэдэщ нарт Сосрыкъуэ.
– Нартхэ я санэхуафэщ, нытхыхьэ.
– Сыфхыхьэнт, си унэ хьэщIэ исщ армыхъу, – къыжреIэ нарт Сосрыкъуэ.
– ХьэщIэри нытхэшэ.
ХьэщIэр здишэри, Сосрыкъуэ санэхуафэм яхыхьащ. ХьэщIэр жьантIэм дашащ, нарт Сосрыкъуэ хьэщIэм и ижьырабгъукIэ ягъэтIысри, санэхуафэр яублащ…
ЛIыр, нэхущым къызэщыужри, игу зэгъауэ шэсыжащ.
