ПАЩТЫХЬ ФIЫЦIЭ

 Зи унэ цIыхубз щIэмыс лIы лэжьапIэншэ къомым ещхьу, щымыбампIэм мэжалIэ Хьэрун уэршэрэгъу къыщIыпхуэхъу щхьэусыгъуэхэм я нэхъыбэр и ныбэ изу зэрымышхэрт. Ауэ зызыщIыхуэпшэн цIыху къыщыпхуэмызэ езым и унэри хьэщIэ кIуапIэщ, Iуэхуншафэ зрамыплъыжу тезыгъэу шахмэтыр нэгузегъэужьыпIэ зыхуэхъуа хьэблэ щIалэхэм хьэщIэкIэ уеджэ хъунумэ.

 - Хьэрунтэкъым уэ къыпфIащын хуейр - Хьэрэт! – и шэджагъуашхэм щыщ гъунэгъум къыхуезыхьэкIа Бэч къэрабгъафэ къраплъ нэхърэ, хабзэншэу теIукIми нэхъ къещтэ.

 - Нэхъыжьхэм апхуэдэу епсалъэркъым, Бэдж, - къыбгъэдэс лIы Iэсэлъасэм епщэфыIэн щигъэтауэ, Бэч къыщIихьа тепщэчым бгъэдокIуатэ Хьэрун. Зи дзэхэр Iухуа хьэшхуэм ещхьщ - бэнэнкIэ ерыщщ, ауэ дзэкъэфыркъым. Бэчи ар къызэрыщыхъур бзэ зыIурылъ псэущхьэ махуэжьущ, зыгуэрхэр къыщыжьэдэху къэхъуми, и пIэ къримышу. Компьютерхэм зэрелэжьым щхьэкIэ къыфIища Бэджри зриусыгъуэджэркъым. Уэ нэхърэ нэхъ губзыгъэ узыщримыхьэлIэ унэ зэлъыIутхъуам хуиту ущобауэ, зыми ущызэпиплъыхьыркъым, нэхъыщхьэращи, зэрыбужэгъуу - ущхьэхуитщ.

 Бысымым мэлыл гъэвар зрихьэлIэху, зи пщэр яутIыпщыжу и телефоным епэщэщыну хуит хъуа Щыхьым зэдгъэцIыхунщ.

 Хадэ щIэнымрэ пщIэ зэIэпыхынымрэ къадэмыхуэ и къуажэгъухэм елъытауэ, тхылъ щызэрахьэ унэм къыщыхъуа, еджапIэ гуэрхэми зыщызыгъэкIэрэхъуа Щыхьым, яцIыху нэхърэ къацIыхуж зыхужаIэм хуэдэщ. Банэ къыхэмыуэн папщIэ, удзым лъапэпцIийуэ къыщызыкIухь сабийр уигу къигъэкIыу, Щыхьым макъыр бзэгум зэрыпищIэ псантхуэр апхуэдизкIэ махэщи, къедаIуэм и гулъытэр езыр къыщылъэту щIэмыпхъуэжыным фIехь, зэхихыр зыгуригъэIуэн дэнэ къэна. Нэхъыжьым иришэжьа хъыбарыр и кIэм нигъэсыхукIэ псэун щызымыгъэтыжыфыну щIалэхэм ар щысхь ямыIэу зэпауд, къыпэпсэлъэжхэри къахокI. ИтIани, зэрымыпсэлъэрейм хуэдиз дыдэкIэ икIи къыщегъэтхъыгъуей лэжьакIуэжьыр фIыуэ ялъагъу, къыхуэзэху зыкъыхуэзыгъэпелуан Хьэрун, «уотхьэлэ мыр» жаIэурэ, къыщыIэщIахыжри мащIэкъым. Зэрыщытым нэхърэ къраплъ фэр нэхъ зехьэгъуафIэ щыхъуам ещхьу, къулыкъущIэ къызыхамыщIыкIыфа езы мыIэрысэгъэкIри нэхъыбэм щымщ, жыгхэм щепэщэщкIэ е абыхэм зыгуэр щыщIэупщIэкIэ и бзэр къызэритIатэм гу лъумытэмэ. Щымыжь къыщIыфIащари арагъэнщ. Бын балигъ ущиIэкIэ, нэхъыжьыпщIэ гуэри къыплъысынкъэ? Хабзэм и хьэтыркIэ, тIэкIу ягъэжьантIэ, пэжщ. Арами, къуажэм зызыгъэтхьэIухуду дэс нысащIэ къомым я набдзэхэр яхущIэзычу яхуэзылэж Дахэзилэ ар лIыуэ къыкъуощ жыпIэныр пцIыщ.

 Тхьэусыхэу иришажьэрэ зигъэщIагъуэу иухыжу, езым игъэIум унагъуэр къыдэзыгъэудж бзылъхугъэ жьэфочыр и щхьэгъусэм тIасхъэщIэхыу бгъэдэт фIэкIа пщIэнкъым. Щыхьым щэхуэкIэ зэримыщIэри, и щIагъщIэлъхэр зэрижьыщIыжри, къыщIешхыдари, имыдэу здыфIэкIуахэри щащIэ къуажэм. И IэщIагъэм цIыкIуи ини къыхуигъэныкъуэ зэпыту зэрыщытым нэмыщI, и лIым и гугъу ищIурэт Дахэзилэ цIыхубзхэм къыхуаIэ фIэлIыкIым и зэхуэдитIыр зэрызэригъэпэщар. Езыр пщы IурыIэбэгъуейм зыдэзыгъэш пщылI губзыгъэу къыхолыдыкI а хъыбархэм. И псалъитIым я зыр зэры-Щыхьымым зыкъом игъэбэлэрыгъ щхьэкIэ, пIэщхьагъ зыдигуэш цIыхухъум и цIэр хуиту зэригъэныщкIуми, игу къыхэмыщтыкIыу абы зэрытепсэлъыхьыфми уи фIэщ нэхъ ящIыр зэщхьэгъусэхэм я зэхуакум жьыуей зэрыщызепщэмрэ и лIым пэщIэт фызым и мэсхьэбым уимыту бжэщхьэIум узэрырамыгъэбэкъуэнумрэщ.

 Щыхьым и телефоныр къоуэри, Дахэзилэ къыхутригъэува и сурэтыр къытредзэ. Абы зи нэр техуа Хьэрун къолIэлIэн?

 - Къытех! Уэри зыгуэр уагъэшхынщ.

 Жьэрэ IэкIэ зезыхуэ анэм сыкъыIэщIокI щыжиIэм, нысащIэ псэ махэIуэ къызэрыпэщIэхуарат Хьэрун и унагъуэбжэр щIызэхуищIыжар. ИмыкI-имысу, къалэм щопсэу иджы и унагъуэр илъэсым нэблэгъауэ. Емыфэху лIы хъарзынэщ, фадэ ткIуэпс зэрыIухуэу, и щхьэр щIрегъэхьэ. Сабийхэр зэзэмызэ гуащэм деж яшэурэ щагъэIэ: ягъашхэ, яхуапэ, сурэт трахыжри, нанэ зыкIи зэрымыкъуаншэм и щыхьэту, адэ-модэкIэ къыщыкъуагъэплъ. Ятепсэлъыхьхэм жаIэ псоми къикIыр зыщ: гуанэ зэрынащ, пхуещIэнуIакъым.

 Бэч и телефоным тет макъамэ нэжэгужэм гупсысэр зэпеуд.

 - НтIэ, щыIэщ, хъыджэбз хьэщIэ гуэрым доуэршэрри щысщ, хущIыхьэркъым, - лIапIэм темыIэбэмэ, Бэч гушыIэр къемыхъулIауэ къелъытэ.

 - Иджыпсту ягъэшхэнущ ар, - зэкIуэцIолъэлъ зэщхьэгъусэ псори зыфIэдыхьэшхэн щIалэ фызкъэмышэр.

 Дахэзилэ къызэрыIухьар щхьэгъубжэмкIэ зылъэгъуа Щыхьым абы къыхуэтэджауэ фэ къытемыуэн щхьэкIэ, къызэфIоувэри псы хуэлIэ хуэдэ зеплъыхь.

 - Зи телефон къытрахым и насыпкъэ, - и лIыр зыхэс гуп щыхыхьэкIэ, Дахэзилэ езыр зэрыщхьэгъусэ тыншым гу лъыптэну къыбдоIэпыкъу. Къэб гъэва IупщIэ зыбжанэ зэрылъ тепщэчи иIыгъщ.

 «Ар зы!» - Бэч Щыхьым къыщIэгубжьын хуеяхэр игукIэ ебж, хьэблэм зэрыдихьэнум хуэдэу.

 И фызыр цIыху щыту къызэрепсалъэм илъэс щэщI хъуауэ емысэ Щыхьым псы йофэри дэгу-нэфу зэфIэтщ, къыппыкIынум фIэкIа къызыфIэмыIуэху цIыхубзым къэб гъэвам къригъэлэжьынум поплъэри.

 - Дауэ ущыт, Хьэрун? – и тепщэчыр Iэнэм трегъэувэ Дахэзилэ. – ЗыIугъахуэ.

 ЗэлIзэфызыр зэгъусэу и пащхьэм къызэризэрыхьам ищIыIужкIэ, шхэныр зэпигъэун зэрыхуейм къызэIуигъэуа Хьэрун щIыIэ-щIыIэу жэуап кърет:

 - Псэухэм зыдогъэщхь, Дахэзилэ, къеблагъэ! Дэ тхуэдэ ягъашхэрэ?

 - Ар щхьэ жыпIэрэ, си дэлъхужь! Уэ пхуэдэкъэ ягъашхэр!

 «Ар тIу!»

 Дахэзилэ зымыщIэр Хьэрун и щхьэгъусэ Линэ щхьэзыфIэфIагъкIэ и щхьэр пщIантIэм зэрыдимыхар? А дамэдазэм нэгъунэ деукIэ езым и лIыр зэрызримыпэсри нысащIэр цIыхуу къызэримылъытэри.

 - Уэлэхьи, сыарэзым! – и щхьэ хуэпсэлъэж хуэдэу зегъэкIэрахъуэ Хьэрун.

 Ар щIэарэзыр мыдрей щыми къагуроIуэ.

ЧЭРИМ Марианнэ,

 «ЛIы иримыкъу»