«Адэ» псалъэм и мыхьэнэмрэ «мэл гъэхъунымрэ» щызэгухьа «Отцеводство» псалъащхьэ гъэщIэгъуэныр къэзыгупсысар «Коммерсантъ» газетым и журналист Колесников Андрей Ивановичщ.
УФ-м и Президент Путин Владимир зыщIыпIэ кIуэми, къэкIуэжми, зэIущIэ иригъэкIуэкIми, а псоми япэу тепсэлъыхьхэм язщ Кремлым и Iэгъуэблагъэм щылажьэ журналистхэм нэхъ къахэщ Колесников Андрей Иванович. Ауэ уней къыдэкIыгъуэу зэрыщытым и фIыгъэкIэ, «Коммерсантъ»-м и хъыбар къэгъэлъэгъуэкIэр нэхъ хуитщ. Псоми къахощ къэралым и лIыщхьэр цIыху къызэрыгуэкI хуэдэу, протоколыбзэм нэхъ пэIэщIэу къэзыгъэлъэгъуэф Колесниковым и тхэкIэр. «Путиным нэхъыфI дыдэу илъагъу журналист» цIэр куэд щIауэ зыкIэрыпщIа тхакIуэм тхылъ зыбжанэ и IэдакъэщIэкIщ Президентым теухуауэ. Ауэ нобэ зи гугъу тщIыр ахэракъым. Журналистым илъэс ещанэм ит щIалэ цIыкIу иIэщ, езым цIэкIи унэцIэкIи и цIэджэгъуу. Зэман щIагъуэ къыпхуэзымыгъанэ апхуэдэ IэнатIэ зэрыIутым хуэдэу, Колесниковыр пщэдджыжь къэс «Адэ IэнатIэ» зыфIища и телеграм-каналым (нэгъуэщIу «Отцеводство»-р тхузэдзэкIыркъым – Ч. М. ) щIалэ цIыкIум щIэуэ дилъагъухэмкIэ мини 2-м щIигъуа и IэщIэдзхэм щадогуашэ.
Дэ абы сыт худиIэху? – жиIэнщ дызытепсэлъыхьыр зыфIэмыгъэщIэгъуэным. Ауэ хэт нэхъ къимыщтэнрэт дунейм къыщытехьа ипэ махуэхэм, уеблэмэ иджыри псэлъэкIэ щимыщIам щегъэжьауэ, зэрыщытам и хъыбар зэхихыжыну. КъызэрыщIэкIымкIэ, Колесниковым мыр и япэ «бын тхылъкъым». Иджы балигъ хъуа и нэхъыжьитIми – щIалэрэ хъыджэбзрэ – апхуэдэ дыдэхэр яхуитхакIэщ. Ауэ нэхъыщIэ псори нэхъ гъэщIэгъуэнкъэ? Аращи, махуэ щIагъуэ дэмыкIыу щIалэ цIыкIум япэу къыжьэдэкIа псалъэхэм, ар зэрысымэджам, зэрыхъужам, зэрыбэшэчам, зэрытэмакъкIэщIам, зэрыгуфIам, къызэрыуIэбжьам я хъыбар тхыгъэкIэ додаIуэ. «Адыгэ псалъэм» мы урыс щIалэ цIыкIум и хъыбарыр къыщIэтхьэсари апхуэдэхэм язщ. КъызэрыщIэкIымкIэ, Андрей-нэхъыщIэр и анэ шыпхъу Аня «НанэкIэ» йоджэ.
«Андрей и анэм и гъусэу гъуэлъыжын имыдэжу хъуащ, - дыкъыщоджэ адэм и тхыгъэм. – НанэкIэ зэджэ и анэ шыпхъу Аня игъэгъуэлъыжмэ нэхъ къещтэ». Колесниковым и хъыбархэм сабийм и анэ Даши, ныбжьэгъу къыхуэхъуа Мири, мо зекIуагъащIэм и гулъытэр зытхьэкъу «гъуэгум телъ полицей щIалэри», куэдрэ зыщIыпIи къыщимыгъанэ машинэ цIыкIу гупри хэтщ. Ауэ, ярэби, дэри адыгэбзэкIэ мыпхуэдэ гуэр диIарэт жыпIэу узэзыгъэхъуапсэр щIалэ цIыкIур гъунэ зимыIэ адэ-анэ лъагъуныгъэм зэрыхапIыкIым и нэщэнэхэрщ, ар удз гъэгъам ещхьу зэрагъафIэрщ, а псом и фIыгъэкIэ цIыхуфI къызэрыхэкIынум шэч къызэрытумыхьэрщ. Путин Владимиррэ илъэситIым ит и къуэ цIыкIумрэ зэратепсэлъыхьым укъыщеджэкIэ, Колесниковым и хъэтIым а тIур зэмыщхь хуэдэущ къызэрыхэщыр. ИтIани, илъагъур итхыж къудейуэ аракъым журналистым, Iуэхур зэрыщытыр къыщиIуатэкIэ, ар зэрыщытын хуейр пщигъэгъупщэркъым. Къэралым и лIыщхьэми езым и бынми я гум щыщIэр екIуэкIым къыхепхъуэтыкIыф.
Литературэ мардэкIэ къапщтэмэ, гушыIэмрэ щIагъыбзэмрэ щыкуэд Колесниковым и тхэкIэр нэхъ зэщхьыр Зощенкэ Михаил и «Лолэ цIыкIурэ Минькэ шыррэ» Iуэтэжхэрщ. Зощенкэ-балигъым и адэ-анэр щыцIыкIуам къызэрыхущытар игу къигъэкIыжурэ, и шыпхъумрэ езымрэ гъэсэныгъэ зыхаха щапхъэхэр къеIуэтэж. Апхуэдэ щIыкIэу тхакIуэм иджы имыIэж и адэ-анэм зэрахуэзэшыр игу тригъахуэм ещхьщ. Зощенкэ и Iуэтэжхэр ин хъуа щIалэ цIыкIум къыбгъэдэкIыу тхамэ, Колесниковым ейхэр адэм къыбгъэдокI. ГукъэкIыж е литературэ тхыгъэ фIэпщми, а тIуми къахэщыр «унагъуэкIэ», «сабиигъуэкIэ» зэджэ дуней телъыджитIырщ. А тIур зиIэм псори зэриIэрщ.
Иджыри зы гъэщIэгъуэн! ЩIэныгъэр щытепщэ пасэрей унагъуэхэм ещхьу, Колесников Андрей Иванович -нэхъыщIэм инджылызыбзэкIэ фIэкIа къемыпсалъэ гъэсакIуэ къыхуащтащи, щIалэр урысыбзэкIэ яхуэпсэлъэжыркъым. «Ноу»-р нэхъ тыншу къыжьэдокI «нет»-м нэхърэ. Едвгъэлъытыт ар урысыбзэр нэхъ зыфIэтынш хъуа адыгэ сабийхэм!
Псалъэр тIэщIэкIыу, аргуэру анэдэлъхубзэм деж щынэсакIэ, ди гъунэгъухэм дезыгъэхъуэпса видеороликым и гугъу дывгъэщI. ЗэрыфщIэщи, шэшэнхэм анэдэлъхубзэр я IуэхущIапIэхэми хуиту къыщагъэщхьэпэ, абы зрагъэубгъуныр программэ куэдми хагъэхьэ. Бзэм и Iуэху къэхъеиху, анэхэр зэрагъэкъуаншэм десэжакъэ-тIэ?! Зи гугъу тщIы роликыр тезыхахэм ар щIагъыбзэу къагъэсэбэпри дигу зрагъэбгъэжащ.
- НакIуэ, си къуэ, тыкуэным дыкIуэнщи, IэфI гуэр къыпхуэсщэхунщ, - сабийм йоубзэ лъахъшэу етIысэха, урысыбзэкIэ и къуэм зыхуэзыгъазэ «мамэр».
ЩIалэ цIыкIум абы шэшэныбзэкIэ жэуап кърет:
- Си анэ! Япэрауэ, «магазин»-м и цIэр «тыкуэнщ». ЕтIуанэрауэ, папэ дапщэрэ къыбжиIа анэдэлъхубзэкIэ укъызэпсэлъэну! Дэ дышэшэнщи, ди бзэр фIыуэ тщIэн хуейщ.
Ещанэу роликым къыхохьэ «пэжыр зыщIэ» гъуэгурыкIуэр:
- Мис аращ лIыкIэ узэджэнур! Апхуэдэ щIэблэ къытщIэхъуэху, ди бзэми ди хабзэми уащIыхуэшынэжын щыIэкъым.
Зэрыфлъагъущи, Iуэху пщIыр Iуэху мэхъу. Быным цIыху нэгъэса къыхэпщIыкIын папщIэ, ар фIыуэ плъагъун хуейуэ аркъудейщ.
