НыбжьыщIэхэм я театрым и лэжьыгъэщIэ

         НыбжьыщIэхэм я театрым япэу щагъэлъэгъуащ  «Киберловушка» спектаклыр. КъБР-м ЩIалэгъуалэм я IуэхухэмкIэ и министерствэмрэ НыбжьыщIэхэм я театрым и лэжьакIуэхэмрэ я жэрдэмкIэ яъэувауэ.

         Сценарий тхыным теухуауэ республикэм щрагъэкIуэкIа зы лIэужьыгъуэу щыта «Здоровье – это здорово!» республикэ зэпеуэм и «Вместе против террора» жыхуиIэм щытекIуа Холамхановэ Алинэ и лэжьыгъэщ ар. Гъэлъэгъуэныгъэр ирагъэхьэлIащ Къэбэрдей-Балъкъэрым и хабзэхъумэ IэнатIэхэм я лэжьакIуэу зи къалэн зыгъэзащIэу 2005 гъэм жэпуэгъуэм и 13-м хэкIуэдахэм я фэеплъ махуэм.

         Спектаклым и режиссёрыр Кулиев Къайсын и цIэр зезыхьэ Балъкъэр Къэрал драмэ театрым и артист Джаппуев Маратщ. Роль нэхъыщхьэхэр ягъэзэщIащ НыбжьыщIэхэм я театрым и артист пажэхэу Шурышкинэ Татьянэ, Юсупов Илья, Щоджэн Лолитэ сымэ.

         - Терроризмэмрэ экстремизмэмрэ щIалэгъуалэм зыщахъумэнырщ си лэжьыгъэм и лъабжьэр. Дыкъэзыухъуреихь дунейм и мызакъуэу, Интернетми ныбжьыщIэхэр шынагъуэ куэдым щрихьэлIэнкIэ зэрыхъунур адэ-анэм я деж нэхьэсын хуейщ. ГъащIэми хуэдэу, Интернетми умыцIыхухэм ущепсэлъылIэ, уи дзыхь щебгъэз, уи цIэ-унэцIэр е паспортым ит гуэрхэр яжепIэ хъунукъым, - къыхегъэщ Холамхановэ Алинэ.

         Пьесэм къыщыхъу Iуэхугъуэхэр щекIуэкIыр ди махуэхэрщ. Абы и лIыхъужь нэхъыщхьэр класс нэхъыжьхэм щоджэ. ЩIалэр видео джэгукIэхэм дахьэх, и благъэхэмрэ Iыхьлыхэмрэ щIагъуэу епсалъэркъым, школ дерсхэм елIэлIэжыркъым. Интернетым щIалэм къыщицIыхуа, псынщIэу и дзыхь къезыгъэза гуэрым абы къыхуегъэлъагъуэ школ базэм илъхэм хыхьэу и оценкэхэр хузэрихъуэкIыну. «Ныбжьэгъу хуэхъуам» и зэраныгъэшхуэ  цIыхум къокI.

         Гъэлъэгъуэныгъэм ирагъэблэгъащ КъБР-м и Правительствэм и УнафэщIым и къуэдзэ Къуэшырокъуэ Залым, КъБР-м и Парламентым егъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и унафэщI Емуз Нинэ, КъБР-м Лъэпкъ IуэхухэмкIэ и министр КIурашын Анзор, КъБР-м щIалэгъуалэм я IуэхухэмкIэ и министр Лу Азэмэт, полицэм и майор Къардэн Алим.

         - Нобэ спектакль щхьэпэ деплъа къудейкъым, илъэс I9 ипэкIэ ди республикэм къыщыхъуа террактым хэкIуэдахэр дигу къыдогъэкIыж. Хабзэхъумэ IэнатIэхэм я лэжьакIуэу зи къалэн зыгъэзащIэу а гузэвэгъуэм хэкIуэдахэм зы дакъикъэкIэ дахуэвгъэщыгъуэ, - жиIащ Къуэшырокъуэ Залым. - Пэшым щIэсахэр тIысыжа нэужь, Залым и псалъэм къыхигъэщащ  апхуэдэм дытелэжьэн зэрыхуейр. ЩIалэгъуалэр щыгъуазэу щытын хуейщ Интернетым зыщрихьэлIэнкIэ хъуну шынагъуэхэр зыхуэдэм.  

         - Терактыр сыт щыгъуи хъыбарегъащIэ зауэщ. Ди жагъуэ зэрыхъунщи, жылагъуэм щыщу щIалэгъуалэр апхуэдэхэм дапщэщи нэхъ пэщIохуэ. Аращ Интернетым ис бзаджащIэхэм щIалэгъуалэр ящытхъумэныр ди къалэн пажэу къыщIэтлъытэр, - жиIащ Лу Азэмэт.

ТЕКIУЖЬ Заретэ.