КъБР-м и Музыкэ театрым и артисткэ ПащIэ Маринэ макъамэм йолэжь илъэсипщI зэрыхъурэ. Музыкэ школыр къиуха нэужь, ГъуазджэхэмкIэ Кавказ Ищхъэрэ къэрал институтым щеджащ. Утыку япэу къызэрихьа лэжьыгъэр ещIэж – ар «Джэду унэ» сабий спектаклым щыджэгуут.
Хъыджэбзыр къызыхэкIа унагъуэм щыщу музыкант, актрисэ, уэрэджыIакIуэ IэщIагъэхэр къыхэзыхар езым и закъуэщ. Абы щыгъуэми и анэм макъ гуакIуэ иIэщ, уэрэд жеIэ, и адэри гитарэ йоуэ, и шыпхъуращи – фортепианэр фIы дыдэу егъэбзэрабзэ.
Маринэ куэд щIакъым мюзикл тхыным зэрызрипщытри. Мы гъэм япэу абы утыку кърихьауэ аращ «Две мечты – одна судьба» зыфIища и лэжьыгъэр. Пьесэ япэу зи Iэдакъэ къыщIэкIа хъыджэбзым и лэжьыгъэм хэт уэрэдхэри езым итхыжащ.
Мюзиклыр зытеухуа хъыбарыр цIыхум и гур хэзыгъахъуэ гурыщIэращ. Абы и лIыхъужь нэхъыщхьитIыр хущIокъу я гъуэгуанэм зыщрихьэлIэ гъэунэхуныгъэхэм пхыкIыу, я лъагъуныгъэр зэрахъумэным. Куэд щIат абыхэм гу зэрызэхуащIрэ. Зэманым псори щIигъэбыдэжат. Ауэ зэрысабийрэ зэрыцIыхуитIыр къыщыхъуа унагъуэхэр зэхуэдэтэкъым: зыр къулейт, адрейр къызэрыгуэкIт. Абы кърикIуэ Iуэхугъуэхэмрэ гъуэгугъэлъагъуэ яхуэхъуа лъагъуныгъэм папщIэ ныбжьыщIитIым зэрахьэф лIыгъэмрэ дыкIэлъоплъ. Къапщтэмэ, хэт насыпыфIэ хъуну хуэмейр?! Ауэ насыпу къалъытэмкIи цIыхухэр зэтехуэркъым. Зи гугъу тщIы мы Iуэхухэр лэжьыгъэм и лъабжьэу щытми, абы гупсысэ нэхъ куухэри къыщыIэтащ: ахъшэмрэ мылъкумрэ ди зэманым мыхьэнэшхуэ зэрагъуэтар, я быныр зыщIэхъуэпсыр ямыщIэу, абыхэм я гъащIэр «нэхъ фейдэ пылъу» (езыхэм къазэрыщыхъумкIэ) зэраубзыхуным адэ-анэхэр иужь зэрихьэр, нэхъ уи гъунэгъу дыдэу къэплъытэ ныбжьэгъум и щIыбагъ къызэрыпхуигъэзэжыфыр, фыгъуэм цIыхум и нэр зэримыгъаплъэр. Спектаклым и кIыхьагъкIэ цIыхум хабзэжь хуэхъуахэм нобэрей гъащIэ еплъыкIэр зэрыпэщIэувэм, зэманым зэрызихъуэжам, зэрызиужьам дыкIэлъоплъ.
Мюзиклым бзылъхугъэ роль нэхъыщхьэр езы Маринэ (Заринэ) щегъэзащIэ. Ар тедгъэпсэлъыхьащ Iуэхур утыку кърихьэн хуей щIэхъуам.
«Мюзикл стхыну куэд щIауэ сыщIэхъуэпсырт. Ауэ режиссурэм е макъамэ зэхэлъхьэным пыщIа IэщIагъэ сызэримыIэм щхьэкIэ - къэзухар Кавказ Ищхъэрэм ГъуазджэхэмкIэ и къэрал институтым уэрэд жыIэнымкIэ и къудамэрщ - сытегушхуэртэкъым, цIыхухэм къазэрыщыхъуныр сщIэртэкъыми, - жеIэ артисткэм. - Лэжьыгъэм къыщыIуэтар си гъащIэм щыщщ. Зы щIыпIэхэм дежи зыгуэрхэр, дауи, щIызгъужащ, ауэ, къапщтэмэ, хъыбарыр зытеухуар сэращ. Пэжыр жысIэнщи, КъБР-м и Музыкэ театрым роль гуимыхуж куэд щызгъэзэщIащ, ауэ мыбдеж си гур къыщызэIусхыпащ икIи сыджэгу къудей мыхъуу, «Заринэ и фIыгъэкIэ» къэзгъэлъэгъуащ а псом сэ сызэрыхущытыр. Лъагъуныгъэр къабзэу, хьэрэмагъ хэмылъу щытын хуейщ. Сэ си фIэщ мэхъу апхуэдэ дунейм зэрытетыр… Мюзиклым дызэрелэжьам и гугъу пщIымэ, актёр псоми я дежкIэ ар узыIэпызышэт. ЕмкIуж Андзор сыт щыгъуи езым и Iуэху бгъэдыхьэкIэ иIэжщ, абы и режиссёр еплъыкIэр сыт щыгъуи щIэщыгъуэщ икIи ролхэр нэгъэсауэ утыку къитхьэн щхьэкIэ, языныкъуэми къалэн мытыншхэр къытхуигъэувырт. Си гугъэмкIэ, дэтхэнэми мы лэжьыгъэм и щхьэкIэ, и IэщIагъэкIэ дерс къыхихыфащ. Езы пьесэри макъамэхэри тыншу стхащ, си лIыхъужь нэхъыщхьэм и гущIагъщIэлъхэр фIы дыдэу къызгурыIуэрти… Сыхуейт ди щIалэгъуалэм яхуэгъэзауэ мыпхуэдэ лэжьыгъэхэр нэхъыбэу дгъэлъэгъуэну, телефонымрэ интернетымрэ зэщIиубыда ди хъыджэбз цIыкIухэмрэ щIалэхэмрэ ахэр ягъэтIылъу, мюзиклым хэт лIыхъужь нэхъыщхьитIым зы мащIэкIэ ядэплъеину. Насыпыр мылъкум епхакъым, уи хъуэпсапIэр къохъулIэн щхьэкIэ ар уи щытыкIэкIэ къэблэжьын хуейуэ аращ. Мюзиклым хэт Заринэ нэмысыфIэщ, унагъуэ хуэщIам щыпсэуми, гугъу зригъэхьу йоджэ, адэ-анэм пщIэ яхуещI, езым и щIэныгъэрэ къарукIэ псори зригъэхъулIэну иужь итщ. И лъагъуныгъэращи, ар абы хуэпэжщ. Арауэ къызолъытэ ди зэманым дызыдэплъеин хуейр».
Лэжьыгъэм и режиссёр ЕмкIуж Андзор мюзиклым теухуауэ жеIэ: «Мюзиклым сызыщыдэлэжьа артистхэр дахагъэ къэгъэщIыным хуэпабгъэ, я лэжьыгъэр зрагъэхъулIэн папщIэ, уеблэмэ лIыгъэ щIэнми хуэхьэзыр защIэщ, абы къыхэкIыу ар гъэувыным гугъуехь лъэпкъ хэлъакъым. Апхуэдэ дыдэу зи ужь дит Iуэхур зыхищIыкIащ икIи къыддиIыгъащ КъБР-м и Музыкэ театрым и унафэщIми. Пэжщ, ди цIыхур «зэса» спектаклхэм я ухуэкIэм ар тIэкIу къащхьэщокI. ДжэгукIэм зыщIыпIэ дежи дыкъыщытекIагъэнщ, ауэ дэ дызыхущIэкъуар театреплъым щIалэгъуалэм езым я бзэкIэ, я гупсысэкIэ зыхуэдгъэзэнырщ. Режиссёрым и «лъагъукIэхэри» артистхэм къагурыIуащ, дэтхэнэми хузэфIэкI къигъэнакъым. СфIэфIу мы театрым сыдэлэжьащ. Апхуэдэ гуп гъуэзэджэм къытебгъэзэжури удэлэжьэфынущ. КъБР-м и Музыкэ театрым сохъуэхъу щIалэгъуалэм яхуэгъэза мюзикл и репертуарым къызэрыхыхьамкIэ».
Мюзиклым хэтхэм я гугъу пщIымэ, лIыхъужь нэхъыщхьэ Дамир и ролыр зыгъэзащIэр КъБР-м щIыхь зиIэ и артист ЦокIыл Азэмэтщ, Заринэ ейр - ПащIэ Маринэрэ Дэгу Каринэрэщ. ХьэрычэтыщIэ Къурмэн и ролыр утыку кърихьащ ПащIэ Алим. Абы и щхьэгъусэ Зерэ ейр - Осетие Ипщэм щIыхь зиIэ и артисткэ Мэз Джульеттэ. Дамир и ныбжьэгъу Зауру мэджэгу Холамханов Къайсын. Дамир и анэ Жаннэ и ролыр ягъэзащIэ КъБР-м щIыхь зиIэ и артисткэхэу Мамбэт Мадинэрэ Шэрджэс Iэсиятрэ. Зи щIы Iыхьэхэр зыфIэкIуэда Долэтыр- Щауэ Артурщ, абы и къуэ Аскэрыр - Абей Рустамрэ Теунэ Джэмалрэщ. Батыр и ролыр ягъэзащIэ КъБР-м и цIыхубэ артист Къуныжь Алим, Къардэн Радик, Хрусталев Александр сымэ. Апхуэдэуи мюзиклым хэтщ Замай Каринэ (Ринэ), Габуевэ Зухра (Мадинэ), Сонэ Мурат (БетIал), Бекъул Беслъэн (цIыху блэкI хуэдэу) сымэ. Шэч хэмылъу, нобэрей зэманым пэджэж мыпхуэдэ лэжьыгъэхэр егъэлъэгъун хуейщ ди щIалэгъуалэм.
