Гъуазджэм и лэжьакIуэ цIэрыIуэхэр

КъыжыIапхъэщ, къалэм и егъэджэныгъэ, щэнхабзэ IуэхущIапIэхэр мы Iуэху дахэм жыджэру зэрыхэтар. Налшык къалэм Сабий, щIалэгъуалэ творчествэмкIэ уардэунэм щекIуэкIа «Изобразительное искусство молодых профессионалов. Большой Кавказ и Юг России» III лъэпкъыбэ щIэныгъэ зэхыхьэм щытепсэлъыхьащ «Традиции и новаторство в творчестве современных художников Северного Кавказа» жаIэу ягъэбелджыла Iуэхум. КъыкIэлъыкIуэу абы щыпащащ КъБР-м и Лъэпкъ музейм.

Зэхыхьэм хэтащ щIэныгъэхэмкIэ кандидат пщыкIуз, докторищ, академиких, ХудожествэхэмкIэ Урысей Академием (РАХ) пщIэ зиIэу хэт цIыхухэм ящыщ. Конференцым зэхуишэсащ Москва къалэм, Къэбэрдей-Балъкъэрым, Дагъыстэным, Осетие Ищхъэрэ - Аланием, Абхъазым, Луганск, Дон Iус Ростов, Ставрополь, Пятигорск, Адыгейм щыщ художникхэр, егъэджакIуэхэр, гъуазджэм и лэжьакIуэхэр. 

КъБР-м щIэныгъэмрэ егъэджэныгъэмкIэ и министр Езауэ Анзор жиIащ мыпхуэдэ зэхыхьэхэм мыхьэнэшхуэ зэраIэр. 

Пащты Герман КъБКъУ-м щиIэ лъэщапIэм мастер-класс щригъэкIуэкIащ УФ-м и цIыхубэ художник, РАХ-м и академик Петров Константин. КъБКъУ-м Ухуэныгъэмрэ дизайнымкIэ и кафедрэм, ДизайнымкIэ колледжым реставрацэмкIэ и къудамэм, Пятигорск къэрал университетым дизайнымкIэ и университетым я студент 40-м зыщагъэгъуэзащ академикым и Iуэху бгъэдыхьэкIэхэм. Мастер-классым хэтынухэр зыхуеину псори къаритащ «Гамма» IуэхущIапIэм.

Студентхэм я пащхьэм къыщыпсэлъащ гъуазджэм и лэжьакIуэ, къэралым и IэщIагъэлI цIэрыIуэхэр. РАХ-м и щIэныгъэ къэхутакIуэ институтым художественнэ егъэджэныгъэм и Iуэху зэIумыбзхэмкIэ и къудамэм и унафэщI, РАХ-м и академик, искусствоведенэмкIэ доктор Астраханцевэ Татьянэ и докладыр триухуат «Народные корни народного художника. К 90-летию Зураба Церетели» лэжьыгъэм. РАХ-м и щIэныгъэхутэ институтым и щIэныгъэ лэжьакIуэ, УФ-м гъуазджэхэмкIэ щIыхь зиIэ и лэжьакIуэ, РАХ-м щIыхь зиIэу хэт Бойцовэ Татьянэ зытепсэлъыхьар «Особенности становления изобразительного искусства и системы художественного образования на Северном Кавказе» Iуэхури.

Мы Iуэхум хыхьэу гъэлъэгъуэныгъэхэр щекIуэкIащ къалэм и музейхэм. Художник ныбжьыщIэхэм папщIэ къызэрагъэпэща «Кавказ. Притяжение будущего» зэпеуэм щытекIуахэмрэ абы хэтахэмрэ я лэжьыгъэхэм фыщеплъыфынущ СурэтыщI гъуазджэхэмкIэ музейм, Ткаченкэ Андрей и цIэр зезыхьэм. КъБР-м и Лъэпкъ музейм щагъэлъагъуэ РАХ-м и Ипщэ къудамэм и академикхэм я IэдакъэщIэкIхэм щыщ. Аращ щагъэлъэпIари «Кавказ. Притяжение будущего» гъэлъэгъуэныгъэм щытекIуахэр. 

ХудожествэхэмкIэ Урысей академием и академик, РАХ-м сурэтыщI гъузаджэм и тхыдэмрэ теориемкIэ и щIэныгъэхутэ институтым и унафэщI Ступин Сергей и псалъэм къыхигъэщащ РАХ-мрэ УФ-м и СурэтыщIхэм я зэгухьэныгъэмрэ 2022 гъэ лъандэрэ мы Iуэхур зэрызэдагъэзащIэр. КъБР-м и махуэшхуэм ирихьэлIэу ирагъэжьа Iуэхум апхуэдэу зиубгъуащ. Нэгъабэ щыщIэдзауэ абы Кавказ Ищхъэрэ псор къыхыхьэ хъуащ. Мы гъэми абы нэхъри зрагъэубгъу. Зэхыхьэм хэтщ Кавказ Ищхъэрэ федеральнэ щIыналъэм и хэгъэгухэм, Кърымым, Донецк, Луганск цIыхубэ республикэхэм, Адыгейм щыщ сурэтыщIхэр, графикхэр, скульпторхэр. КъищынэмыщIауэ, Абхъаз, Осетие Ипщэ, Куржы щIыналъэхэм я художникхэм я лэжьыгъэхэри щагъэлъагъуэ. А псор къызыпэкIуэр КъБР-м и Iэтащхьэм и Администрацэр, КъБР-м и Парламентым, КъБР-м ЩэнхабзэмкIэ и министерствэр къазэрыдэIэпыкъурщ. КъинэмыщIауэ, зэпеуэм щытекIуахэм ират саугъэтхэр ди республикэм и мылъкум къыхокI.

- Урысей Ипщэм ХудожествэхэмкIэ и Урысей Академием хэтхэм я лэжьыгъэхэр щIэщыгъуэщ. Ди академикхэмрэ гъуазджэм и лэжьакIуэ пажэхэмрэ фIыщIэ яхуэфащэщ къызэрыддэIэпыкъум, Налшык и музейхэм ныбжьыщIэхэм къащыхузэдгъэпэща Iуэхухэм жыджэру зэрыхэтымкIэ, я Iэзагъэм и щэхухэм щIэблэр зэрыхуаущийм папщIэ, - жиIащ Ступин Сергей. 

РАХ-м и Ипщэ щIыналъэм и къудамэм и унафэщI, академик, скульптор, егъэджакIуэ, профессор Олешня Сергей къэпсэлъащ ди хэкуэгъу художникхэм гуапэу къазэрыхущытымрэ ди щIыналъэм и сурэтыщI гъуазджэм и зыужьыныгъэм фIыуэ зэрыхищIыкIымрэ наIуэу. Республикэр зэрыгушхуэ художник, скульптор цIэрыIуэхэм я цIэ къриIуащ абы. 

УФ-м и цIыхубэ сурэтыщI, РАХ-м и академик, «Регионы России» IуэхущIапIэм и унафэщI Петров Константин къыхигъэщащ къэралым и сурэтыщI гъуазджэмрэ щIэныгъэмрэ я дежкIэ мы гъэм мыхьэнэшхуэ зэриIэр, РАН-мрэ РАХ-мрэ илъэс 300, РАХ-м и президент Церетели Зураб илъэс 90 зэрырикъур тепщIыхьмэ. 

РАХ-мрэ УФ-м и СурэтыщIхэм я зэгухьэныгъэмрэ КъБР-м и Iэтащхьэм хуагъэхьэзыра фIыщIэ тхылъхэр абы Iэригъэхьэну иратащ КъБР-м щэнхабзэмкIэ и министр Къумахуэ Мухьэдин. Апхуэдэу фIыщIэ тхылъхэр хуагъэфэщ КъБКъУ-м и ректор Альтуд Юрэрэ КъБКъУ-м АрхитектурэмкIэ, ухуэныгъэмрэ дизайнымкIэ и институтым и унафэщI Къанло Алимрэ.