Къандур Мухьэдин и фэеплъу

SIFFA дунейпсо кинофестивалыр Лондон щекIуэкIынущ щэкIуэгъуэм и 18-м. Ар хуэгъэпсауэ щытынущ адыгэ тхакIуэ, макъамэтх, кинорежиссер Къандур Мухьэдин. Лъэпкъ щэнхабзэ зэхуэмыдэхэр зэпызыщIэу, куэдым я зэныбжьэгъугъэм дэлэл хуэхъуа адыгэлIым къызэринэкIа IэдакъэщIэкIым пщIэ хуащIыну къекIуэлIэнущ а зэIущIэм цIыху куэд. Кинофестивалыр зэхэтынущ щэкIуэгъуэм и 24 пщIондэ. 
Иордан адыгэхэм къахэкIа Къандур Мухьэдин Голливудым илъэс куэдкIэ щылэжьа, литературэм, макъамэм, кинематографием хэлъхьэныгъэшхуэ хуэзыщIа цIыху зэчиифIэу дуней псом къыщацIыху. Абы и лэжьыгъэхэм къыщыгъэлъэгъуащ Кавказ зауэжьым хэкум ирихуа хэхэс адыгэхэм натIэ яхуэхъуар. Къандурыр хущIэкъуащ адыгэм ираха лейр хэIущIыIу ищIыным, адрей лъэпкъхэм ди щэнхабзэмрэ тхыдэмрэ яригъэцIыхуным. 
Дауи, апхуэдэ цIыху щэджащэр 2023 гъэм зэрытхэкIыжар дунейпсо щэнхабзэмкIи хэщIыныгъэшхуэщ. ИкIи кинофестивалым и зи чэзу зэхэшэгъуэр, дауи, ещIэкIауэ щытынущ Къандурым и цIэмрэ абы къыщIэна и IэдакъэщIэкIхэм я мыхьэнэмрэ. 
The Bonds That Bind зыфIаща Iуэхум ипкъ иткIэ щэкIуэгъуэм и 19-м фестивалым къыщагъэлъэгъуэнущ Къандурым и фильм кIэщIхэр. Абы и IэдакъэщIэкIхэм къеджэу утыку къихьэнущ артистхэр. КъищынэмыщIауэ, Бэлагъы Любэ, Вильерс Кристофор, Дарвиш Адель я усэхэми къеджэнущ. ЗэIущIэр иригъэкIуэкIынущ Карим Нисарэ. 
SIFFA кинофестивалым и къызэгъэпэщакIуэ, адыгэ усакIуэ, продюсер, режиссер Бэлагъы-Къандур Любэ зэрыжиIэмкIэ, мыпхуэдэ зэIущIэхэм мыхьэнэшхуэ яIэщ дунейпсо щэнхабзэм зегъэужьыным теухуауэ. Псом хуэмыдэу ар щхьэпэ хъунущ къытщIэувэ щIалэгъуалэм и щэнхабзэр зыхищIыкIынымрэ абы ирипагэу къэтэджынымкIэ. 
ЩэкIуэгъуэм и 24-м, зэхашэ кинофестивалым и иужьрей махуэм  Вандервилл щызэхуэсынущ сурэтыщIхэр, режиссерхэр, щэнхабзэм и узэщIакIуэхэр.