АнэшхуитIым хуагъэсащ IэпэIэсэным

Гугъуэт-Иуан Бэллэ IэпэIэсэщ. Бзылъхугъэр Къэбэрдей-Балъкъэр къэрал университетым географием щыхуеджащ, IэпэIэсэным езым зыхуигъэсэжауэ аращ. Университетым ехъулIэныгъэхэр къыщигъэлъагъуэу еджа пэтми, и IэщIагъэм зэи ирилэжьакъым. Эпоксид сагъызым къыхещIыкI хьэпшып цIыкIуфэкIу гъэщIэгъуэнхэр. Абы нэмыщI, къэлътмакъ зэрыхъахэр и IэдакъэщIэкIщ. Куэду сэбэп къыхуэхъуащ щыцIыкIум и анэшхуитIым зыхуагъэсауэ щытахэр. 
- Си анэшхуитIри IэпэIэсэхэт, сытми хуэIэкIуэлъакIуэу. Си адэмкIэ си анэшхуэм сызэрыцIыкIурэ сыбгъэдэсащ. И Iэм дыщэ къыпощ, жыхуаIэм хуэдэт: цы зэрихъэрт, дэрт, хидыкIырт, шхыIэн-щхьэнтэхэри хуэщIырт. Си анэмкIэ си анэшхуэм и дей хьэщIапIэ сыкIуэрти, абыи сигъасэрт. Цы зэрихъэрт, хидыкIырт. Сэ иджыри школым сыкIуатэкъым си гуащэм фэилъхьэгъуэхэр щыхузэрысхъэм щыгъуэ. Си анэ шыпхъухэри, си адэ шыпхъухэри дэфырт. Абыхэми зыкъомкIэ садэплъеящ. Ауэ а псом си Iэпэхэр еса пэтми, къысфIэIуэхуу хьэпшып щIэщыгъуэ гуэрхэр зэIусщэу, нэхъыбэм зезгъасэу, сызыIэпишэу селэжь щыхъуар иджыщ – илъэс зыбжанэ хъууэ аращ, - жеIэ абы, сабиигъуэр игу къигъэкIыжу. 
Коронавирус уз зэрыцIалэр къыщыхъеям щыгъуэ, унэм пIалъэкIэ къыщIэмыкIыу щIэсын хуей щыхъум, зыгуэркIэ зытригъэуну и Iэпэхэр зэсар къищтэжащ. ИщIынур игъэбелджыла нэужь, интернетым абы теухуауэ илъхэр щIиджыкIащ, видеогъэлъэгъуэныгъэу щыIэ дерсхэм еплъащ. Япэ дыдэу ищIащ брелок цIыкIухэр. Ахэр къанэ щымыIэу ящэхуати, нэхъри тегушхуащ иджыри нэгъуэщI хьэпшыпхэр ищIыну. ИтIанэ ручкэ гъэщIэрэщIахэр ищIу иригъэжьащ. 
- Ручкэ щIыныр къызэгугъуэкIащ, ауэ зи ужь сихьар зэзмыгъэхъулIэуи хъунутэкъым. Ручкэм и шэкъэр иухмэ, нэгъуэщIкIэ зэпхъуэкI хъууэ щIын хуейт, армыхъумэ зы мащIэкIэ уритхэу хыфIэбдзэжынумэ мыхьэнэ иIэтэкъым. Илъэс ныкъуэ хуэдизынкIэ къэслъыхъуащ абы и Iэмалыр. Ручкэр зэпыу имыIэу сагъэщI, цIыкIухэм яфIэгъэщIэгъуэнщ. АтIэ фIыкъэ уи цIэр тетхауэ ручкэ дахэ зепхьэну. Класс псом е гупжьейхэм зэщхьу яIэн папщIэ куэду щызагъэщI щыIэщ. Къалэм дэт тыкуэн зыбжанэм щIэлъщ си IэдакъэщIэкIхэр, - жеIэ Бэллэ. 
Ручкэхэр, брелокхэр, мажьэхэр, сурэт игъэувапIэхэр, блокноттелъхьэхэр, тхьэгъухэр, пщэрылъхэр, Iэпщэхъухэр, нэгъуэщI цIыкIуфэкIухэри бзылъхугъэм къыхещIыкI эпоксид сагъыз жыхуаIэм. 
- А сагъызхэр лIэужьыгъуэ зыбжанэу зэщхьэщокI. КъыхэпщIыкIым елъытауэ, уи хьэпшыпым нэхъ езэгъынур бгъэунэхуу укъытеувыIэн хуейщ. И зэхэщIэкIэми зыщыбгъэгъуэзэн хуейщ нэсу. Сыту жыпIэмэ, ткIуаткIуэр щызэхэпщIэкIэ хэплъхьэхэр къэппщын хуейщ. Эпоксид сагъызым  и зэхэщIэкIэм теухуауэ тхыгъэ щхьэхуэхэм седжащ, интернетымкIэ зэрызагъасэ роликхэм сыщеплъащ, - жи.
Бэллэ ещI къэлътмакъ дахэхэр. Абыи интернетым къыщигъуэта видеохэмрэ мастер-классхэмкIэ зыхуигъэсащ. 
- Тынш дыдэуи къызэхъулIащ, дэн-зэрыхъэнхэм сызэрыхуэIэижьым и фIыгъэкIэ. Нэхъ сызэлIэлIар интернетым илъ ролик хуэдэхэм хамэбзэкIэ кIэщIэтхахэм къарыкIхэр къэзгъуэтынырщ. Япэ дыдэу къэлътмакъ хуэсщIащ си анэм. ЗыцIыхухэм, зигу дыхьэхэм сагъэщI, щырыщ-плIырыплIу зыIэрызыгъэхьи яхэтщ, - жеIэ IэпэIэсэм.
Бэллэ зэрыIэпщIэлъапщIэр, хьэпшып цIыкIухэр ищIыныр къызэрехъулIэр ирепх и сабиигъуэм, и анэшхуэхэм ирагъэлъагъуу щыта щапхъэ дахэхэм. Псом хуэмыдэу и гум щохуабэ анэшхуэм и хъыбархэр. 
- Си анэшхуэм хъыбар гъэщIэгъуэн куэд къызжиIэжу щытащ. И щIалэгъуэр зэрекIуэкIам, хабзэу яхэлъахэм, я IуэхущIафэу, къагъэсэбэпу щыта Iэмэпсымэхэм – куэдым, куэдым я гугъу къысхуищIырт. Сэри апхуэдэ хъыбархэмкIэ зызгъэнщIыртэкъым. 
Таурыхъищ зэпымыууэ къызжиIэжырт сыщыцIыкIум. Абы щыгъуэ ахэр зэрызмытхар сигу къоуэж. СощIэж таурыхъхэр зытеухуар, ауэ зэгъэкIуауэ нанэ зэрыжиIэжу щытам хуэдэу хъума хъуамэ фIыт.

ГУГЪУЭТ Заремэ.
Поделиться: