ЗауэлIт икIи сурэтыщIт

КъБАССР-м щIыхь зиIэ и сурэтыщI Жэрыщты Аслъэнбий Хэку зауэшхуэм лIыгъэрэ хахуагъэрэ къыщигъэлъэгъуащ.

Курыт еджапIэм зэрыщIэсрэ сурэт щIыным дихьэхауэ, илъагъу псоми сурэт къытрищIыкIырт: бгы уардэхэм, уафэ къащхъуэхэм, хъупIэм ит Iэщхэм, псыежэххэм, щIыуэпсым и дахагъэм.

Аслъэнбэч Москва и художественнэ школым, Калининым и цIэр зезыхьэм щыщеджэм, Хэку зауэшхуэр къэхъеящ икIи езыр-езыру зауэм кIуащ, зэрыгурыIуэгъуэщи, гугъуехь куэди щишэчащ. И нэгу щIэкIа гузэвэгъуэхэр, псэемыблэжу бийм пэщIэт зауэлIхэр, Iэщэхэр, дзэ Iэмэпсымэхэр, нэмыцэ кхъухьлъатэхэр, нэгъуэщI куэди иужькIэ абы и сурэтхэм къыщигъэлъэгъуэжащ.

Жэрыщты Аслъэнбэч Заполярием къулыкъу щищIащ, дзэ кхъухьым ису. Ар яхэтащ Портсамэ портыр хуит къэщIыжыным теухуауэ екIуэкIа зауэ гуащIэм, Норвегием и Киркенес къалэр хуит къэзыщIыжахэм. ТIэунейрэ уIэгъэ хьэлъэ хъуати, Тенджыз флотым адэкIэ къулыкъу щрагъэщIэжынутэкъым, ауэ зауэм Iутхэм къыхагъэкIыжакъым. Курск, Орёл къалэхэм щызэуащ, Кёнигсберг и деж ТекIуэныгъэм щыIущIащ.

Зауэм къыщигъэлъэгъуа лIыгъэмрэ хахуагъэмрэ папщIэ къыхуагъэфэщащ «За боевые заслуги» орденыр. 1947 гъэм Кавказым къигъэзэжащ. А илъэс дыдэм Саратов къалэм и Художественнэ училищэм щIэтIысхьэри, ехъулIэныгъэхэр иIэу къиухащ. ЩоджэнцIыкIу Алий и цIэр зезыхьэ Къэбэрдей Къэрал драмэ театрым и художникыу лэжьащ Аслъэнбий. ИужькIэ КъБР-м и СурэтыщIхэм я зэгухьэныгъэм хыхьэри, РСФСР-м и художественнэ фондым и Къэбэрдей-Балъкъэр къудамэм щылэжьащ.     Жэрыщты Аслъэнбий 1995 гъэм дунейм ехыжащ. Ар къэзыцIыхуу щытахэм, и лэжьэгъухэм, и ныбжьэгъухэм, благъэхэмрэ Iыхьлыхэмрэ ящыгъупщэркъым хузэфIэкI ищIэу дунейм тета сурэтыщIыр, и лэжьыгъэ телъыджэхэм ноби щIэупщIэ яIэщ.