ЗауэлI икIи сурэтыщI

Ваннах Михаил и сурэтхэр цIыху куэдым ящэху, жылагъуэ IуэхущIапIэхэр абыхэм ягъэдахэ, илъэс 80-м щIигъуауэ гъэлъэгъуэныгъэ зэхуэмыдэхэми утыку къыщрахьэ. Къыхэгъэщыпхъэщ, художникым и IэдакъэщIэкIхэр Къэбэрдей-Балъкъэрым, нэгъуэщI къалэхэм, къэралхэм я музейхэм я гъэтIылъыгъэхэм зэрыхэлъыр. 

Михаил Омск къыщалъхуами, блэкIа лIэщIыгъуэм и 30 гъэхэм икухэм къыщыщIэдзауэ щыпсэуар ди республикэрщ. Ар яхэтащ Къэбэрдей-Балъкъэрым и сурэтыщIхэм я зэгухьэныгъэр къызэзыгъэпэща художникхэми, Кавказым и дахагъэр зи IэдакъэщIэкIхэм щызыIэта IэпщIэлъапщIэхэми. 

«ПлIэидзэр пщIэхэлъу, Ваннах Михаил бгы лъагъуэ мытынш куэдым екIуэкIащ альпинист гупым яхэту. И Iуэхур къыдаIыгъыу сурэтыщIым языныкъуэхэми щIыгъуащ и щхьэгъусэ Валентинэрэ ипхъу Натальерэ. Къуршым щигъакIуэ жэщ щIыIэм и нэхущым къыхуихьыну фIыгъуэм и уасэр абы къыгурыIуэрт, уеблэмэ псэкIэ зыхищIэрт дыгъэр бгы нэпкъым къыщытехьэмрэ абы и къухьэжыгъуэмрэ нэхъ дахэу къыщилъагъуну дакъикъэр… Кавказ. Аращ художникым и лэжьыгъэ нэхъыбэр зытеухуар. IэкIэ лъэIэсыну шынэ хуэдэ, щIыналъэ дахэм и сурэтхэр абы гукIэ ищIауэ къыпфIощI. Михаил къызэрымыкIуэу фIэфIт зыплъыхьакIуэ ежьэну. Гъуэгуанэ лэжьыгъэхэм ящыщщ «Белые ночи» (Ленинград), «Замки старой Риги», «Древние руины Херсонеса», «Днепровские дали» сурэтхэр, - жеIэ искусствовед Сындыку Неллэ.

Ваннах Михаил и зауэ гъуэгуанэм теухуа сурэтхэри хъума хъуащ. Абыхэм сурэтыщIым яхилъхьащ Хэкум хуиIэ лъагъуныгъэрэ гущIэгъурэ. Нэхъ мащIэми, художникым иIэщ и благъэхэм, ныбжьэгъухэм, нэгъуэщI цIыху гъэщIэгъуэнхэм ятриухуа лэжьыгъэхэри. Ауэ нэхъыбэу уи нэм къыIуидзэр, зэрыжытIащи, Кавказыр дэзыгъэлъагъу сурэтхэрщ.