Симази сэри абы дызэригъэгупсысыжащ.
- Ар дауэ, гу зылъыдмытэжурэ мы нэхъыщIэхэм хъуэрыбзэхэр къыдадзри-тIэ, щыжысIэм:
- Дэ, тхьэ ямылейуи зыдмыщIа, зыгуэркIэ емыкIу къэтхьыну. ИтIанэ, Элиф, апхуэдэу ущыгурыхуэм, щхьэ иджыри къэс зыгуэрурэ зыкъыдумыгъэщIарэ? - еупщIащ Симазэ.
- Абы япэу гу лъызытар сэракъым, мохэращ,- жиIэри и ныбжьэгъухэмкIэ и Iэр ишиящ.
- Ей, апхэдизу фымыгузавэ фэ тIур, дэ куэд щIауэ къыдгурыIуащ фи зэхущытыкIэр, фэ ин фыхъуащ, икIи…
- Элиф, - жиIэри Симазэ и шыпхъум хуеплъэкIащ,
- Хъунщ, ей, фэ гушыIэ къывгурымыIуэжу ара? – жиIэри, и ныбжьэгъухэм ябгъэдыхьэжащ.
Элиф и псалъэхэм дэри гуитIщхьитI дащIат. Иджы сэ хуит сыхъуауэ къысщыхъурт, Симазэ, ныбжьэгъум нэмыщI, «зэпсэгъу» схужемыIэр къезгъэкIуну.
Ди закъуэ дыкъыщынэм, а псалъэмакъым къытедгъэзэжын хуей хъуащ. Симазэ нэщхъейти, сеупщIащ:
- Симазэ, сыт апхуэдизу уи жагъуэ хъуар? Элиф и псалъэхэр ара? Хьэмэрэ зыгуэр къоузрэ? СыткIэ сыбдэIэпыкъун?
- Хьэуэ, Элиф жиIар си жагъуэ щIэхъун щыIэкъым, уэрэ сэрэ ди зэхуэщытыкIэр сигу ирохь. НэгъуэщI фIыуэ схуэлъагъуну къыщIэкIынкъым. Апхуэдиз илъэс лъандэрэ сэ уэ фIыуэ укъэсцIыхуащ, уи гум хьэрэмыгъэ лъэпкъ илъкъым, сэ си жагъуэ зэи къэпщIакъым, икIи си мурад нэхъыщхьэр уэрэ сэрэ нэсыпыфIэ дыхъунырщ.
Сэ зыри жызмыIэу куэдрэ гупсысэм сыхэтащ, жысIэнуи зэхэсхынуи сызэхуей псори зэхэсхат, абы иужькIэ сыт жыпIэжынт?! ТIуми зыри жыдмыIэу зыкъомрэ дыкIуащ:
- Сэри уэр нэмыщI зыми сыхуэмейуэ, сыукIытэу си гум илъыр ныбжезмыIэфу арати, ауэ нобэ сэр нэхъ насыпыфIэ мы дунеишхуэм темыту къысщохъу.
Иджы ди гум илъхэр Элиф дахэ и фIыгъэкIэ зыхуэтIуэта хъуати, ди махуэхэр нэхъыфI зэрытщIынум иужь дитт. Япэм къыщалъхуа махуэхэмкIэ дызэмыхъуэхъуу щытамэ, иджы зы тыгъэк1э нэхъ мыхъуми зыр зым игу дыкъэкIырт. Тхылъ дахэ, гъуджэ цIыкIу, бэлътоку, гъэщIэгъуэн къытщыхъу къинэмыщIхэр къалэм къыщытщэхурти дгъэтIылъырт.
Симазэ зэзэмызэ Къайсэр къалэшхуэм кIуэуэрэ зы тхьэмахуэкIэ къыщыт щыIэт.
- Си анэ шыпхъум и деж сокIуэ, къызэлъэIуащ, ягу сыкъэкIащи аращ, - жиIэ зэпытт.
Сэ си еджэныр зы илъэскIэ нэхъ пасэу сыухырти, еджапIэм сыщIэмытIысхьэу Симазэ сежьэну тезухуащ, арщхьэкIэ абы куэдрэ дрипсэлъами, си мурадым сыкъыщыхутемыкIым, Симазэ езым щхьэкIэ уэрамым сыдэмытыну къыспиубыдащ.
- ЕджапIэр ди щхьэусыгъуэу дыкIуэу щытамэ, иджы уэ къэбухауэ сэ узигъусэу махуэ къэс укъалъагъумэ, сэркIи уэркIи ар дахэкъым, тIуми цIыхур къытхуэпсэлъэнщ, ткIэрымылъ къыткIэралъхьэнщ. Абы нэхърэ, уемыджэнуми, къалэм кIуэи лэжьапIэ къэлъыхъуи нэхъыфIщ, сэ Элиф и гъусэу еджапIэм сыкIуэнщ.
- Сэ лэжьапIэм сыкIуауи сощIри, сыкъыщыкIуэжхэм деж дауэ дызэхуэза хъуну? - щыжысIэм,
- Уэ щэбэтымрэ бэзэр махуэхэмрэщ укъыщыкIуэжынури, а махуэхэм щэхуакIуэ сыхьэтыр тхум деж тыкуэным сыкъэкIуэнщи, абы дыщызэхуэзэнщ.
АбыкIэ дызэгурыIуэри, сэ Къайсэр къалэм лэжьапIэ къэслъыхъуэну сыкIуащ. СыщIэсыну зы пэш мыин дыдэ къэзгъуэтауэ, махуэхэм лэжьапIэ лъыхъуэ сыкIуэрт. Си уэздыгъэр исати, ди гъунэгъуу щыт тыкуэным къэсщэхуну сыщIыхьауэ, я нэхъыжьым сыбгъэдыхьэри:
- Ярэби, фэ лэжьакIуэ фыхуэмейуэ пIэрэ? - жысIэри сеупщIащ.
Езыр зыщIэс пэшым сишэри къызэупщIащ:
- Уэ дэнэ ущыщ? Сыт уи ныбжь? Сыт хуэдэ IэщIагъэ уиIэ? - жиIэри.
Сызыхуэзар тырку щIалэт, и цIэр Фэтихьт, езым и ныбжьыр илъэс плIыщIым щIигъуат, щхьэгъуси быни иIэт, ар иужькIэщ къыщысщIар, тыкуэныр инт, зейри арат, щIэмылъи мыбы щумыгъуэтыни щымыIэу апхуэдэти, цIыху куэди щызэблэкIырт.
Си Iуэхур зыIутыр хуэсIуэта нэужь, селъэIуащ:
- Еджэныр къэзуха къудейщ, зы илъэс нэхъ мыхъуми сыгъэлажьэ, - жысIэри.
- Уэ лъэпкъкIэ хэт ухъуну?
- Сыадэгэщ.
- КъакIуэ, щIалэфI, сэ адыгэхэм куэдрэ сахэтащ, игъащIэми сыкъагъэпцIакъым, абыхэм уи дзыхь ебгъэз хъунущ, нэхъ укъэзыгъэпэжын лъэпкъ бгъуэтынкъым, - жиIащ.
Зы мазэм и кIуэцIкIэ лэжьыгъэм сыкIэлъыплъу сыщIэтащ, сесэ хуэдэуи хъуащ. Мы лэжьыгъэм фIыуэ хэлъыр мырат: зы тхьэмахуэ зэрыблэкIыу, абы хуэзэ улахуэр къыдитырт. Сэ япэ тхьэмахуэм щыщIэдзауэ ахъшэ хъарзынэ къызит хъуащ.
- Сэ иджыри зыри къэзлэжьакъым, - щыжысIэм, ари къысхуидакъым.
- Нобэ къыумылэжьами, пщэдей къэблэжьынкъэ, уэри адрейхэм хуэдэу махуэ псом лэжьапIэм ущIэтщ, пхузэфIэкI бощIэри - жиIэри.
Тыкуэным сэ схуэдэу лажьэу щIалибгъу щIэтт. ЦIыху къыщIыхьамэ, ар зыхуей хьэпшыпыр жиIэрт, дэ къыджаIэжырти, зыщэм псынщIэу къыхуэдгъэсыныр ди къалэн нэхъыщхьэт. Ар икIи тынш хъурт, апхуэдиз электрик хьэпшыпхэр зэхэдза хъурти, дэри нэхъ тыншу дылажьэрт.
Япэ тхьэмахуэм улахуэр къыдитыну дызэхуишэсауэ сэри упщIэ къызитащ:
- Дауэ уехъулIэрэ? СыткIэ сыбдэIэпыкъун?
- Хъуну щытмэ, щIалэхэм махуэ щырыщкIэ я гъусэу садэлэжьатэмэ, нэхъ псынщIэу сесэну къысщыхъурт.
- Ари тэмэмщ, нобэ щыщIэдзауэ щIалэхэм я гъусэ узощI.
Фэтихь и улахуэ тыкIэр хуабжьу гъэщIэгъуэнт. Улахуэ махуэм псори дызэхуашэсырти, адэкIэ дыкъыщыту дежьэрт.
Фэтихь жыжьэу щыст, зырызу къыдэджэрти зы шеибжьи къытригъэувэрт, дыуэршэру дыщысыху, сыт уигу ирихьами, сыт хуэдэ Iуэху еплъыкIэ уиIэми зригъащIэрт. Си япэ зэхуэзэм сэ тэмэму зыри схужыIакъым, куэд зэрыхэзмыщIыкIым къыхэкIкIэ.
Ауэ сфIэгъэщIэгъуэн хъуащ, цIыхум зэрыхущытыр, Iуэху ищIэм зиужьын папщIэ хэкIыпIэ къызэригъуэт щIыкIэр.
Сэ щIалэхэм, сагъащIэрт, лэжьыгъэм нэхъ тыншу узэрыхэзэгъэнур, ари зи фIыщIэр, дауи, Фэтихьт.
Зы мазэ сылэжьауэ Фэтихьыр къызэджэри, зыщIыпIэ и деж сигъэуващ. ТIэкIуи сыгузавэрт, ауэ сыгурыхуэти, псори си гум изубыдэм къыщынэмыщIауэ, стхырт, махуэм сыт хуэдэ щыщIэныгъэ щыIами, пщэдей сыт нэхъ дыхуеинуми. Ар апхуэдизкIэ сфIэфIу сщIэрти, гу лъызмытэжурэ сыдихьэхащ сатум. Иджы тхьэмахуэ улахуэр къыщыдиткIэ, шей дыщефэкIэ сэ хуиту жысIэф хъуащ си Iуэху еплъыкIэр.
