Хэку зауэшхуэм ди къэралым ТекIуэныгъэ Иныр къызэрыщихьрэ мы гъэм илъэс 80 зэрырикъур зэрагъэлъапIэм хыхьэу, КъБР-м и Лъэпкъ музейм и лэжьакIуэхэм бгъэIэпхъуэ хъу гъэлъэгъуэныгъэр яшащ Аргудан къуажэм и курыт еджапIэ №1-м.
Абы къызэщIеубыдэ СССР-м и СурэтыщIхэм я зэгухьэныгъэм хэта, КъБР-м гъуазджэхэмкIэ щIыхь зиIэ лэжьакIуэ Довгаль Александр 1943 гъэм мэлыжьыхь мазэм щыщIэдзауэ 1944 гъэм гъатхэпэ пщIондэ и Iэдакъэ къыщIэкIа плакатхэр. А лэжьыгъэхэр Хэку зауэшхуэ зэманым хиубыда цIыхухэм я псэукIар къыщыгъэлъэгъуа тхыдэ дэфтэрщ. Гъэлъэгъуэныгъэм къекIуэлIахэр хагъэгъэузащ Довгаль Александр и гъащIэмрэ гуащIэмрэ. Гулъытэшхуэ хуащIащ бийм пэщIэтыным, ТекIуэныгъэм, зэкъуэтыныгъэм къыхуезыджэ плакатхэм къыщыгъэсэбэпа Iэмалхэм.
Хэку зауэшхуэ зэманым сурэтыщI гъуазджэм и унэтIыныгъэхэм ящыщу нэхъ щIэупщIэ зиIэр политикэ плакатхэрт. Ахэр тхылъ тедзапIэхэм къыщыдагъэкIырт. Къэбгъэлъагъуэмэ, «Искусство» тхылъ тедзапIэм Москва апхуэдэ плакату 800, Ленинград 700 къыщыдигъэкIат, уеблэмэ Налшык къыщыдэкIаи щыIэщ. Зи тиражыр ебзыхьэкIа, бжыгъэкIэ 100-м щIимыгъу плакатхэр зыхуэбгъадэ хъун щыIэкъым. А зэманым Налшык къыщыдэкIа плакат псори зи Iэдакъэ къыщIэкIар 1943 гъэм Налшык къэкIуа Довгаль Александрщ. Налшык зэрыщыIа пIалъэм (1943 - 1944 гъэхэм) къриубыдэу «Агитокон» лъэщапIэм и унафэщIу щытам, агитплакат 30-м нэблагъэ ищIащ.
Художникыр 1961 гъэм гъатхэпэ мазэм дунейм ехыжащ. 1963 гъэм КъБР-м и Лъахэхутэ музейм (иджы КъБР-м и Лъэпкъ музейм) Довгаль Александр и щхьэгъусэм и деж агитлакат 32-рэ къыщищэхуащ. 1972 гъэм абы щыщу лэжьыгъищ иратащ Къэрэшей-Шэрджэсым и лъахэхутэ музейм. Плакатхэм я редактору щытар «Социалистическая Кабардино-Балкария» газетым жэуап зыхь и секретарь Давыдов Иванщ.
БгъэIэпхъуэ хъу гъэлъэгъуэныгъэр еджакIуэхэм щIэщыгъуэ ящыхъуащ. НыбжьыщIэхэр плакатхэм яфIэгъэщIэгъуэну еплъащ, абыхэм ятеухуа упщIэхэр ятащ, я Iуэху еплъыкIэхэри жаIащ.
