Шархэр - Iуащхьэмахуэ щыгум

7 апреля, 2025 - 09:16
Тегенекли къуажэм и бгы-лыжэ зыгъэпсэхупIэм щекIуэкIащ «Шархэм я фестиваль». Ар къызэзыгъэпэщахэм ядэIэпыкъуащ «Ростелеком» IуэхущIапIэр. 
Фестивалым я зэфIэкI щеплъыжащ Урысейм и щIыналъэхэм къикIа цIыхуи I50-м щIигъу. Зэхыхьэр зэрекIуэкIым кIэлъыплъыну кIуари цIыху мини 6-м нэсат. 
МахуиплIым къриубыдэу Iуащхьэмахуэ лъапэ щекIуэкIащ бгъэлъатэ хъу шархэр я теплъэкIэ щIэщыгъуэу къызэгъэпэщынымкIэ зэпеуэхэр. Абы хэтахэр зэчэнджэщащ мы Iуэхум теухуауэ. Зэхьэзэхуэр щиухым, абы щытекIуахэм я цIэхэр ягъэнэIуащ. КъэпщытакIуэ гупым хэтащ Урысеймрэ Европэмрэ аэродизайнымкIэ я чемпионатхэм щытекIуахэу Мошниковэ Еленэ (Петрозаводск), Приказчиков Андрей (Москва), Барановэ Ольгэ (Самарэ). 
Фестивалым и хьэщIэхэр пщIэншэу интернеткIэ къызэзыгъэпэща «Ростелеком» IуэхущIапIэм и щIыналъэ къудамэм и унафэщI Хут Залым зэрыжиIамкIэ, къэралым и щIыналъэхэм щыпсэу цIыху мин бжыгъэхэр зэхыхьэр зэрекIуэкIым кIэлъыплъыну Iэмал яIащ. 
Урысеймрэ Европэмрэ аэродизайнымкIэ я чемпион Толстокоров Александр и псалъэм къыхигъэщащ фестивалым и къыхуеджэныгъэ «Макъамэм дызэришэлIащ» псалъэхэм псори зэрызэришэлIар. Абы фIыщIэ хуищIащ «Ростелеком» IуэхущIапIэм. 
Фестивалым зыкърезыгъэхьэлIахэм зэхыхьэр щIэщыгъуэ ящыхъуащ икIи къыхагъэщащ зыплъыхьакIуэ нэхъыбэ щIыналъэм къешэлIэнымкIэ ар IэмалыфIу зэрыщытыр. Аэродизайн нэхъыфIхэр, шархэр фIыуэ зылъагъухэр гъэ къэси зэхуешэс мы Iуэхум. 
ТЕКIУЖЬ Заретэ.
  • 24 просмотра
Поделиться: