Гукъыдэж зыгуэш ГъукIакъуэ Идар

ГъукIакъуэ Идар концерт къызэгъэпэщакIуэщ, «Гучаков Промоушен групп» зи фIэщыгъэ IуэхущIапIэр егъэлажьэ. Идар и гупым екIуу ирагъэкIуэкI зызрапщыт Iуэхухэр, фIыщIэрэ щытхъурэ яIэщ. ГъукIакъуэр маркетолог IэщIагъэм Чехием, Прагэ, щыхуеджащ Финансхэмрэ правэмкIэ школ нэхъыщхьэм. ГъукIакъуэ Идар и илъэс 30-р щигъэлъапIэм ирихьэлIэу и IэщIагъэм, зэлэжьхэмрэ зыдихьэххэмрэ теухуауэ депсэлъащ. КъыщIэддзащ IэщIагъэм зэрыхэзэгъамкIэ, япэ лъэбакъуэ хуэхъуамкIэ.

- ЕджапIэ нэхъыщхьэр къэзухри, интернеткIэ лэжьыгъэ къэслъыхъуэу, компание гуэрым срихьэлIэщ, абы си анкетэр езгъэхьри, сыкъащтащ. Концертышхуэхэр къызэдгъэпэщырт, Мадоннэ, Брайн Адамс, дуней псом щыцIэрыIуэ нэгъуэщI артистхэри хэту. Апхуэдэу Чехием пIалъэкIэ сыщылэжьащ. Налшык сыкъэкIуэжауэ, Ащхъуэт Ритэ сыхуэзэри, лэжьыгъэ къызэрыслъыхъуэр жесIати, Шыхъуэстэн Оксанэ дей сигъэкIуащ. Оксанэ зыхуэзгъэзащ, проект зыбжани зэдэтщIащ. Ауэрэ, Хьэцей Тимур къэпсэлъащ дызэдэлэжьэну Москва сригъэблагъэу. Тимур деж сыкIуэри, шэщIауэ лэжьэн щIэддзащ, урысей артистхэр, хамэ къэралхэм щыщхэр ди Iуэхухэм хэту. Мы зэманым сэ езым къызэзгъэпэщыжа компание согъэлажьэ.

Хьэцей Тимур и фIыгъэкIэ «Кавказ Мюзик Фест» Iуэхум сыхэтащ. 2022 гъэм Налшык Гъэмахуэ театрым махуищкIэ щедгъэкIуэкIащ концертышхуэ. Белорусым, Витебск къалэм, илъэс къэс докIуэри Iуэху щыдолэжь, - жеIэ ди псэлъэгъум.

 Артистхэм ядэлэжьэнымкIэ хамэ къэралхэм щыIэ мардэхэмрэ ди къэралым ейхэмрэ щызэтехуи щызэщхьэщыкIи щыIэщ. Идар IэщIагъэм теухуауэ куэдым щыгъуазэу Чехием къикIыжа нэужь, абыкIэ щыIэ Iэмалхэмрэ ди къэралым нэхъ къыщысэбэпхэмрэ зэрызэтемыхуэм гу лъитащ.

- ЗэзгъэщIауэ хъуар къэзгъанэри, щIэрыщIэу зэтезублащ Iуэху къызэгъэпэщыкIэр. 2017 гъэ лъандэрэ Урысейм и системэм сытету солажьэ. Проектышхуэхэм зыдопщыт, къызыдогъэпэщ, ди Iуэхутхьэбзэхэм хиубыдэ Iэмалхэм заубгъу.

«Черкес ФМ»-м сызэрыдэлажьэри Тимурщ зи фIыщIэр. Ар си гъуэгугъэлъагъуэщ, куэд къыщысщIащ езым и дежи, сызыхигъэхьа Iуэхухэми, - жеIэ.

Черкес ФМ-м адыгэм и дежкIэ иIэ щэнхабзэ мыхьэнэр зэрыиныр къыхигъэщащ Идар. ЗэрыжиIэмкIэ, а Iуэхур Москва зэрыщрагъэкIуэкIыр сэбэп мэхъу абы щыпсэу адыгэхэм я адыгэпсэр къэгъэушынымкIэ, лъэпкъым и дуней тетыкIэр зыхащIэнымкIэ.

- Хэкум ущыпэIэщIэм деж, абы уи гум хуилъ хуабагъэр нэхъ IупщI мэхъу, адэжь щIыналъэ, лъахэгъу узэрыхуэныкъуэр куэдкIэ нэхъ зыхыбощIэ. Ухуозэш лъэпкъ щэнхабзэм, лъэпкъ гупсысэкIэм, Iуэху зехьэкIэм. «Черкес ФМ»-р щекIуэкIкIэ абы щIэсхэм щыщ щыгъи къохъу, лъэпкъ гурыщIэр къатегуплIэу. Илъэс зыбжанэм зэ фIэкI къыщалъхуа щIыналъэм къихьэжыну Iэмал зимыIэ куэд яхэтщ москвадэсхэм. Ди уэрэджыIакIуэхэм я уэрэдхэм телефонкIэ едаIуэу аращ ахэр. АтIэ дэ ахэр псори яхудошэ къалащхьэм. СыткIи нэщIысауэ, фэ тету, зы дагъуэ закъуи имыIэу йокIуэкI ар. Лъэпкъым и щэнхабзэр и зыIыгъыкIэр, и дуней тетыкIэр щIэныгъэкIэ къыбгурыIуэ къудей мыхъуу, IэпкълъэпкъкIэ зыхэпщIэн, уи псэр лъэпкъ гупсысэм игъэпIейтеин хуейщ апхуэдэ Iуэхушхуэр къохъулIэн папщIэ. Iуэхум хэт артистхэр дэдейхэращ, ауэ езыр къызэзыгъэпэщыр, режессёр лэжьыгъэр езыгъэкIуэкIыр Москващ, концертыр тезыхыр «Первый» каналращ. Лъэпкъым дежкIэ и мыхьэнэр инщ «Черкес ФМ»-м. Ди дахэр, ди макъамэ курыхыр, ди уэрэд нэхъыфIхэр абы утыку къыщрахьэ. ЦIыхубэм фIыуэ яллъагъу Iуэхущ мыр, - жеIэ Идар.

И IэщIагъэр къызэрыхихам, зэрыхуеджам щытедгъэпсэлъыхьым жиIащ зэрыцIыкIурэ гъуазджэмрэ щэнхабзэмрэ зэрыдихьэхыр, абыкIэ щапхъэ езыгъэлъагъу цIыхухэм сытым дежи къызэраухъуреихьыр.

- Си адэшхуэ ХьэфIыцIэ Мухьэмэд и закъуэ срикъунщ щапхъэу, творчествэм и гугъу пщIынумэ. ПечатымкIэ унэм илъэс 14 сызэрыхъурэ сыщыхэгъэрейт. Телевиденэм Вэрокъуэ Софят и гъусэу щезгъэкIуэкIыу щытащ «Къэрабэ» сабий нэтыныр. Шляпэ сщхьэрыгъыу, нэгъуджэ сIулъу сыкъихьэрт… Пэжщ, сигу ирихьырт апхуэдэ лэжьыгъэрт, ауэ зэгуэр ар IэщIагъэ сщIыну, си гъащIэр абы теухуа хъуну си гугъэтэкъым, сиIэтэкъым апхуэдэ мурад.

Си гупсысэр здэщымыIамкIэ сыкъыщыхутами, сыщIегъуэжыркъым. «Сыту фIыщэу зыдгъэпсэхуа!» жаIэу цIыхухэр арэзы хъуамэ, фIыщIэ къытхуащIмэ, мис абы гухэхъуэгъуэ къызет. Апхуэдэ псалъэ гуапэ куэди къыджаIэ. Апхуэдизу гугъу дызыдехьам текIуэда зэманри, гупсысэри, зэфIэкIри псыхэкIуадэ зэрымыхъурщ адэкIэ дыкIуэтэну, щIэщыгъуэ къэдгупсысыну гукъыдэж къыдэзытыр, - жеIэ Идар.

ГъукIакъуэр къэрал куэдым щыIащ. Гъуэгуанэ щIытехьэри дунеяплъэ къудейкъым, абы епхащ и лэжьыгъэри.

- Си лэжьыгъэм куэду къыщысхуосэбэп си зекIуэхэр. Iуэхушхуэ гуэрхэм, концертхэм сокIуэ, соплъ. Сызэплъам щIэщыгъуэу, дахэу хэлъыр си Iуэхум къыщызогъэсэбэп, сэ къызэзгъэпэщхэм апхуэдэхэр хэзагъэрэ-хэмызагъэрэ, цIыхухэр абы дихьэхын – димыхьэхын - куэд зэпызолъыт. Сценэр зэрагъэувыр, экран зэрыфIалъхьэр, уэздыгъэр утыкум зэрытрагъадзэр – абыхэми мыхьэнэшхуэ яIэщ укIэлъыплъыну. ЗэрыхъукIи, сэ сызэлэжьым хуэдэ Iуэхум пэрытхэр зызогъэцIыху, сопсалъэ, иужькIэ дыщызэдэлажьи къохъу, - жеIэ.

Бзэм, къызыхэкIа лъэпкъым щытепсэлъыхькIэ, Идар и гугъу ещI адыгэбзэмкIэ школым щезыгъэджа Щоджэн Iэминат. Игу къегъэкIыж абы и дерсхэм хуэпIащIэу, дихьэхыу кIуэуэ зэрыщытар.

Мы зэманым идар йолэжь проект зыбжанэм. Апэнэнэс Астемыр и концерт Москва щекIуэкIынущ, Абу-Даби щатынущ концертышхуэ, Ани Лорак и концерти ягъэхьэзыр.

-ЗэбгъэхъулIахэмкIэ узыхуэарэзыж? УзыщIэхъуэпсу щытахэм техуэрэ ахэр? - жытIэри деупщIащ Идар.

- Сызыхуэарэзыжщ. Пэжщ, зыкъомыми иджыри сыхуопабгъэ, нэхъыбэ зэзгъэхъулIэну сыхуейщ. Ауэ апхуэдэущ цIыхум зэрызиужьын хуейри, ущIэпхъуэIуэ хъунукъым. ЩыIэщ цIыху и ныбжькIэ жыжьэ дыдэ нэмысами, зыхуейуэ хъуар къехъулIарэ, зыри фIэмыгъэщIэгъуэныжу, мурад хуэмыщIыжу. Ар фIыкъым, мащIэ-мащIэурэ лъагапIэм ухуэкIуэм нэхъыфIщ.