Москва щагъэлъагъуэ

Выставкэм хагъэхьащ а къудамэм и академикхэм, абы хэтхэм я сурэт, скульптурэ, графикэ, декоративно-прикладной гъуазджэм и хьэпшып жыпIэми, лэжьыгъи I00-м нэблагъэ. Къэбэрдей-Балъкъэрым и сурэтыщIхэм ящыщу я лэжьыгъэ абы хагъэхьащ ГъущIапщэ Арсен, КIыщ Мухьэдин, Црым Руслан, Мазло Руслан, Пащты Алим.

БгъэIэпхъуэ хъу выставкэр Дон Iус Ростов, Владикавказ, Ставрополь, Краснодар, Мейкъуапэ къалэхэм щагъэлъэгъуащ. Зи лэжьыгъэ абы хагъэхьахэм ящыщщ Абисалов Юрэ, Алиев Магомед-Алий, Басаев Олег, Бедоев Шалва, Блохинха Валерэрэ Ларисэрэ, Вдовкин Николай, Даудов Магомед, Демкинэ Светланэ, Дзукаев Николай, Дудченкэ Николай, Исаков Сергей, Калманов Алан, Коробейников Виталий, Кузнецов Евгений, Курманаевская Наталье, Магомедов Курбаналий, Мусаев Абдулзагир, Олешня Сергей, Паршин Сергей, Петрухин Алексей, Сивачев Юрэ, Рубец Александр, Умарсултанов Вахид, Усеинов Рамазан, Халафян Акоп, Чаусов Валерэ, Шипилин Игорь.

2008 гъэм дыгъэгъазэ мазэм ХудожествэхэмкIэ Урысей академием и Президиумым унафэ къищтат Урысей Ипщэмрэ Кавказ Ищхъэрэмрэ (Дон Iус Ростов, Краснодар, Ставрополь, Сочэ, Пятигорск, Железноводск, Владикавказ, Мэхъэчкъалэ, Грознэ, Налшык, Элиста къалэхэм щыщ художник нэхъыфIхэр зэкъуигъэувэну. 20I4 гъэм щыщIэдзауэ абыхэм къахыхьащ Кърымым и сурэтыщI Iэзэхэри. Абы лъандэрэ къудамэм и унафэщIщ, щIыналъэм и скульптор Iэзэ, ХудожествэхэмкIэ Урысей академием хэт икIи абы и унафэщI Олешня Сергей. Мы гъэм гъатхэпэм и кIэхэм ХудожествэхэмкIэ Урысей академием и лIыкIуэхэр, абы и унафэщI Церетели Зураб я пашэу, щыIащ Дон Iус Ростов икIи академием и дамыгъэ лъапIэхэмрэ щIыхьыцIэхэмрэ зыхуагъэфэщахэм яритыжащ, абы хагъэхьахэм я цIэ къриIуащ. Академием хэт куэдым щIыналъэхэм я художественнэ еджапIэхэм щрагъаджэ, зэреджэну тхылъхэр къыдагъэкI, мастер-классхэр ирагъэкIуэкI, щIэныгъэ-практикэ конференцэхэм хэтщ, я художественнэ щIэныгъэм зэпымыууэ хагъахъуэу, академическэ школым и хабзэхэр яхъумэу.

Гъэлъэгъуэныгъэр накъыгъэм и 25-рэ пщIондэ щыIэнущ.