Сабийхэм я фIыгъэкIэ

Накъыгъэ мазэщ… Гъэ еджэгъуэр и кIэм ноблагъэ. Класс унафэщIу сызыхэт сабийхэм мы гъэм пэщIэдзэ еджапIэр къаух.   

Бахъсэн къалэм дэт курыт школ №2-м сызэрыщылажьэрэ илъэсым нэблэгъащ. СыпIейтейуэ, лэжьыгъэм сызэрыпэлъэщынум, сабийхэм сазэрыдэгъуэгурыкIуэнум теухуауэ шэч гуэрхэр зыхуэсщIыжу Iуэхум сыпэрыхьами, сызыхыхьа цIыкIухэм, 4-нэ «Б» классым щеджэхэм, я фIыгъэкIэ  егъэджакIуэ IэщIагъэр пэжу къызэрыхэсхар хьэкъ сщыхъужащ. ГъэсэныгъэкIи еджэным хуаIэ бгъэдыхьэкIэкIи дагъуэншэщ мы гупыр. Абы ипкъ иткIэ фIыщIэ хуэсщIыну сыхуейт сэ си япэкIэ мы классыр зыIыгъа егъэджакIуэ Куржы Агнессэ Хьэсэнбий и пхъум. Абы и деж щызолъагъу цIыкIухэм яхэлъ гъэсэныгъэри, еджэным зэрыдихьэхри, апхуэдэу классыр зэрыIыгъыу, зэрылъытэу къызэрызэдэгъуэгурыкIуэри.

 Зы илъэсым къриубыдэу мы цIыкIухэмрэ сэрэ апхуэдизкIэ гъунэгъу дызэхуэхъуащ, дызэсащи, адэкIэ сазэрыдэмылэжьэжынум тIэкIуи сегъэнэщхъей. Классым щIэс дэтхэнэ зы сабийми теухуауэ псалъэ гуапэ схужыIэнущ. Пэжщ, псоми хьэл зырыз яхэлъщ, ауэ дэтхэнэми зыгуэркIэ укъыдахьэх, нэхъыщхьэращи, еджэным къыкIэрыху зыри яхэткъым. КъищынэмыщIауэ, мы цIыкIухэм яхэтщ спорт, макъамэ школхэм кIуэхэри, нэгъуэщI гупжьейхэм екIуалIэхэри. Абы къегъэлъагъуэ а цIыкIухэм заужьыну,  IуэхугъуэщIэхэм зыщагъэгъуэзэну зэрыхущIэкъур. Къыхэгъэщыпхъэщ  абыхэми фIы дыдэу зэрехъулIэр. Зыхэт зэпеуэхэм сытым дежи ехъулIэныгъэхэр щызыIэрагъэхьэу къокIуэкI.

Классыр зэрызутIыпщыр сигу къеуэми, зы еджапIэм дыщыщыIэкIэ, адэкIи дызэрызэрылъагъунум сыщогуфIыкI. Сэлам зэтхыжыркъым, сыт щхьэкIэ жыпIэмэ дэ иджыри куэдрэ дызэхуэзэнущ - сэ шэч къытесхьэркъым а цIыкIухэм адэкIи я дзыхь къызэрызагъэзынуми чэнджэщакIуэ къызэрысхуэкIуэнуми. Си сабийхэр зы илъэскIэ нэхъ балигъ хъууэ аращи, иджыпсту зэрыщытым хуэдэу адэкIи я гур къабзэу, еджэным зэфIэкIхэр щаIэу, зызрапщыт Iуэхухэм ехъулIэныгъэхэр щызыIэрагъэхьэу я гъащIэ гъуэгум ирикIуэну си гуапэщ.

ЛампIэжь Оксанэ.