СурэтыщI гъуазджэхэмкIэ музей Ткаченкэ Андрей и цIэр зезыхьэм япэу щагъэлъагъуэ УФ-м и СурэтыщIхэм я зэгухьэныгъэм хэт, Германием щыпсэу ди хэкуэгъу цIэрыIуэ Хьэжу Мурат и лэжьыгъэхэр.
«Возвращение» зыфIаща гъэлъэгъуэныгъэм хагъэхьа лэжьыгъэкIи ахэр зэригъэхьэзыра IэмалкIи щIэщыгъуэщ. 1995 гъэ лъандэрэ Германием щыпсэу икIи щылажьэ ди хэкуэгъу щIалэр республикэм зэрыхуэзэшыр къигъэлъэгъуащ щэкIым трищIыхьа сурэтхэмкIэ. Выставкэм абы и графикэ лэжьыгъэхэри, анимацэ фильмитIи щегъэлъагъуэ. Абыхэм лъабжьэ яхуищIар цIыхур, дуней псор зыгъэгузавэ Iуэхугъуэхэрщ.
- Мурат и егъэджакIуэ нэхъыщхьэр КъБР-м и цIыхубэ сурэтыщI, и адэ Руслант. Дуней псом и дэнэ щIыпIи уи лэжьыгъэхэм щIэупщIэ зэрыщаIэмрэ зэрыщалъытэмрэ шэч хэлъкъым, ауэ ущалъхуа Къэбэрдей-Балъкъэрым щыпсэухэр псом хуэмыдэу абыхэм дыпоплъэ, - жиIащ Карчаевэ Iэминат. – ДяпэкIи уи IэдакъэщIэкIхэр Налшык къэпшэжыну, абыхэм дыщыбгъэгъуэзэну дыпщогугъ. ЕхъулIэныгъэрэ зэфIэкIрэ уиIэу ущалъхуа щIыналъэм и цIэр дуней псом фIыкIэ щыбгъэIуу упсэуну ди гуапэщ.
КъБР-м и Парламентым ЩэнхабзэмкIэ, граждан жылагъуэм зегъэужьынымрэ хъыбарегъащIэ IуэхухэмкIэ и комитетым и унафэщI Текуев Амырбий выставкэм къекIуэлIахэм лэжьыгъэ щIэщыгъуэхэм еплъыну Iэмал зэраIэмкIэ ехъуэхъуащ. Мурат и IэщIагъэм теухуауэ зэфIэкI зэриIэр къыхигъэщри, абы и адэм, къыщалъхуа щIыналъэм хуэфащэу дунейпсо гъуазджэр дяпэкIи игъэбеину, адэкIи ефIэкIуэну, гукъыдэж иIэу фIыуэ илъагъу IэщIагъэм пэрытыну, и ехъулIэныгъэхэм хигъэхъуэну зэригуапэр жиIащ.
КъБР-м и цIыхубэ сурэтыщI, ХудожествэхэмкIэ Урысей Академием и академик, профессор Пащты Герман къыщыпсалъэм жиIащ Хьэжум и унагъуэр фIыуэ зэрицIыхур икIи республикэм и сурэтыщI куэд гъэлъэгъуэныгъэм къызэрекIуэлIар абы пщIэ къызэрыхуащIым, и IэдакъэщIэкIхэр ягу зэрыдыхьэм зэрищыхьэтыр.
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ тепсэлъыхьащ мы гъэлъэгъуэныгъэм щIэдзапIэ хуэхъуам, Мурат и лэжьыгъэхэр Къэбэрдей-Балъкъэрми щалъэгъуну я нэ къызэрикIыр щриIуэкIым, абы зрилъэфыхьакъым. Къаныкъуэ Жаннэ къызэхуэсахэм гу лъаригъэтащ и адэм и лэжьыгъитIи Мурат мы гъэлъэгъуэныгъэм зэрыхигъэхьам.
СурэтыщI Пащты Алим и гугъу ищIащ Муратрэ абырэ зэрызэдеджам, иужьым ахэр Германием зэрыщызэхуэзэжам. Ар и ныбжьэгъум ехъуэхъуащ и IэнатIэм ехъулIэныгъэ щиIэну, и лэжьыгъэхэр щIэх-щIэхыу Хэкум къишэжыну.
Хьэжу Мурат Налшык къыщалъхуащ. Владикавказ къалэм и художественнэ училищэр къиуха нэужь, 2012 гъэм абы и щIэныгъэм щыхигъэхъуащ Галлэ къалэм ХудожествэхэмкIэ и академием. А еджапIэм «Искусство текстиля» дерсыр студентхэм щригъэджу къэнэжащ. Германием и Лейпциг, Галлэ къалэхэм Мурат и лэжьыгъэхэр щигъэлъэгъуащ. КъищынэмыщIауэ, ар хэтащ Урысейм, Германием, Франджым, Тыркум щекIуэкIа гъэлъэгъуэныгъэхэмрэ фестивалхэмрэ. Зи зэфIэкIым хэзыгъахъуэ сурэтыщIым и лэжьыгъэхэр цIыхухэм щIэщыгъуэ ящохъу, щIэупщIэ яIэщ.
- Сыкъыщалъхуа щIыналъэм си лэжьыгъэхэр щызгъэлъэгъуэныр жэуаплыныгъэ ин зыпылъ Iуэхуу къызолъытэ. Аращ абы зэман нэхъ тезгъэкIуэдэн хуей щIэхъуари. Куэд щIауэ Iэпэдэгъэлэл сщIа, Германием щызэзгъэщIа, зэуэ сыдэзыхьэха тафтинг Iэмалыр къэсщтэжащ мы выставкэм папщIэ, - жеIэ Хьэжу Мурат. – Алэрыбгъухэм щыфлъагъу бгы уардэхэм, щIыуэпс къулейм къризгъэлъэгъуащ Къэбэрдей-Балъкъэрым хузиIэ лъагъуныгъэр. Инсталляцэр, анимацэ фильмыр, щэкIыр щызэхэзухуэна лэжьыгъэми сызэщIишащ. КъызэхъулIэмэ, дяпэкIэ Хэкум си лэжьыгъэхэр щIэх-щIэхыу щызгъэлъагъуэну си мурадщ. Выставкэр къызэзыгъэпэщахэмрэ абы зыкърезыгъэхьэлIахэмрэ фIыщIэ ин фхузощI!
Гъэлъэгъуэныгъэм къыщыпсэлъащ Мурат и Iыхьлыхэр, и ныбжьэгъухэр, лэжьэгъухэр.
