Тхылъ хъумапIэхэм я бжыгъэм къыхагъахъуэ

Къэбэрдей-Балъкъэрым 2025 гъэм къыщызэIуахыну яубзыхуащ модельнэ библиотекитху, «Унагъуэ лъапIэныгъэхэмрэ щэнхабзэм пыщIа Iуэхухэмрэ» федеральнэ Iуэхум и «Унагъуэ» проектым хыхьэу. 
Абы ипкъ иткIэ субсидие зратынухэм я тхылъхэр бадзэуэгъуэм и 28 пщIондэ ягъэхь хъунущ. Новаябибиотека.рф сайтым къыщыхьащ ар зэрагъэхьэзырынум теухуа чэнджэщхэр.
2019 гъэм щыщIэдзауэ муниципальнэ тхылъ хъумапIэхэр модельнэ мардэм тету тхылъкIэ къызэрагъэпэщ. IуэхущIапIэхэм я тхылъ фондхэм къыхагъахъуэ, интернет псынщIэм зыпащIэ, электрон Iэмалхэри къагъэсэбэп мэхъу. Библиотекэхэм я лэжьакIуэхэми я щIэныгъэм хагъахъуэ. 
Дэтхэнэ зы библиотекэми и теплъэр ирагъэфIакIуэ, щIыпIэм и щхьэхуэныгъэр къигъэлъагъуэу. Гулъытэ лей хуащI зи узыншагъэм къимыхьхэр зыхуей-зыщыщIэхэмкIэ къызэгъэпэщыным. 
Къэбэрдей-Балъкъэрым хыхьэ Ислъэмей, Мухол, Каменномост, Лэскэн ЕтIуанэ къуажэхэм, Налшык къалэм дызэрыт илъэсым апхуэдэ библиотекэхэр къыщызэIуахынущ. Жьы хъуа Iэмэпсымэхэр, унэлъащIэхэр зэрахъуэкIынущ, инфраструктурэр ирагъэфIэкIуэнущ. Тхылъ хъумапIэхэм щеджэ и пэшхэр тыншыпIэхэмкIэ, Интернетым пыщIа иджырей компьютер пэшхэмкIэ къызэрагъэпэщынущ. Апхуэдэу щэнхабзэ зэхыхьэхэр, лекцэхэр абыхэм щрагъэкIуэкIыным хуэщIауэ щытынущ. 
Мы Iуэхум хыхьэ программэр ягъэзэщIэн зэрыщIадзэрэ Къэбэрдей-Балъкъэрым иджырей библиотекэу I2 къыщызэIуахащ.