«Урысейр си Хэкущ, аращ абы сыкIуэжыну сыщIыхуейр. Ар си Iыхьлыхэм я адэжь щIыналъэщ. Шереметевхэ я цIэр зезыхьэ центрхэр, хорхэр, оркестрхэр, консерваторэхэр къызэзгъэпэщыну сыхуейщ. Хэкум ухуэщхьэпэныр къалэнщ дэтхэнэ цIыхум дежкIи», - а псалъэхэрщ Урысейм къыщIэIэпхъуэжыну щхьэусыгъуэр къызэригъэлъэгъуар Франджым илъэс куэд хъуауэ щыпсэу граф Шереметев Пётр.
Апхуэдэ хуитыныгъэ къритыну елъэIуу, графым бадзэуэгъуэм и 4-м зыхуигъэзащ УФ-м и Президент Путин Владимир: «ПщIэшхуэ зыхуэсщI Владимир Владимир и къуэ! Граф Шереметевхэ я лъэпкъым и нэхъыжьу щыт сэ си адэм и уэсятыр згъэзащIэу, си лъэпкъыр къызыхэкIа щIым си гъащIэм и иужьрей махуэхэр щесхьэкIыжыну сыхуейщ, - дыкъыщоджэ Президентым и цIэкIэ графым къигъэхьа лъэIум. – Сэ Урысейм срицIыхущ, Лъэпкъ зэныбжьэгъугъэмкIэ орденыр зратахэм сащыщщ, къысхуэна гъащIэм си адэжьхэм я Хэкум щэнхабзэм, тхыдэм, псэкупсэ гъащIэм зыщезгъэужьынум сыщIохъуэпс. Урысейм сынэIэпхъуэжыну сыхуейщ, си мылъкури зэхуэсхьэса хьэпшыпхэри ныздэсшэжу, абыкIэ укъыздэIэпыкъуну сыпщогугъ. ПщIэшхуэ пхуэзыщI граф Шереметев Пётр».
2003 гъэ лъандэрэ урысыбзэмрэ урыс щэнхабзэмрэ Франджым щыпхызыгъэкI графым и Хэку дыдэу къилъытэр Урысейрщ. Урысейм къэIэпхъуэжын гукъыдэжыр Шереметевым къызыхихар и адэм и уэсятырщ. Шереметевым зи гугъу ищI и адэжьхэр адыгэхэми къуэпс быдэкIэ епхащ. Тхылъ куэдым зэтехуэу итщ Черкасскэхэр Къэбэрдейм зэрыщыщыр, Грозный Иван, Идар Темрыкъуэ ипхъу Марие щхьэгъусэ хуэхъуа нэужь, Мэзкуу Iэпхъуэжахэм къатепщIыкIыжауэ. Черкасскэхэм Романовхэри я благъэу щытащ, ахэр пащтыхь унагъуэ хъун ипэ. Зи гугъу тщIы Шереметевхэмрэ Черкасскэхэмрэ зэблагъэщ. Черкасская Иринэ Борис и пхъур Шереметев Фёдор и щхьэгъусэу щытащ. Черкасский Данилэ Григорий и къуэм Шереметевэ Марье Пётр и пхъур щхьэгъусэ хуэхъуат.
Нобэ зи гугъу тщIы графым и цIэджэгъу Шереметев Пётр 1743 гъэм щхьэгъусэ хуэхъуауэ щытащ Черкасская Варварэ Алексей и пхъур. Канцлер Черкасский Алексейрэ абы и щхьэгъусэ Трубецкая Марие Юрий и пхъумрэ япхъу закъуэт Варварэ. И адэ-анэр дунейм ехыжа нэужь, Варварэ и закъуэщ щIэиныр къызыхуэнар. Черкасский Алексей и мылъкур къыхэхъуа нэужь, Шереметев Пётр ейр тIукIэ бэгъуауэ щытауэ жаIэж. А зэманым иджыри къуажэу щыта Останкинэ, Ивановэ хуэдэ щIыпIэхэр, Санкт-Петербург дэт «Мелуан унэ» зыфIаща, Миллионная уэрамым тетар, Мэзкуу хыхьэ Сухаревкэ хьэблэу «Черкасскэхэм я хадэхэр» зэрытар, къинэмыщIхэр ей хъуат.
Черкасскэхэм я тхыдэ хъыбар мызэ-мытIэу тетащ ди газетым. Ахэр дигу къыщIэдгъэкIыжын щхьэусыгъуэ къыдэзытар «адыгэ малъхъэхэм» я щIэблэр къэралым къызэрыIэпхъуэжырщ.
