Литературэм епха нэтынхэр нэхъ фIэфIщ

Джыназ Заремэ Къэбэрдей-Балъкъэрым и урысей радиом хъыбарыщIэхэмкIэ къудамэм щолажьэ, адыгэбзэкIэ нэтынхэр ирегъэкIуэкI. Ар Къэбэрдей-Балъкъэр къэрал университетым экономикэм щыхуеджащ. Ауэ а IэщIагъэм ирилэжьакъым, радиом ехъуапсэрти, къехъулIэмэ еплъыну уващ икIи и псэм дыхьауэ IэнатIэм пэрытщ. Заремэ езыр адыгэпсэщ, лъэпкъым епха Iуэхугъуэхэр утыку кърехьэ, адыгэм къыдекIуэкI гупсысэкIэр цIыхубэм я деж негъэс радиом и фIыгъэкIэ. IэнатIэм зэрыпэрыта илъэсхэм къриубыдэу къехъулIахэм, игу хэзыгъахъуэхэм, нэхъ зэгугъухэм ятеухуа ди упщIэ зыбжанэм къыпэджэжащи, щIэджыкIакIуэхэм дывдогуашэ.

- Радиом ущылэжьэныр щхьэ къыхэпхат?

- Сызыхуеджар экономикэр арами, сытым дежи литературэрщ сыдэзыхьэхыу щытари щытри. Тхьэм апхуэдэу зэхуигъэхъуауэ къысщохъу, си лэжьыгъэкIэ литературэм сыщрипхым. Радиор си Iэпэгъут, нэхъыфIу слъагъу нэтынхэр щекIуэкI зэманхэр гукIэ сщIэрти, зытезгъахуэурэ седаIуэрт. ЖыпIэнурамэ, къысхуэмыгъэсу сыпэплъэрт.

Радиор си къэухьым зезыгъэубгъуахэм ящыщ зы Iуэхугъуэщ, къапщтэмэ. ГъащIэм и лъэныкъуэ куэдым тIэкIу-тIэкIу хэпщIыкI уещI абы, дунейм щекIуэкIхэми Iэмал имыIэу ущыгъуазэщ, уи лэжьыгъэр абы щепхакIэ. Радиом дунейр нэхъ щIэщыгъуэ ещI ипэжыпIэкIэ, абы къекIуалIэ ди хьэщIэхэми псэ лъахэ зырызыххэ яIэщ, гупсысэкIэ къулейуэ.

Интернетым и зэранкIэ ди зэманым цIыхухэр я теплъэкIи, гупсысэкIи, Iуэху еплъыкIэкIи, псэлъэкIэкIи зэщхь хъууэ къысфIощI. Ди лъэпкъым лIэщIыгъуэкIэрэ зэтригъэува хабзэ-нэмысыр абы игъэкIуэдынкIэ шынагъуэ щыIэщ. Си фIэщ хъуркъым абы и лъэныкъуэкIэ интернетым фIы къытхудэкIуэну.

- Сыт хуэдэ нэтынхэр бгъэхьэзырыну нэхъ пфIэфI?

- Радиом сызэрыщыIэрэ нэтын зэмылIэужьыгъуэхэм яужь ситащ, ауэ сигу нэхъ къыдыхьэр литературэм епхарщ. ЛъэпкъыбзэкIэ лажьэ радиожурналистхэм гулъытэ хэха хуащI анэдэлъхубзэр хъумэным. Нобэ бзэм и Iуэхур нэхъ дыкъэзыгъэгузавэхэм ящыщщ. Ар ди жагъуэщ. Дэ радиом къыдит Iэмалхэр къыдогъэсэбэп анэдэлъхубзэр хъумэным ди сэбэп хэтлъхьэн папщIэ. Ди лъэпкъым къызэринэкIа тхыдэм теухуа нэтынхэр диIэщ. Ахэр къыдэдаIуэхэм нэхъ ягу дыхьэхэм ящыщщ икIи щIэх-щIэхыурэ къыподжэжхэр.

- Лэжьыгъэм упэрытыну гукъыдэж къозытыр сыт?

- Гукъыдэж къызэзыт Iуэхугъуэхэм ящыщщ цIыху щыпкъэ куэдым сазэрыIущIэр, гупсысэ щIэщыгъуэхэр зиIэхэр къызэрысцIыхур. Абы псэр нэхъ бей ещI.

- Уадыгэным къикIыр…

- СэркIэ уадыгэным къикIыр уи бзэр пIурылъу, уи лъэпкъ хабзэр зепхьэжу, уи тхыдэм ущыгъуазэу, емыкIур зищIысыр пщIэуэ дунейм утетынырщ.