Кулиевым и фэеплъыр ягъэувыж

Тырку Республикэм и къалащхьэм – Анкара – куэд мыщIэу щагъэувынущ балъкъэр уса­кIуэ, Лениным и саугъэтыр, РСФСР-м Горький и цIэкIэ щагъэува Къэрал саугъэтыр зы­хуагъэфэщауэ щыта Кулиев ­Къайсын и фэеплъыр. А зэIущIэм хэтыну жаIэ тырку къулыкъущIэхэр, унафэщIхэр, щэнхабзэм и лэжьакIуэхэр, ди щIыналъэм икIыну гупыр.

Фигу къэдгъэкIыжынщи, 2019 гъэм Анкара и Кечиорен хьэблэм къыщызэIуахауэ щытащ балъкъэр усакIуэм и цIэр зыфIаща аллеер икIи абы щагъэуват Налшык щыщ сурэтыщI цIэрыIуэ Ахматов Леуан Кулиевым хуищIа фэеплъыр. А махуэшхуэм кърихьэлIат щIыпIэ администрацэм и унафэщIхэр, тырку щэнхабзэм и дунейпсо жылагъуэ зэгухьэныгъэм хэтхэр, къалэдэс­хэр. Илъэси 5 дэкIауэ, домбеякъ фэ­еплъым чэзэп (кислота) къра­кIых­ри, тетха усэ сатырыр ягъэсащ, иужьыIуэкIэ езыр ядыгъуащ.
Ар хэIущIыIу хъуа нэужь, балъкъэр усакIуэ, «Минги Тау» литературэ журналым и унафэщI До­дуев Аскэр тхащ Урысей Федерацэм и ТхакIуэхэм я зэгухьэныгъэм икIи щIэлъэIуащ Iуэхур зэ­хагъэкIынымкIэ, фэеплъыр щIэ­­рыщIэу ягъэувыжынымкIэ сэбэп къахуэхъуну. 
Зэгухьэныгъэм и унафэщIхэм Тырку Республикэми тхыгъэкIэ зыхуагъэзащ, зэрызэгурыIуам тетуи, фэеплъыр Ахматовым щIэ­рыщIэу ищIыжащ, икIи ар щэкIуэгъуэм и 19-м Анкара нашэсу нэ­гъуэщI аллеем деж щагъэувыну яубзыхуащ. 
- Фэеплъыр къызэгъэпэщы­жы­ным, ар гъэувыным текIуэдэну мылъкур тырку лъэныкъуэм и пщэ дилъхьащ. Килограмм 60 хъу домбеякъ сурэтыр Кечиорен тшэ­уэ дгъэувыну ди пщэ къыдалъ­хьащ Къэбэрдей-Балъкъэрым икIыну гупым. Абы хэтынущ Кулиевхэ я лъэпкъым я нэхъыжьу Малик, Мисадинов Расул, Ахматов Леуан, сэ, - жиIащ До­дуевым.
ЗэрыхуагъэфащэмкIэ, бзаджащIэхэм ягу иримыхьар япэрей фэеплъым тетаращ: «ЦIыхубэр фIыуэ плъагъуну тыншщ, уи гъу­нэгъур фIыуэ лъагъуф». Иджы фэеплъым традзэну ягъэ­лъэгъуа къыхуеджэныгъэхэм яхэдэри, къыхахащ: «Сыт хуэдэу цIыкIуу си лъэпкъыр щытми, си япэ куэдрэ ирырет» сатырыр. Ар Кулиевым и фэеплъым тетынущ урысыбзэкIи, балъкъэрыбзэкIи, тыркубзэкIи.