ГущIэгъу зыхэлъыр гу къабзэрщ

«ЦIыхур къыбгурыIуэныр фIыгъуэшхуэщ, а хьэл дахэр зыхилъхьэныр къызэхъулIэр Iиман зыбгъэдэлъхэрщ. Ар зыхэзымылъхьэфри насыпыншэу аращ. Умыпсэлъэххэу, гукIэ узэгуроIуэ цIыхур щызэхэпщIыкIым деж. Ар уи ныбжьэгъу, уи гъунэгъу, уи адэ, уи анэ, уи щхьэгъусэ, уи бын ирехъу. Щыхуэныкъуэм деж укъызэригъуэтынур ищIэу, уи напэм узэрихуэу, гузэвэгъуэ хэхуам къарукIи, мылъкукIи, псапэкIи зыщIэбгъэкъуэнырщ гущIэгъу хъужыр. Гъунэгъум гъунэгъугъэкIэ, благъэм благъагъэкIэ, ныбжьэгъум ныбжьэгъугъэкIэ, узыхэтхэм щхьэж езым зэрыхуэфащэм елъытауэ, уабгъэдэту», - жеIэ Шэджэм етIуанэм дэт мэжджытым и Iимам ХъуэкIуэн Арсен. Абы и мэрем хъутIбэр теухуат муслъымэным гущIэгъу зэрыхэлъыпхъэм.

- Iухьуд зауэр иуха нэужь, Бегъымбар лъапIэу щэлатымрэ сэламымрэ зэхам гу лъитащ Алыхьыр арэзы зыхуэхъун Iэбдулыхь и къуэ Джабир егъэлеяуэ зэрынэщхъейм. «Уа Джабир! Сыт мыпхуэдизу узэтезыкъутар, ущIыхэплъэр, узыгъэгузавэр?» - еупщIащ абы ЛIыкIуэ лъапIэу щэлатымрэ сэламымрэ зэхар.

«Уа Алыхьым и ЛIыкIуэ, - жэуап къритащ Джабир. - Си адэр шэхьид хъуащ, си шыпхъуибгъур къысхуэнащ, унагъуэри си адэм и щIыхуэхэри си пщэм къыдэхуащ».

«НтIэ, уи адэр Алыхьталэм зэрыхуэзам и хъыбарымкIэ узгъэгуфIэн?» - къеупщIащ Бегъымбар лъапIэу щэлатымрэ сэламымрэ зэхар. «Ахьей, сыгъэгуфIэ», - жеIэ Джабир.

«Дунейм ехыжа псоми Алыхьталэр къызэрепсалъэр Iупхъуэ щIыбагъым къыдэтущ. Ауэ уи адэмрэ Алыхьымрэ я зэхуакум Iупхъуи дэмылъу, лIыкIуи дэмыту, зэхуэзащ. «Уа си пщылI! УзыщIэхъуэпс дыдэр жыIэ, пхуэсщIэнущи», - апхуэдэу зыкъыхуигъэзащ Алыхьу Лъагэм уи адэм. «Уа ди Тхьэ! Сэ сызыщIэхъуэпсыр иджыри зэ сыкъэбгъэпсэужу, Уи цIэкIэ Уи диным си псэр щIэстыныр аращ», - апхуэдэ жэуап иретыж. «Сэ си унафэр зэрыщытыр мыпхуэдэущ: зэ дунейм ехыжам абы игъэзэжынукъым», - къритащ жэуап Алыхьышхуэм».

Абы щыгъуэщ къыщехар шэхьидхэм ятеухуа Iэятыр: «Алыхьым и диным щIэбэну къаукIахэр лIауэ къэвмылъытэ. Ахэр псэущ, я Тхьэм деж ерыскъы къыщрату щыIэхэщ».

ДинкIэ си къуэш лъапIэхэ! НэгъуэщIым и гузэвэгъуэр зыхэпщIэныр, цIыхур зэхэпщIыкIыныр игъащIэми бегъымбархэм я хьэлу, я гъуэгуу щытщ. А хьэл дахэр къызыхэкIыр сыт жыпIэмэ, цIыхум и Iиманращ. Ар зыхэзылъхьэфыр зи гум гущIэгъу илъ цIыху щабэхэрщ. Нобэ хуабжьу дыхуэныкъуэщ Алыхьым и сэламыр зылъысын Бегъымбар махуэм и псалъэхэм: «МыIуминхэр, Iиман къэзыхьахэр, гущIэгъу яхэлъу, зыр адрейм хуэщабэу, зым адрейр фIыуэ илъагъуу зэбгъэдэтхэр зы Iэпкълъэпкъым ещхьщ». Зыгуэр зыщIыпIэ деж къыщыхэузыкIмэ, зэрыIэпкълъэпкъыу мэуз, пщтыр хъууэ е жейм емызэгъыу. Зы лIым и бынхэм апхудэу иригъэщхьащ ЛIыкIуэ лъапIэм и Iумэтыр.

Джабир и хъыбарым дгъэзэжмэ, Бегъымбар лъапIэу щэлатымрэ сэламымрэ зэхар къыщIэупщIа нэужь, езыри абы нэхъ гъунэгъу хуэхъуауэ щытащ. Джабир къеIуэтэж: «Си адэр хэкIуэда нэужь, си шыпхъухэри си адэм и щIыхуэхэри къысхуэнати, зи щIыхуэ ттелъхэм я деж сыкIуэри, схуагъэIэпхъуэну селъэIуащ, ауэ зыми идакъым. ИтIанэ Алыхьым и ЛIыкIуэу щэлатымрэ сэламымрэ зэхам деж сыкIуэри, ари езгъэлъэIуащ, ауэ абыи къыхуадакъым ягъэIэпхъуэну. (ЩIыхуэр хъурмэкIэ итыжын хуейуэ арат, иIэр мащIэ дыдэт). Бегъымбар лъапIэм мыр къызжеIэ: «Уи хъурмэхэр лIэужьыгъуэ-лIэужьыгъуэкIэ зэхэдз. Абы иужькIэ щIыхуэ зэптыжын хуейхэм къеджэ, сэри сынэкIуэнщи, абдеж щеттыжынщ».

ЗэрыжиIам хуэдэу, хъурмэхэр самищу зэтескIутащ, лIэужьыгъуэкIэ зэхэздзщ, щIыхуэ зэстыжын хуейхэм сакъеджэри, Алыхьым и сэламыр зылъысын ЛIыкIуэ лъапIэри къэкIуащ. Хъурмэхэм бгъэдэтIысхьэщ, духьэ ищIри, ахэр къыщIигъалъэурэ, яритыжын щIидзащ. КъыIухьэм иритыжым иритыжурэ, а згъэтIылъам зыри хэмыщIу, я щIыхуэхэр естыжри, абдеж щылъар зэрызгъэтIылъам хуэдабзэу щылъу, зэбгрыкIыжахэщ».