Лъэныкъуэ куэд къызэщIаубыдэ

Лъэпкъ щэнхабзэмкIэ «ЩIэин» студент зэгухьэныгъэщIэ къыщызэIуахащ КъБКъУ-м ЩэнхабзэмкIэ и центрым, Темыркъан Хьэту и цIэр зезыхьэм. Абы хэт щIалэгъуалэм зыкъыщагъэлъэгъуащ пшыхьым икIи дэтхэнэми и лъэпкъ щэнхабзэмрэ фащэмрэ утыку кърихьащ.

ЗэгухьэныгъэщIэм и мурад нэхъыщхьэр зыхуэунэтIар студент щIалэгъуалэм лъэпкъ хабзэхэм фIыуэ хащIыкIынырщ, ар хэIущIыIу щIынырщ, щэнхабзэ щIэиныр хъумэнырщ.

Пшыхьым республикэм ис лъэпкъхэм я хабзэхэм, щэнхабзэ щхьэхуэныгъэхэм ятеухуа упщIэхэм жэуап щратащ. Абы дэтхэнэми Iэмал къритащ и щIэныгъэр къипщытэну, щIэ куэд къащIэну.

 Клубыр къызэгъэпэщыныр Урысейм ис лъэпкъхэм я зэкъуэтыныгъэм и илъэсым ирагъэхьэлIащ икIи ди щIыналъэм щыпсэухэм я хабзэхэмрэ зэгурыIуэныгъэмрэ гъэбыдэным хуэгъэпсащ.