Тхыдэм и хъумакIуэ

 Кыщпэк къуажэм и школым, КъБР-м и япэ президент КIуэкIуэ Валерэ и цIэр зезыхьэм и тхыдэ-лъахэхутэ музейм, тхыдэ хьэпшып куэд щахъумэ.

2012 гъэм къызэIуаха музейм и унафэщIыр библиотекэм и лэжьакIуэ, егъэджакIуэ Гуэщокъуэ Таещ. Гъэсэныгъэ мыхьэнэ зиIэ IуэхущIапIэр къуажэм, школым, республикэм, хэкум я тхыдэр джынымкIи щхьэпэщ. Абы щахъумэ хьэпшыпхэм къахохъуэ егъэджакIуэхэм, ныбжьыщIэхэм, къуажэдэсхэм я фIыгъэкIэ.

 Курыт еджапIэм и унафэщI Балъкъэр Дадусэ зэрыжиIэмкIэ, музейр еджакIуэхэм я хэкупсэ зыужьыныгъэм толажьэ.

 - ЦIыхум Хэкур зэрилъытэм и щIэдзапIэщ унагъуэм, анэдэлъхубзэм, лъэпкъ тхыдэм хуиIэ лъагъуныгъэр, - жеIэ Балъкъэр Дадусэ. -  Школ музейм нэхъыжьхэмрэ ныбжьыщIэхэмрэ я зэпыщIэныгъэр нэхъри егъэбыдэ, я къуажэгъухэм я зэфIэкIымрэ лIыгъэмрэ сабийхэр ирогушхуэ. НыбжьыщIэхэм я унагъуэр, я Iыхьлыхэр я щапхъэу тхыдэр щаджкIэ, абыхэм зэрахуэфэщэным хущIокъу. Музейм иIэщ «Летопись школы», «Предметы быта», «Ими гордится наше село», «Моя малая родина», «Моё Отечество», «Они сражались за Родину», «В жизни всегда есть место подвигу» Iыхьэхэр.  Абы щызэхуэхьэсащ хьэпшып минищым щIигъу. Апхуэдэщ лъэпкъ фэилъхьэгъуэхэр, Хэку зауэшхуэм и ветеранхэм я орденхэмрэ медалхэмрэ, фронтым къратхыкIа письмохэр, сурэтхэр. Ахэр къагъэсэбэпурэ еджакIуэхэм ягъэхьэзыр «История села Кишпек», «История школы в лицах», «Наши земляки», «Защитники Отечества», «Книга памяти»,
къэхутэныгъэ лэжьыгъэ гъэщIэгъуэнхэр.

 Нэгъабэ школым и тхыдэ-лъахэхутэ музейм къыщыунэхуащ «Беспилотники» Iыхьэр. Ар къызэрагъэпэщащ курыт еджапIэм щеджахэм ящыщу дзэ Iуэху хэхам къулыкъу щызыщIа щIалэхэм. Абы хагъэхьащ дзэ Iуэху хэхам къыщагъэсэбэп иджырей Iэмэпсымэхэр. Сабийхэр щагъэгъуэзащ дзэ къулыкъур зыхуэдэм, дронхэр зэрышынагъуэр, зауэлIхэм я лIыгъэм. Музейм ЛIыхъужьыгъэм, тхыдэм, лъахэхутэм я дерсхэр, зауэм и ветеранхэм я зэIущIэхэр, щIэныгъэ конференцхэр къыщызэрагъэпэщ.

Школым и хьэщIащ Урысей МВД-м и лэжьакIуэ, УФ-м и ЛIыхъужь Костоев Iэбубэчыр, УФ-м IэщэкIэ ЗэщIэузэда и Къарухэм я полковник, УФ-м и ЛIыхъужь Корольков Аркадий, совет, урыс лэжьакIуэ, запасым и генерал-майор, УФ-м и ЛIыхъужь Тулин Сергей, афган зауэм хэта, генерал-майор Солуянов Александр, УФ-м щIыхь зиIэ и дзэ кхъухьлъатэзехуэ, снайпер, полковник, Урысейм и ЛIыхъужь Алимов Владимир, УФ-м и ЛIыхъужь, кхъухьлъатэзехуэ-космонавт Тарелкин Евгений.

 Кыщпэк къуажэм и тхыдэ-лъахэхутэ музейр щытекIуащ еджакIуэхэм я хэкупсэ гъэсэныгъэ лэжьыгъэ къызэгъэпэщыным теухуа республикэ зэпеуэм. «Школьный музей – взгляд в будущее» урысейпсо зэпеуэм нэхъыфIу къыщалъыта школ 50-м ящыщ хъуащ. Абы хэтащ къэралым и щIыналъэ 76-рэ. Школым и унафэщI Балъкъэр Дадусэ фIыщIэ тхылъ къыхуагъэфэщащ школ музейм зэрызригъэужьым, «Школьный музей Победы» урысейпсо Iуэхум зэрыхэтым, щIэблэм я хэкупсэ гъэсэныгъэм хэлъхьэныгъэ зэрыхуищIым папщIэ. Абы и лэжьэгъухэр къыхуреджэ школхэм музейхэр къыщызэIуахыну, яхъумэну, зрагъэужьыну.

 ТЕКIУЖЬ Заретэщ.