2026 гъэм фокIадэм и 11-м къыщыщIэдзауэ и 17 пщIондэ Екатеринбург щызэхэтынущ «ЩIалэгъуалэмрэ сабийхэмрэ» лъэпкъ проектым ипкъ иткIэ къызэрагъэпэщ ЩIалэгъуалэм я дунейпсо фестивалыр. Ар егъэкIуэкIыным теухуа унафэм Урысей Федерацэм и Президент Путин Владимир Iэ щIидзащ 2025 гъэм дыгъэгъазэм и 29-м. Къызэзыгъэпэщыр ЩIалэгъуалэм я IуэхухэмкIэ федеральнэ агентствэмрэ (Росмолодежь) Свердловск областым и Правительствэмрэщ. Абыхэм я дэIэпыкъуэгъущ ЩIалэгъуалэм я дунейпсо фестивалым и дирекцэр.
Абы хэтынухэр ятхын зэрырагъэжьар и телеграм-каналым щыжиIащ КъБР-м щIалэгъуалэм я IуэхухэмкIэ и министр Лу Азэмэт икIи ди республикэм щыщ ныбжьыщIэхэр хэтыну къыхуриджащ.
Фестивалыр екIуэкIынущ «Уи хъуэпсапIэр зыIэрыгъэхьэ. Урысейм и гъусэу» къыхуеджэныгъэм щIэту. Ар дунейпсо зэпсэлъэныгъэхэм, щэнхабзэ щхьэхуэныгъэхэмкIэ зэхъуэжэным, лъэпкъхэм яку дэлъ зэныбжьэгъугъэр гъэбыдэным и утыку хъуну хуагъэфащэ. Зэхыхьэм зэкъуигъэувэнущ дуней псом щыщ ныбжьыщIэ акъылыфIэхэр икIи къигъэлъэгъуэнущ иджырей Урысейм - хъуэпсапIэхэмрэ мурадхэмрэ проект телъыджэу гъащIэм щыхапщэф, ехъулIэныгъэфIхэр щызыIэрыбгъэхьэф къэралым - и зэфIэкIхэр.
Фестивалым хэтынущ къэрали 190-м щыщ щIалэгъуалэу мини 10, абыхэм ящыщу мини 5-р ди къэралым, мини 5-р хамэ щIыпIэхэм щыщщ. Мы бжыгъэм щыщщ зи ныбжьыр илъэс 14-м къыщыщIэдзауэ 17-м нэс ныбжьыщIэхэри. Сабийхэм я программэр зэхалъхьэнущ «Пашэхэм я зэщIэхъееныгъэ» зэгухьэныгъэмрэ «Зэчиймрэ ехъулIэныгъэмрэ» егъэджэныгъэ фондымрэ.
Зэхыхьэ иным и утыку нэхъыщхьэу щытынур 2026 гъэм и пэщIэдзэм Урысейм и Президент Путин Владимир къызэIуиха Урал федеральнэ университетым и кампусымрэ фестивалыр къыщызэIуахыну «Екатеринбург-Экспо» дунейпсо гъэлъэгъуэныгъэ центрымрэщ. ЩIалэгъуалэм я дунейпсо фестивалу 2024 гъэм екIуэкIам кърикIуахэм тригъэгушхуауэ, къызэгъэпэщакIуэхэм Екатеринбург къыщызэIуахынущ «Дунейпсо щIалэгъуалэм я къалэ». Щэнхабзэ, жылагъуэ зэхыхьэхэр, концертхэр, гъэлъэгъуэныгъэхэр фестиваль утыкухэм я мызакъуэу, къалэ псом щекIуэкIынущ.
Фестивалыр адрейхэм емыщхь ещI хамэ къэралхэм къикIыну лIыкIуэхэр зыпэрыт IэнатIэхэр убзыхуауэ зэрыщытым. Урысейм къэкIуэнущ креатив индустриехэм, къэрал управленэм, щIэныгъэмрэ егъэджэныгъэмрэ, спортым, хьэрычэт Iуэхум, медиам, IT-м, социальнэ IэнатIэм я лIыкIуэхэр. ЩIалэхэмрэ пщащэхэмрэ къапоплъэ зэпсэлъэныгъэ купщIафIэхэр, мастер-класс гъэщIэгъуэнхэр, тренингхэр, спорт зэпеуэхэр, зыплъыхьыпIэхэр, гъэлъэгъуэныгъэхэр. УвыпIэ хэха иIэнущ ди къэралым и щIыналъэхэм я технологие, инновацэ пэрытхэр утыку къыщрахьэну «Урысейм и ехъулIэныгъэхэм я гъэлъэгъуэныгъэми».
Зэхуэсым волонтёр мини 2 щылэжьэнущ, ахэр хьэщIэхэм ядэIэпыкъунущ унэтIыныгъэ 17-кIэ - къыщыувыIэну щIыпIэмрэ аккредитацэмрэ къыщыщIэдзауэ контент къызэгъэпэщыным нэсыху.
Программэ нэхъыщхьэр зэфIэкIа нэужь, цIыху мин бжыгъэхэр Урысейм и щIыналъэ 30-м, Абхъаз Республикэм зыплъыхьакIуэ кIуэну Iэмал яIэнущ. ЩIалэгъуалэм Урысейм и щIыуэпс, щэнхабзэ щIэинхэм зыщагъэгъуэзэнущ, щыпсэу лъэпкъхэр зрагъэцIыхунущ, къэралым и нобэрей ехъулIэныгъэхэр я нэкIэ зэрагъэлъагъуфынущ.
Урысейм и лъэпкъхэм я зэкъуэтыныгъэм и илъэсым ЩIалэгъуалэм я дунейпсо фестивалыр цIыхубэр, псом хуэмыдэу зи щIалэгъуэхэр, зэкъуэзыгъэувэ Iуэхугъуэ хъунущ, ди къэралым ис лъэпкъхэм я щэнхабзэ зэмылIэужьыгъуэхэмрэ псэкупсэ къулеягъымрэ и лъабжьэу.
Фестивалым хэтыну хуейхэм я лъэIу тхылъ тхылъыр 2026 гъэм гъатхэпэм и 3I пщIондэ Добро.рф платформэм иралъхьэн хуейщ.
