Мывэхэм я щэхур

20 марта, 2026 - 12:11
ДыщыцIыкIум дэтхэнэ зыми мывэкIэщхъхэр зэпытплъыхь ди хабзэу щытагъэнщ, налкъутналмэс къызыщыдгъэхъуу, цIыхум, псэущхьэм я теплъэм едгъэщхьу, дэтхэнэ мывэми мэгъу къару гуэр къапкърыкIыу къытщыхъуу. 
Тенджызым апхуэдэхэр щызэхуэпхьэсыныр гукъинэж дыдэт. Къуршэ Хъусени зэрыцIыкIурэ Бахъсэн псы Iуфэм къыщигъуэту щытащ нэгъуэщIхэм емыщхь мывэ хьэлэмэтхэр. Иджы абы псыежэх мывэхэм скульптурэ телъыджэхэр къыхещIыкI. 
Тхыдэм дриплъэжмэ, сурэтыщI гъуазджэм и Iэмал нэхъ пасэ дыдэхэм ящыщщ мывэм къыхабзыкIыу зэрыщытар. ЦIыхубэм къыдэгъуэгурыкIуэ а IэпщIэлъапщIагъэм и щIэщыгъуагъэр ноби кIуэдакъым, ар зыхъумэ закъуэтIакъуэхэм ящыщщ зи гугъу тщIы Къуршэ Хъусен. ХьэтIохъущыкъуей къуажэм къыщалъхуа IэпщIэлъапщIэм къиухащ политехникэ техникумымрэ мэкъумэш университетымрэ. Ауэ и зэчийм зыкъызэрыкъуихрэ куэд дыдэ щIауэ пхужыIэнукъым - илъэсипщI къудейщ.
Мывэхэр зэхуэхьэсыным къызэрымыкIуэу дихьэх, абыхэм гъуазджэм и теплъэ къыхэзыщIыкIыф IэпщIэлъапщIэм «Мывэхэм я щэху къэстIэщIахэр» зыфIища и гъэлъэгъуэныгъэми цIыхухэр хигъэплъащ, и IэдакъэщIэкIхэр скульптурэ къудейуэ зэрыщымытыр, атIэ IэпщIэлъапщIэмрэ щIыуэпсымрэ зэпыщIэныгъэ быдэ зэрызэхуаIэр нэрылъагъу ящищIу. 
IэмыщIэм ихуэну мывэхэр IэпщIэлъапщIэм «къигъэпсэу» хуэдэу къыпфIощI, тхыдэ мыхьэнэ яхыболъагъуэ. Псэущхьэхэри, къэгупсыса пасэрей хьэкIэкхъуэкIэхэри, къэкIыгъэхэм я тхыпхъэщIыпхъэри - псори IэкIуэлъакIуэу мывэм треIущIыкI.  
Къуршэм мывэм къыхибзыкIа и лэжьыгъэхэр щэм ноблагъэ. СурэтыщIым псэущхьэхэм къищынэмыщIа, нэхъыбэу къигъэлъагъуэр цIыхухэрщ. Абы къегъэсэбэп зэгуэчыпIэ зиIэ мывэ къутахуэхэри.
Абы и Iэзагъэм укъегъэуIэбжь, мывэ цIыкIум цIыхум и нэкIур, и теплъэр апхуэдэу IупщIу къыхэббзыкIыфыныр бгъэщIагъуэу. Искусствовед Леонтьевэ Нинэ гу зэрылъитащи, Къуршэм и IэдакъэщIэкIхэм япэу ущеплъкIэ пасэм щыIа гъуазджэм ухашэ. Апхуэдэщ «Зи нэгу щIэкIахэр», «Мысыр», «Карфаген пащтыхь», «Хуабэрэ щIыIэрэ» лэжьыгъэхэр (иужьрейм къыщигъэлъэгъуащ африкэ бзылъхугъэм и теплъэр). 
И сурэтхэр Къуршэм мывэ «гупэм» трещIыхь, и Iэпэгъур гъущI къэрэндащрэ джафэ зэрищI тхылъымпIэрэщ. Апхуэдэу цIыхумрэ щIыуэпсымрэ «зэдолажьэ», зэгуэр псыежэххэмрэ тенджызхэмрэ щызэхуихьэса мывэхэм лэжьыгъэ телъыджэхэр иджы къыхищIыкIыу. Хъусен зэрыжиIэмкIэ, и лэжьыгъэм гушхуэныгъэ къыхелъхьэ, дэтхэнэми и теплъэр зыхуэдэ хъунур езы мывэхэм хелъагъуэ. 
БАГЪЭТЫР Луизэ.
  • 15 просмотров
Поделиться:

Читать также:

19.04.2026 - 11:00 → Лианэ и IэрыкIхэр
19.04.2026 - 10:00 → Тетащ дунейм нэфIэгуфIэу
16.04.2026 - 14:37 → Хабзэрмрэ бзэмрэ и гъуазэу
15.04.2026 - 16:38 → Телъщ ар ноби ди напщIэ
13.04.2026 - 14:52 → КъэхъукъащIэхэм пэджэжу