Телъщ ар ноби ди напщIэ

15 апреля, 2026 - 13:38
Къэбэрдей-Балъкъэрым и цIыхубэ тхакIуэ Нало Ахьмэдхъан Хьэмырзэ и къуэр пщIэрэ щIыхьрэ зыпылъ гъуэгуанэ купщIафIэ къызэзынэкIа цIыху щэджащэщ. Абы и IэдакъэщIэкIхэм лъэпкъ литературэм увыпIэ щхьэхуэ щаубыд, щIэблэр егъэджэнми щиIа зэфIэкIыр мащIэкъым. Дуней тетыкIэ дахи зиIа цIыхущ ар, зыхэтым фIыкIэ къахэщрэ нэхъыщIэм щапхъэ яхуэхъуу. Налор зыцIыхуу щытахэм абы теухуа гукъэкIыж гъэщIэгъуэнхэр яIэщ. Апхуэдэ зы теплъэгъуэщ къыщыгъэлъэгъуар КъБР-м и спортым ветеранхэм я советым и унафэщI Къуэдзокъуэ Анатолэ и тхыгъэм.
 
«Нало Ахьмэдхъан сэри адрей Хьэтуей щIалэхэми щапхъэ къызытетх щIа¬лэжьу щытащ, нобэми ар ди напщIэм телъщ. Орден лъапIэ дыдэхэр къихьарэ фащэ дахэр екIуу щыгъыу Хэку зауэшхуэм ар къы¬зэрикIыжауэ щытар  иджыри си нэгум щIэтщ.
  А зэманым куэдым тхьэлъэIу ящIыжырт, къашэ-нашэхэри куэдти, ди къуажэшхуэм дэнэкIи пшынэ макъыр къы¬щы¬Iурт. А хьэгъуэлIы¬гъуэ¬хэм кърихьэлIэрт зауэм жыджэру хэтахэу Бетрожь Мишкэ, Биту Нурхьэлий, Мамхэгъ Би¬лъостэн, Къанщыкъуей Уэхьид, Былымгъуэт СулътIан, ГуэбэщIыкI ПIытIэ (Умар), ХьэщIэлI Iэмин, Нот Хъусен, Iэщ¬нокъуэ Назир, Нало Ахьмэдхъан сымэ. Абыхэм я дуней тетыкIэр, я къэфэ¬кIэр, я гушыIэкIэр псоми яфIэдахэт. Дэри абыхэм зедгъэщхьу, «Ахьмэдхъану сыкъофэ, прокурору сыкъофэ» жытIэу утыкум дитт. 
Ауэрэ зэманыр макIуэ, балигъ дыкъохъу. Ахьмэдхъан пщIэншэу зы сыхьэти игъэкIуэдыркъым, пед¬институтыр къеух, университетым егъэджакIуэу къагъанэ, кандидат диссертацэри пхегъэкI. Псом нэхърэ нэхъыщхьэращи, зи IэдакъэщIэкIхэр щIэджыкIакIуэхэм гунэс ящыхъу цIыхубэ тхакIуэ мэхъу. 
Си щхьэкIэ сэ ар сэбэпышхуэ къысхуэхъуащ, си цIыху хэтыкIэм, си Iуэху зехьэкIэм, уеблэмэ си зекIуэкIэм иIэ дагъуэхэр зэригъэзэхуэжу, сиущийуэ, и чэнджэщ щхьэпэхэр къызихьэлIэу ныб¬жьэгъуфI-нэхъы¬жьы¬фIу си япэ итащ. 
Тхэным сыдихьэхыу тхылъ цIыкIу зытIущ дунейм къызэрытезгъэхьари зи фIыщIэр Ахьмэдхъану къызолъытэ. 
Сыт хуэдэ спорт зэхьэзэхуэ емыкIуэкIми на¬кIуэрти, абы хэтхэр тригъэгушхуэрт, ди щыуагъэхэм гу лъыдигъэтэжырт. Ахьмэдхъан зи пашэ гупым щыщт Ансокъуэ Мухьэрбий, ТIыхъужь Алий, Къардэн Бубэ, Сонэ Мухьэрбий сымэ. Абыхэм тIысыпIэ щхьэхуэхэр яхухэтхат, зы зэхьэзэхуи зэрыдамыгъэхунур тщIэр¬ти. 
Нобэ Ахьмэдхъан къытхэмытыжми, ар ди гум илъщ, лIы щэджащэм и фэеплъыр щIэблэми ящы¬гъупщэ хъунукъым». 
Тхьэхущынэ Ланэ.
  • 23 просмотра
Поделиться: