«Зы уэрэдым и хъыбар»

Мы фIэщыгъэр иIэу «1 КъБР» телерадиокомпанием илъэс зыбжанэкIэ къитащ нэтын щIэщыгъуэ. ЦIыхухэри дихьэхыу, я гуапэу абы еплъырт.

Нэтыныр езыгъэкIуэкI КIунтIыщ-ХьэпцIэ Аннэ 1991 гъэм къыщыщIэдзауэ Къэбэрдей-Балъкъэр къэрал телевиденэм и адыгэ редакцэм щолажьэ.  А зэманым къриубыдэу абы гъэсэныгъэм, егъэджэныгъэм   теухуа нэтын купщIафIэ куэд   игъэхьэзыращ.  Иужьрей зэманым йолэжь езым и жэрдэмкIэ иригъэжьа «Уэрэдыр фэеплъ мыкIуэдыжщ», цIыхухэм я хуитыныгъэр   хъума   хъун   папщIэ ящIэн   хуей   хабзэхэм   щытепсэлъыхь «ЦIыху   къэс   хуитщ», нэгъуэщI нэтынхэм.

   Аннэ къиухащ Ивановэ дэт Текстильнэ   институтыр, Москва   щыIэ Гуманитар академиер. Ар хэтщ Журналистхэм я Урысей Федерацэ, Дунейпсо союзхэм, Дунейпсо Арткомитетым   и   лауреатщ. КъБР-м щIыхь зиIэ и журналистщ.

- Куэд щIауэ си щхьэм илъу, ауэ Iуэху схуэмыщIурэ   къыздесхьэкIащ «Зы уэрэдым   и   хъыбар» зыфIэсща нэтыныр, - жеIэ Аннэ, абы и къежьэкIэ хъуам теухуауэ. -  А Iуэхум и хъыбарыр жыжьэ къыщожьэ.   Зы   махуэ гуэрым   школым сыкъикIыжу   унэм сыщыщIыхьэжам, си   анэ Шал-КIунтIыщ Хьэлимэт гъыуэ   щыст. Сыкъэщтауэ   сыщыбгъэдэлъадэм: «Умыгузавэ, тIасэ, зы   уэрэд   радиом   къиту   седэIуати, ар   си   гум щIыхьауэ   аращ.  Согупсыс, хэту   пIэрэ   ар   зытхар жызоIэри.   Дауи, ар цIыху   гуэрым   и   гъащIэщ», - жиIащ мамэ.

    Ебланэ   классым   сыщIэсу   арат абы   щыгъуэ, ауэ си гум къинащ ар. Сыт хуэдиз зэман блэкIа абы лъандэрэ?!  Телевиденэм сыкъэкIуа нэужьи, илъэс   бжыгъэ гуэр   дэкIыжыху къысхуехьэжьакъым а Iуэхур.  ИкIэм-икIэжым, 2012 гъэм   мурад сщIыри езгъэжьащ. Абы сыщелэжькIэ сытым дежи си анэм жиIар сигу къэкIыжырт. Ди жагъуэ зэрыхъунщи, а нэтынхэм ящыщ зыи абы илъагъуну хунэсакъым.

Адыгэ   уэрэдхэмрэ уэрэдыжьхэмрэ лъэпкъым ди тхыдэщ, ди бзэщ, ди хабзэщ. Зи гугъу ящI IуэхугъуэмкIэ зэщхьэщыкIми, ахэр гъэнщIащ гъащIэмрэ   зэманымрэ я пэжыпIэкIэ.  Апхуэдэ уэрэдхэр щIэблэм   я дежкIэ   щапхъэ   хъууэ къогъуэгурыкIуэ.

    Ди   жагъуэ   зэрыхъущи, нобэрей   щIалэгъуалэм   куэд   яхэту   пхужыIэнукъым   адыгэ   уэрэдыжьхэм   едаIуэу.  Сэ сызэреплъымкIэ, ижь-ижьыж   лъандэрэ   къыддекIуэкIа   уэрэдыжьхэм, дзапэ   уэрэд   хъуахэм, нобэ уэрэджыIакIуэхэм   къагъэщIэрэщIэжу   ди   пащхьэ   къралъхьэжхэм   я хъыбар пщIэныр, ахэр   зыгъэзащIэу, зытхауэ   щытахэм уащыгъуэзэныр   куэд и уасэщ.  Япэ дыдэу нэтыныр «Лъагъуныгъэм жаIэр къигъэзэжу» уэрэдым теухуауэ щытащ.

ЩХЬЭЩЭМЫЩI Изэ.