Астемыр и макъамэхэр

Музыкант, композитор, цIыхубэ уэрэдхэри езым итхыжахэри зыгъэзащIэ Мэршэнкъул Астемыр и IэдакъэщIэкIхэр удэзыхьэхщ. Фильмхэмрэ спектаклхэмрэ макъамэ яхуетх, нэгъуэщI Iуэхухэми яужь итщ. Къэбэрдей-Балъкъэрым щыщ режиссёр, сценарист, продюсер, актёр Толгуров Саид ди щIыналъэм и щIыуэпс къулеймрэ абы щыпсэухэмрэ ятриухуа и трилогием щыщ, адыгэбзэкIэ триха «В горах. Он» фильмыр Ханты-Мансийск щекIуэкIа «Дух огня» XXIV международнэ кинофестивалым щагъэлъэгъуащ икIи «Серебряная роза» саугъэт щхьэхуэри къратащ, макъамэ дахэ зэрыщIэлъыр къыхагъэщу. Фильмым щIэт макъамэр зейр Мэршэнкъул Астемырщ.

 Кинофестивалым и къэпщытакIуэхэр зэплъа фильм 83-м ящыщу нэхъыфIу къалъыта 6-м язщ Толгуров Саид и лэжьыгъэр. Классикэ макъамэ щIэныгъэ имыIэми, Астемыр курыт еджапIэм щыщIэсам Аринин Владимир гитарэ еуэнымкIэ и гупжьейм екIуалIэу зэрыщытар пщIэншэ хъуакъым. Макъамэм теухуауэ бгъэдэлъ зэфIэкIым адэкIэ езым зригъэужьыжауэ жыпIэ хъунущ. Гитарэм къищынэмыщIауэ,   пианинэ, виолончель, флейтэ, саксофон, ксилофон, нэгъуэщI Iэмэпсымэхэри къигъэIэрыхуащ. Езым иджыжащ нотэр. 2021 гъэм къыдэкIащ абы и «Умозрительные геометрические фигуры для разных людей»  альбомыр. Ар утыку къыщрахьауэ щытащ Сэральп Мадинэ и Арт-центрым.

 - Толгуров Саид и трилогием хыхьэ «В горах. Она» япэ фильмым нэгъабэ сригъэблэгъауэ щытащ. Абы къыкIэлъыкIуа «В горах. Он» етIуанэ фильмыми композитор, звукорежиссёр лэжьыгъэхэр пщэрылъ къысщищIащ икIи къыспэрымыуэу, хуиту селэжьыну Iэмал къызэрызитар арагъэнщ ехъулIэныгъэ къыщIыпэкIуари, - жеIэ Астемыр.

 Мэршэнкъул Астемыр и концерт гукъинэж гъатхэ кIуам щекIуэкIащ   «Периметр» утым. Абы электроннэ клавишнэ Iэмэпсымэхэми щиIэ зэфIэкIыр щигъэлъэгъуат. Астемыр итхащ ЩоджэнцIыкIу Алий и цIэр зезыхьэ Къэбэрдей Къэрал драмэ театрым и спектаклитIым – «КъуийцIыкIу», «Кхъужьей хадэ» - я макъамэхэр. КъищынэмыщIауэ, КъБКъУ-м и «Занавес» театрым Дохъушокъуэ Мадинэ и нэIэм щIэту щагъэува «Арт» спектаклым макъамэ хуитхащ. Ар долажьэ  Енэмыкъуэ Феридэ зи художественнэ унафэщI, ныбжьыщIэхэм папщIэ  щыIэ «Розовые очки»   театрми. Астемыр щапхъэу къилъытэ композиторхэм ящыщщ Скрябин Александр.

Режиссёр-документалист, Москва и киношколэм еджапIэр къыщызыуха Васильев Тамерлан «Победа» кинотеатрым и тхыдэм триухуа и фильмыр нэгъабэ ягъэлъэгъуащ. Абыи Тамерлан и нэгъуэщI лэжьыгъэхэми макъамэ яхуэзытхар Мэршэнкъулырщ. Пасэрей адыгэ макъамэр къэгъэщIэрэщIэжыным теухуа лэжьыгъэшхуи ирегъэкIуэкI Астемыр, архив дэфтэрхэр къиIэтыжурэ.

- Макъамэм сызэрыцIыкIурэ сыдехьэх. Си адэ-анэр абы хуэхамэтэкъым, пианинэ еуэрти, ди унэм макъамэ Iэмэпсымэ куэд щIэлът. Курыт еджапIэ нэужьым КъБКъУ-м прикладной математикэмкIэ и факультетым сыщIэтIысхьащ. АрщхьэкIэ, иужькIэ къызгурыIуащ абы сызэрыдимыхьэхыр, - жеIэ Астемыр. - Зэпымыууэ щIэ гуэр солъыхъуэ, макъамэ Iэмэпсымэ зэмылIэужьыгъуэхэм (саксофон, накъырэ, флейтэ, виолончель, скрипкэ, гитарэ, синтезатор, фортепианэ, перкуссие, нэгъуэщIхэми) соуэ. «Yewari» гупым сызэрыхэтым и фIыгъэкIэ IуэрыIуатэм сыдихьэхащ. Пасэрей макъамэхэр къызэрыдгъэщIэрэщIэжыр, абы я гъащIэм къызэрыпытщэр сэркIэ щIэщыгъуэщ. ЦIыхубэ уэрэдыжьхэм я макъамэм, гъэIукIэм, сюжетым зэщхьу яхэлъымрэ ахэр зэрызэщхьэщыкIымрэ къэпхутэнуи гъэщIэгъуэнщ. Си лэжьыгъэхэм едаIуэхэм ахэр къазэрыщыхъум теухуауэ жаIэр зэхэсхыну   сфIэфIщ. Си мурадщ си альбомхэр къыдэзгъэкIыну. 

ТЕКIУЖЬ Заретэ.