Щэнхабзэм и хъумакIуэ

Лъэпкъ щэнхабзэмрэ гъуазджэмрэ ипэкIэ зыгъэкIуатэхэм, къытщIэхъуэ щIэблэр гъуэгу захуэм тезышэхэм ящыщщ Сатибалхэ Казбек.

ЩIалэм зэрыцlыкlурэ къафэр и псэм хэлъщ, зыпищlын щымыlэу фIыуэ елъагъу къызыхэкIа лъэпкъым бгъэдэлъ хъугъуэфIыгъуэ псори.  Арагъэнщ иджыпсту зыпэрыт Iуэху дахэм къежьапIэ хуэхъуари, абы 2020 гъэм къэфакIуэ ансамбль къызэригъэпэщауэ школакIуэхэр егъасэ.

«Уи щэнхабзэр утыкушхуэхэм ипхьэным и зы ӏэмалщ къафэр», - жеlэ Казбек. ИкIи «Дуней» зи фlэщыгъэцlэ и ансамблым и къалэн нэхъыщхьэр аращ. Ар Тэрч куейм хыхьэ Дейскэ (Мэртэзей) къуажэм и гупщ. Дерсхэр мы къуажэми Тэрч къали щрегъэкIуэкI. Казбек цIыкIухэм къафэ зэмылIэужьыгъуэхэр ярегъащIэ, утыку зэхуэмыдэхэм ирешэ.

«Дунейм» нэхъыбэу хэтыр сабийщ, зи ныбжьыр илъэси 7-м къыщыщlэдзауэ 18-м нэсхэрщ. Ауэ щIалэм и бжэхэр хэти хузэIухащ. Абы игъасэхэм яхэтащ студентхэри балигъ хъуахэри. Кlэщlу жыпlэмэ, къафэм зигу хуэпабгъэ дэтхэнэ зыри Казбек игъэщIэхъуркъым, езым и зэфIэкIыр фIэфIу ябгъэделъхьэ.

Зэман кlэщlым къриубыдэу ехъулlэныгъэфlхэр иlэ хъуащ «Дуней» ансамблым. Абыхэм зыкъыщагъэлъэгъуащ Тэтэрстаным, Москва зыбжанэрэ щыIащ, «Союз талантов» зэпеуэм хэтащ. Апхуэдэуи Казбек и гъэсэнхэм я насып къихьащ Япэ каналымкIэ екIуэкI «Поле чудес», «Жить здорово» программэм хэтыну. Мы гъэм Краснодар щекlуэкlа «Гъуазджэм и дуней» зэхьэзэхуэм хэтащ икIи ЩIыхь тхылъу тIу къыхуагъэфэщауэ къэкIуэжащ.  Апхуэдэ зекIуэхэр щыхьэт тохъуэ ансамблым зэрызиужьым, ехъулӏэныгъэфӏхэр зэрызыӏэригъэхьэм.

Налшык къалэ дэт «Берёзка» ательем щрагъэда фащэ зэкIужхэр ящыгъыу, Тэрч щIыналъэм, ди республикэм къыщаIэт Iуэхухэр егъэдахэ «Дунейм».  Абы макъамэ дахэр зыщIэт къафэхэр игъэзащӏэ къудейкъым, атIэ лъэпкъ щIэиныр ехъумэ, щэнхабзэм зрегъэужь, адыгэ щIалэ къуданымрэ пщащэ щIыкIафIэмрэ я шыфэлIыфэр цIыхухэм я нэгу къыщIегъэувэ. Казбек и IуэхущIафэр сэбэп мэхъу щӏалэгъуалэм гъуазджэр фӏыуэ ялъагъуу къэгъэтэджынымкIэ, лъэпкъ хабзэхэр иджырей дунейм езэгъыу щыхъумэнымкIэ.