Къэбэрдей-Балъкъэр Республикэм щIыхь зиIэ и артист, ЩоджэнцыкIу Алий и цIэр зезыхьэ Къэбэрдей къэрал дамэ театрым и артист пажэ Хьэмырзэ Ахьмэд иджыблагъэ яIущIащ КъБКъУ-м и Социально-гуманитар институтым и еджакIуэхэм. ЦIыпIынэ Аслъэн и цIэр зезыхьэ адыгэ щэнхабзэмкIэ центрым гупсэхуу щызэдэуэршэращ актёр цIэрыIуэмрэ лъэпкъ щэнхабзэм, гъуазджэм дихьэх щIалэгъуалэмрэ.
Хьэмырзэ Ахьмэд илъэс 30-м нэблагъауэ Адыгэ драмэ театрым и утыкур егъэбжьыфIэ. Абы игъэзэщIащ роль гъэщIэгъуэну 20-м щIигъу. Псоми фIыуэ ялъагъу актёрыр, киноми жыджэру хэтщ, и лэжьыгъэхэри цIыхухэм ягу дыхьэну хунэсакIэщ. Кином щигъэзэщIахэм ящыщу ехъулIэныгъэ нэхъыбэ къыхуэзыхьар Адыгэ Республикэм гъуазджэхэмкIэ щIыхь зиIэ и лэжьакIуэ ЕмкIуж Андзор триха «Невиновен» фильмым хэта Айтэч и ролырщ. Ар хуабжьу хьэл-щэныфI защIэкIэ псыхьат. Адыгэ цIыхухъу зэпIэзэрытым, щIэныгъэ зыбгъэдэлъым, пэжымрэ захуагъэмрэ япэ изыгъэщым, гъащIэм хуэIущым, и дэтхэнэ лъэбакъуэри зэпэзышэчыфым, нэхъыщхьэращи, адыгэлI нэсым и щапхъэщ Айтэч. Ахьмэд а ролыр апхуэдизкIэ дахэу игъэзэщIащи, джэгуауэ фIэщщIыгъуейщ, дунейм зэрытетым хуэдабзэу хэтауэ къыпщегъэхъуфри. Арагъэнщ къыщIехъулIари, езыри апхуэдэу дунейм тетщи, хьэл зэпIэзэрыт иIэщи. Ар зэпкъраха нэужь, студентхэр щIэупщIащ КъБР-м щIыхь зиIэ и артист Хъыжьрокъуэ СулътIан триха «По небу босиком» мелодрамэмрэ «Понаехали» комедиемрэ Ахьмэд зэрыхэтам.
Къызэхуэсахэм гулъытэ хэха хуащIащ адыгэ лъэпкъым лIэщIыгъуэкIэрэ къыдэгъуэгурыкIуа хабзэхэм теухуа зэпсэлъэныгъэм. Актёрым къыхигъэщхьэхукIащ хабзэхэр узырытекI мыхъу жыпхъэ гуэру зэрыщымытыр, атIэ цIыхум и зэхэщIыкIыр псынщIэу зызыхъуэж дунейм щихъумэнымкIэ сэбэп хъу лъабжьэ быдэу къызэрыдэгъуэгурыкIуэр.
- Нэхъыжьхэм пщIэ яхуэщIыным, хьэщIагъэм, шыIэныгъэм хуэдэ лъапIэныгъэхэр ноби мыхьэнэшхуэ зиIэу Iуэхугъуэщ. Фэри, щIалэгъуалэм, адыгэ хабзэм хэфлъэгъуэн хуейр гъунапкъэхэракъым, атIэ фызэрыгушхуэну хэлъ щхьэхуэныгъэхэрщ, адыгэу фыкъызэтенэнымкIэ сэбэп хъу, «щэнхабзэ иммунитеткIэ» дызэджэ хъуну Iуэхугъуэщ, - къыхигъэщащ артистым.
Ахьмэд жиIащ театрымрэ киномрэ пасэрей хабзэхэм я купщIэр иджырей щIэблэм я деж нэхьэсынымкIэ мыхьэнэшхуэ зэраIэр, бзэ гурыIуэгъуэкIэ утыку къызэрырахьэр.
Анэдэлъхубзэр хъумэным и Iуэхум щынэсым, Хьэмырзэм жиIащ:
- Уадыгэ нэсу зыкъэплъытэжмэ, анэдэлъхубзэкIэ упсэлъэн къудейр мащIэщ, абы зебгъэужьыни хуейщ, уи зэфIэкI епхьэлIэу. Ар фи къалэнщ фэ зи щIалэгъуэхэми. Бзэр умыгъэлажьэмэ, зиужьынукъым. Апхуэдэуи дыхуэмысакъмэ, иджыпсту екIуэкI глобализацэм хэшыпсыхьынущ. Псом япэ къыщыщIэдзапхъэр сабийм дежщ. Дэ, сыт хуэдэ IэнатIэ пэрытхэми, фэ абы хуеджэхэми, ди къару псори зэхэтлъхьэу лъэпкъым хуэмыхь хьэлъэу и пщэ къыдэхуар щхьэщытхын хуейщ. Нэхъ егугъун хуейуэ къысщохъу курыт еджапIэхэм адыгэбзэкIэ щезыгъэджэнухэр гъэхьэзырыным.
Адыгэбзэр тIэщIэхуащ жыдоIэ. Нэхъ Iеижыр ар къызэрытщтэжын Iэмалхэр зэрытфIэкIуэдращ. Си щхьэкIэ, адыгэбзэмкIэ егъэджакIуэхэм, уи лъэпкъыр зыгъэкIуэтэну узыщыгугъ щIэблэр зыгъасэхэм, я улахуэм хэзгъэхъуэнт. ЩытыкIэр хэплъэгъуэ зэрыхъуар къыдгурыIуэжу щытын хуейщ. «Курыт еджапIэхэм адыгэбзэр щадж, адыгэ театр мэлажьэ, хуитщ ящIэну», - жызыIэни щыIэщ. Ауэ абыкIэ зэфIэкIыркъым. Мыбы иужь итын хуейщ къэрал къулыкъущIапIэхэри.
Иджыпсту Хьэмырзэ Ахьмэд ролыщIэхэм жыджэру зыхуегъэхьэзыр. ЩоджэнцIыкIу Алий и цIэр зезыхьэ Къэбэрдей драмэ театрым 2026 гъэм и накъыгъэ мазэм щагъэлъэгъуэнущ ар зыхэт спектаклхэр. Куэд мыщIэу екIуэкIынущ артистым роль нэхъыщхьэхэм ящыщ зы щигъэзэщIэну и «ХьэщIэщым къыщыхъуа Iуэхугъуэ» спектаклыр, Куни Рэй и комедием къытращIыкIар.
Социально-гуманитар институтым и студентхэм я дежкIэ Хьэмырзэ Ахьмэд зэрыIущIар гъэщIэгъуэн къудей мыхъуу, щапхъэ, дерс къызыхахын зэIущIэ хъуащ, сыт щхьэкIэ жыпIэмэ, артист цIэрыIуэм ахэр куэдым щIигъэдэIуащ къызыхэкIам пщIэ хуащIын, я лъэпкъ хъугъуэфIыгъуэхэр я Iэпэгъуу иджырей дунейм гъуэгу щыхашын зэрыхуейм, нэгъуэщIхэми ятеухуауэ.
