ЗимыIэракъым тхьэмыщкIэр - иримыкъурщ

Зэгуэрым Мусэ лъапIэм упщIэ зыбжанэкIэ Алыхьталэм зыхуигъэзащ:

- Алыхьу си Тхьэ! - жиIащ абы. - Хэт уи пщылIхэм ящыщу псом нэхърэ нэхъ тхьэхуэлажьэр?

- Сэ зэи зи гум симыхур, - къыжриIащ Алыхьталэм.

- Хэт Уи гъуэгум нэхъ пэжу тетыр?

- Си унафэхэр зыгъэзащIэр.

- Хэт псом нэхърэ нэхъ Iущыр?

- Езым ифI зэрызэрихуэжым хуэдэ дыдэу, цIыхухэм яфI зезыхуэр.

- Хэт и щIэныгъэр нэхъ ин?

- ИщIэмкIэ зимыгъэнщIу, и щIэныгъэр цIыхухэм ящIэмкIэ зыгъэбагъуэр.

- Хэт псом нэхърэ нэхъ лъэщыр?

- ЦIыхум кърищIар ирищIэжыфынрэ пэт, хуэзыгъэгъур.

- Хэт псом нэхърэ нэхъ бейр?

- КъылъысамкIэ арэзыр.

- Хэт псом нэхърэ нэхъ тхьэмыщкIэр?

- Мылъку гуэр бгъэдэлърэ пэт, сытым дежи зыгуэрым хуэныкъуэр.

Мы хьэдисыр къэзыIуэтэжа Iэбу Хъурэйрэ мыбдежым Бегъымбар лъапIэу щэлатымрэ сэламымрэ зэхам и псалъэхэр игу къэкIыжащ: «Мылъку зи куэдракъым бейкIэ узэджэнур, псэкIэ бейращ. Алыхьталэм и пщылIым фIы хуищIэну щыхуейм деж, псэкIэ бей, гукIэ тхьэхуэлажьэ ещI.

И пщылIым фIыкIэ щымыгугъмэ, и мылъкур мащIэу къыщIегъэхъу».

- Уэ си гум УкъэзыгъэкIыжын, зэрызыпхуэзгъазэ хъуну псалъэхэм сегъасэ, - ар жиIэу Тхьэм елъэIуащ зэгуэр Мусэ лъапIэр.

- «Алыхьым фIэкIа нэгъуэщI тхьэ щыIэкъым», - жыIэ.

- Уи пщылI псоми жаIэ а псалъэхэр, - идакъым Мусэ.

- «Алыхьым фIэкIа нэгъуэщI тхьэ щыIэкъым» жыIэ уэ, - къыжреIэ аргуэру.

- Сэ щхьэхуэу зыгуэрым себгъэсэну сыхуейт, - игу загъэркъым Мусэ.

Алыхьталэм жэуап къритащ:

- Уа Мусэ! Тэрэзэм и зы тепщэчым уафиблымрэ щIылъиблымрэ щыпсэухэр иплъхьэрэ мыдрейм «Алыхьым фIэкIа нэгъуэщI тхьэ щыIэкъым» псалъэхэр иплъхьэмэ, а псалъэхэр зэрылъ лъэныкъуэр иришэхынущ.