ЩIалэ жан

Къэшэж Алим Каменномост (Къармэхьэблэ) къуажэм дэсщ. Къуажэ курыт еджапIэ №2-р мы гъэм фIы дыдэу къиухащ, экзаменхэм балл куэд щызэхуихьэсащ. Школым щIэсыху жыджэру хэтащ абы къыщызэрагъэпэщ пшыхьхэм, зэIущIэхэм, жылагъуэ Iуэхухэм. Зэпеуэхэм, олимпиадэхэм, спорт зэхьэзэхуэхэм мызэ-мытIэу ехъулIэныгъэ щызыIэригъэхьащ.

Алим и къуажэр, и анэдэлъхубзэр, лъэпкъ хабзэхэр фIыуэ елъагъу, ирогушхуэ къызыхэкIа лъэпкъым.  ЗыщIэса курыт еджапIэм теухуа гукъэкIыж IэфI куэд иIэщ. И егъэджакIуэхэм фIыщIэ яхуещI. И класс унафэщIу щыта Бей Лианэ еджэнми жылагъуэ Iуэхухэми сытым дежи тригъэгушхуэу зэрыщытар, куэдкIэ зэриунэтIар къыхегъэщ.

 «Къэрал, муниципальнэ управленэ» жыхуиIэ унэтIыныгъэм хуеджэну и мурадщ щIалэм. Унагъуэми ар къыдаIыгъащ. А IэщIагъэм гуапагъэ хэлъу, цIыхухэм сэбэп уахуэхъунуми, къуажэм псэукIэр щебгъэфIэкIуэнуми Iэмал къуиту жеIэ.

Къэшэж Алим гъащIэм щапхъэ щыхуохъу и нэхъыжьхэр, и адэ-анэр. ФIыщIэ ещI абыхэм фIымрэ Iеймрэ зэхигъэкIыфу, IуэхуфIхэм и гур хуэпабгъэу, ныбжьэгъур илъытэу, дэIэпыкъуэгъу хуэныкъуэм и Iэр хуишиифу зэрагъэсам папщIэ. Анэдэлъхубзэм хуиIэ лъагъуныгъэри и нэхъыжьхэм я деж къыщежьащ.

- Анэдэлъхубзэм пщIэ хуэщIынымрэ щэнхабзэм иригушхуэнымрэ я мыхьэнэр дэтхэнэми къыгурыIуэн хуейуэ си гугъэщ. Анэдэлъхубзэрщ дунейм къызэрытехьэххэу цIыхум зэхихыр. Хэбгъэзыхьмэ, цIыхум и гъащIэ псокIэ аращ лъабжьэу иIэр, и псэр зыхэлъыр. «Бзэр тIэщIэкIмэ, ди щхьэр кIуэдынущ» жыхуаIэр ауэ псалъэ дыгъэлу аракъым – абы куууэ дызэгупсысын хуей хэлъщ. Аращи, си дежкIэ лъэпкъ гъащIэм къигъэув  къалэнщ си бзэр схъумэныр, - къыхегъэщ щIалэм.

Алим къыгуроIуэ балигъ гъащIэр зэрыгугъур, абы пылъ жэуаплыныгъэм гурыфIыгъуи къыдэкIуэу жеIэ.

- Псом япэрауэ, балигъ ухъуным къокI жэуаплыныгъэ зыхэплъхьэныр. Лэжьыгъэми, IуэхущIафэхэми, унафэхэми – псоми жэуап щыпхьынущ. СышколакIуэху си щIыбагъым къыдэтащ курыт еджапIэр, саунэтIащ икIи сытрагъэгушхуащ егъэджакIуэхэм. Иджы езыр-езыру щIэныгъэм и гъуэгум сытетын хуейщ. Балигъ гъащIэр гугъуми, ар IэмалыфIщ си зэфIэкI згъэунэхуну, си унагъуэм сэбэп сыхуэхъуну, жылагъуэм IуэхуфI хуэзлэжьыну, - жеIэ.

Алим Iуэху щхьэпэхэр щилэжьащ «Пэрытхэм я зэщIэхъееныгъэ» жылагъуэ зэгухьэныгъэм я курыт еджапIэм щиIэ къудамэм. Абы хэтурэ есащ утыку ихьэрэ екIуу къикIыжыфу, и гупсысэр къиIуэтэфу, къалэнхэр зыхуигъэувыжрэ ахэр игъэзащIэу.

ГУГЪУЭТ Заремэ.