Къэбэрдей-Балъкъэрым мы махуэхэм щокIуэкI хьэрычэт Iуэху къызэзыгъэпэщын щIэзыдзэгъащIэхэм папщIэ «Бизнес 07» егъэджэныгъэр.
Ар республикэм ЩIалэгъуалэм я IуэхухэмкIэ и министерствэм къызэригъэпэщащ. ЩIалэгъуалэм и унэм щызэхуэсащ хьэрычэт Iуэхум япэ лъэбакъуэхэр хэзычэ цIыху 50. ГъэщIэгъуэнращи, абыхэм яхэтщ и ныбжьыр илъэс 14 фIэкIа мыхъуауэ зи хэхъуэ зиIэжи.
Мы еджапIэм и къалэн нэхъыщхьэр абы хэтхэр Iуэху нэхъ инхэми тегъэгушхуэнырщ, ахъшэ саугъэт къыщахь зэпеуэхэм зыхуагъэхьэзырынымкIэ ядэIэпыкъунырщ. ХьэрычэтыщIэ ныбжьыщIэхэм я Iуэху зехьэкIэр къагъэнаIуэ, апхуэдэуи я мурадхэр нэгъэсауэ къагъэлъэгъуэфу, мылъку хэзылъхьэхэм (инвесторхэм) лэжьыгъэ зэрыдащIэ щIыкIэм ирагъасэ.
«Деловая Россия» IуэхущIапIэм и Къэбэрдей-Балъкъэр щIыналъэ къудамэм и унафэщI Гузеевэ Индирэ жеIэ: «Илъэс 18-м нэблэгъауэ ди IуэхущIапIэм гъэ къэс мыпхуэдэ еджапIэ щIалэгъуалэм къахузэIуехри, зэфIэкIышхуэ диIэ хъуащ. Зи гугъу сщIы пIалъэм къриубыдэу дгъэсащ икIи етта щIэныгъэр гъащIэм къыщагъэщхьэпащ хьэрычэт Iуэху къызэзыгъэпэщыфа, Къэбэрдей-Балъкъэрым и экономикэм нобэ хэлъхьэныгъэфI хуэзыщI цIыхухэр. Ди еджапIэр къэзыухахэм зэхыхьэ гъуэзэджэхэр къызэрагъэпэщ, ерыскъы гъэщIэгъуэнхэр къыщIагъэкI, я брендхэр къыдагъэкIыж. Дэ абы дрогушхуэ. СогъэщIагъуэ зи ныбжьыр илъэс I4 фIэкIа мыхъу щIалэхэр мыбы къызэрыхыхьэр. Ди мурадыр апхуэдэхэм защIэдгъэкъуэнырщ, гъуазэ дахуэхъунырщ».
Жылагъуэ лэжьакIуэ, хьэрычэтыщIэ, «Росмолодежь» федеральнэ агентствэм и лIыкIуэ Къуэдзокъуэ Эмир къыхигъэщащ егъэджэныгъэр иджырей мардэхэм тету зэрызэхаублар.
«Школым мы гъэм къэкIуащ щIалэгъуалэ щэ ныкъуэ. Хэти и щхьэм толажьэ, хэти и Iуэху иригъэжьэну хэт къудейщ. Махуищым и кIуэцIкIэ IэщIагъэлIхэм къалэну зыхуэдгъэувыжар абыхэм я мурадхэр щIакъузэнымкIэ, хьэрычэт лэжьыгъэ яухуэнымкIэ дадэIэпыкъунырщ. ЩIалэгъуалэм Iэмал яIэщ илъэс бжыгъэкIэ Iуэхум хуэIэижьу лажьэ IэщIагъэлIхэм ечэнджэщыну. ЕджапIэр щызэхуэтщIыжкIэ, щIалэгъуалэм я Iуэхухэр къапщытэнущ «Росмолодежь» IуэхущIапIэм къикIынухэм. КъищынэмыщIауэ, абы къедгъэблэгъащ Къэбэрдей-Балъкъэрым и хьэрычэтыщIэхэри. Хэт ищIэрэ, нэхъ ягу ирихь лэжьыгъэхэм ахъшэ халъхьэнкIи хъунщ».
КъэпщытакIуэхэм щIалэгъуалэм утыку кърахьэ я лэжьыгъэхэр къызэралъытэнур псалъэкIэ къызэрагъэгугъэ къудейркъым, атIэ абыхэм щIыналъэм зиужьынымкIэ экономикэ сэбэпынагъ къызэрахьынырщ.
