Сэтэней и махуэр ягъэлъапIэ

Сэтэней гуащэ и жьэгу мафIэр маблэ,
Ди адыгэ фащэ дахащэм и хъыбархэр
жьэгу пащхьэм щыжаIэ,
Адыгэ шхыныгъуэ гурыхьхэр щызэблокI,
Ди пщащэ щIыкIафIэхэмрэ ди бзылъхугъэ
IэпэIэсэхэмрэ я хъыбарыфIхэр щаIуэтэж.

Илъэс зыбжанэ хъуауэ Сэтэней и махуэр (Адыгэ цIыхубзым и махуэр) ягъэлъапIэу, зэпеуэ гъэщIэгъуэнхэр, зэхыхьэ щIэщыгъуэхэр иращIэкIыу къокIуэкI. Адыгэу дуней псом тетым мэкъуауэгъуэм и 23-м гукъинэжу зэдагъэлъэпIащ ар. Зэпымыууэ а махуэщIым гулъытэ хуэзыщIхэм ящыщщ КъШР-м щIыхь зиIэ и журналист, анэдэлъхубзэмрэ хабзэмрэ зи Iэпэгъуу лъэпкъым хуэлажьэ Къардэн Заремэ.

- Адыгэ дунейм адыгэ бзылъхугъэм куэд дыдэ щелъытащ. Иджырей гъащIэм къыщылъыс жэуаплыныгъэм цIыхубзыр пэлъэщыфу, сыткIи а цIэм хуэфащэу щытын хуейщ, - жеIэ Къардэн Заремэ. - Нартхэм я чэнджэщэгъу, цIыхубз Iущ Сэтэней гуащэ и цIэм хуэфащэу зыкъэзыгъэлъагъуэ адыгэ бзылъхугъэ пажэхэр ди мащIэкъым. Зи IэщIагъэкIэ, дуней тетыкIэкIэ цIыхубз щыпкъэхэм си нэтынхэр ятезухуэну сфIэфIщ. Апхуэдэщ филологие щIэныгъэхэм я доктору, КъШР-м, КъБР-м, АР-м щIэныгъэхэмкIэ щIыхь зиIэ я лэжьакIуэу, зи IуэхущIафэрэ дуней тетыкIэкIэ щапхъэу къекIуэкIа Бэчыжь Лейла, дохутыр Iэзэ Уэзы ФатIимэ, IэпщIэлъапщIэ Еутых Ася сымэ, нэгъуэщIхэри. Ахэр ящыщщ зи цIэ ящымыгъупщэнухэм.
Къардэн Заремэ къелъытэ мыхьэнэшхуэ зиIэ дэрбзэр, пщафIэ IэщIагъэхэм адыгэ бзылъхугъэр хуэIэлъакIуэу щытын хуейуэ. Езыр дэзыхьэх Iуэхугъуэхэм ящыщщ лъэпкъым ижь-ижьыж лъандэрэ къыдекIуэкI, нэгъуэщIхэм адыгэ дыкIэ къытхужезыгъэIа пасэрей дыщэидэ IэщIагъэ дахэр. ЦIыхубз IэпэIэсэм лъэпкъ дамыгъэхэмрэ тхыпхъэхэмкIэ егъэдахэ адыгэ пыIэ, бгырыпх, щхьэнтэ, чысэ, хъуржын цIыкIухэр.
- Зэрытлъагъущи, адыгэ IуэрыIуатэм щIапIыкI сабийхэмрэ иджырей мультфильмхэм ятхьэкъуа цIыкIухэмрэ я гупсысэкIэ зэщхьэщыкIыныгъэ яIэу къыдокIуэтей. Аращи, тхузэфIэкIынумэ, Сосрыкъуэрэ Бэдынокъуэрэ хуэдэ нарт лIыхъужьхэм, Сэтэней гуащэ, Мэлэчыпхъу хуэдэ цIыхубз Iущхэм ди щIэблэр щIэдывгъэпIыкI, - жеIэ Заремэ.