Орёл зыхуегъэхьэзыр

Кабэрдей-Балъкъэрым СпортымкIэ и министерствэм и пресс-IуэхущIапIэм иджыблагъэ къызэритамкIэ, мазаем и 7 - 9-хэм Владикавказ къалэм щекIуэкIащ Кавказ Ищхъэрэм бэнэкIэ хуитымкIэ пашэныгъэр къыщыхьыным хуэунэтIа зэхьэзэхуэ. А махуэхэм Осетие Ищхъэрэ - Аланием и къалащхьэм щызэпеуащ илъэс 15 - 17 я ныбжьхэу КИФЩI-м и бэнакIуэ 360-м щIигъу.

Къэбэрдей-Балъкъэрым и командэм щыщу килограмм 92-рэ зи хьэлъагъхэм я деж зыкъыщызыгъэлъагъуэ Джыджий Къантемыр зэхьэзэхуэм и дыжьын медалыр къихьащ икIи абы и фIыгъэкIэ Iэмал игъуэтащ Урысейм пашэныгъэр къыщыхьыным хуэунэтIауэ Орёл къалэм гъатхэпэм икIэхэм щекIуэкIыну зэпеуэм хэтыну.

Ди щIалэм и тренерыр Хъубий Маратщ.