Ди ныбжьыщIэхэм дагъэгушхуэ

Гъатхэпэм и 3-м Новгород Ищхъэрэм щызэхуащIыжащ 2010 - 2011 гъэхэм къалъхуа ныбжьыщIэхэм папщIэ «Футбол цIыкIур - школым» урысейпсо Iуэхум и кIэух Iыхьэр. Къэбэрдей-Балъкъэрым и лIыкIуэу а зэхьэзэхуэм хэтащ Налшык ­къалэм и курыт еджапIэ №33-м и гупыр, Бэлэтокъуэ Астемыррэ Атэлыкъ Азрэтрэ я гъэсэнхэр.

КIэух Iыхьэм нэсын папщIэ, ди гупым хэт ныбжьыщIэхэр чэзууэрэ ятекIуащ Ненецк автоном округым, Чувашие, Алтай щIыналъэхэм я гупхэм. Япэ джэгугъуэм ди ныбжьыщIэхэр ятекIуащ Санкт-Петербург къикIа я хьэрхуэрэгъухэм. Ар 4:4-уэ иухрэ пэт, налшыкдэсхэм я насып кърихьэкIри, пенальтикIэ джэгур къахьащ. Финал ныкъуэм ди гупыр щыдэджэгуащ Оренбург щIы­налъэм хыхьэ Красногвардейскэ курыт еджапIэ №1-м щыщ футболист ныбжьыщIэхэм. Абыхэми топыр тIэу худагъэкIащ.
Япэ увыпIэр къэхьыным ди гупым и гъусэу щIэбэнащ Псков къалэм къикIахэр. ГупитIри ерыщу зэдэджэ­гуащ, арщхьэкIэ ди футболист ныбжьыщIэхэр нэхъ лъэщу къыщIэкIри, джэгур къахьащ. Топыр дигъэкIащ Щауэ Данил. ТекIуэныгъэр къэзыхьахэм къратащ ку­бок­рэ дыщэ медалхэмрэ. Апхуэдэуи Iуэхум и къызэгъэ­пэщакIуэхэр ныбжьыщIэхэм ­къахуэупсащ футбол зэрыджэгу фэилъхьэ­гъуэхэм- кIэ. 
Чемпионхэр Iэтауэ къыщрагъэблэгъэжащ я школым. Абы­хэм гуапэу къаIущIащ еджапIэм и унафэщIхэри, егъэджакIуэхэри, адэ-анэхэри, я ныбжьэгъухэри. Футболист ныбжьыщIэхэм ехъуэхъуащ я гъуэгуанэм адэкIи пащэну, иджыри ехъулIэныгъэ куэд къахудэкIуэну. Гупым хэт псоми абыхэм я гъэсакIуэхэми хуа­гъэфэщащ КъБР-м СпортымкIэ и министерствэм и фIыщIэ тхылъ. 
Фигу къэдгъэкIыжынщи, «Футбол цIыкIур - школым» Iуэхур 2005 гъэ лъандэрэ ирагъэкIуэкI. Илъэс къэс абы хэтхэм я бжыгъэр мел-уаным щыщIигъу щыIэщ. 2018 гъэм къыщыщIэдзауэ зэпеуэм и кIэух Iыхьэхэр Урысейм РекордхэмкIэ и тхылъым йохуэ, «школакIуэхэм папщIэ ирагъэкIуэкI спорт Iуэхухэм ящыщу цIыху нэхъыбэ дыдэ къы­зэ­рызэ­щIиу­быдэм къыхэкIыу». Новгород Ищхъэрэ щызэхуащIыжа зэхьэзэ-хуэм ныбжьыщIэ мини 5,5-м      щIигъу хэтащ, я ныбжькIэ ­гу­пиплIу гуэшауэ.
Зэхьэзэхуэр къызэгъэпэ­щы­ным­рэ егъэкIуэ­кIынымрэ я пщэ дэлъщ Урысей Федерацэм СпортымкIэ, ЕгъэджэныгъэмкIэ и министерствэхэм, Урысейм футболымрэ футбол цIыкIумкIэ и зэгухьэныгъэхэм. «Футбол цIыкIур - школым» Iуэхур ядеIыгъ УФ-м и Президент Путин Владимир.