Дыщэ медалу плIы

Мейкъуапэ къалэм и «Уэщтын» спорт комплексым иджыблагъэ щекIуэкIащ Олимп джэгухэм дзюдомкIэ я чемпион Галстян Арсен и саугъэтхэр къэхьыным хуэунэтIа урысейпсо зэхьэзэхуэ. Ди къэралым и щIыналъэхэм ящыщу 12-м я бэнакIуэ 200-м щIигъу, я ныбжькIэ илъэс 18 хъууэ, гупибгъуу гуэшауэ щытащ. 

Удэзыхьэхыу икIи гуащIэу екIуэкIа зэхьэзэхуэм Къэбэрдей-Балъкъэрым и командэм медалу 8 къыщихьащ, абыхэм ящыщу 4-р дыщэу. 
Я хьэлъагъ елъытауэ зыхэта гупхэм щытекIуащ Быгуэ Мансур (кг 55-рэ), Хъуран Къантемыр (кг 60), БищIо Атхъан (кг 66-рэ), Мамий Атмир (кг 81-рэ) сымэ.
Килограмм 90 зи хьэлъагъхэм я деж щыбанэ Костахов Марат дыжьын медаль къихьащ. Срыкъуэ Ибрэхьим (кг 60), АпыкI Мухьэмэд (кг 73-рэ), Молэ Мухьэмэд (кг 90) сымэ ещанэ хъуахэщ.