Медаль 59-рэ къахь!

ТекIуэныгъэ Иныр къызэрахьрэ илъэс 79-рэ зэрырикъур ягъэлъапIэу кикбоксингымкIэ щIыналъэхэм я зэхьэзэхуэ ­Невинномысск къалэм иджыблагъэ щекIуэкIащ. Абы хэтащ Къэбэрдей-Балъкъэрым, Къэрэшей-Шэрджэсым, Осетие Ищхъэрэ - Аланием, Краснодар, Ставрополь крайхэм, Къалмыкъым я спортсмену 500-м щIигъу.

«ТекIуэныгъэм и Кубок» фIэщыгъэр зэрихьэу екIуэкIа а зэхьэзэхуэм Къэбэрдей-Балъкъэрым и командэм гупхэм я зэ­пеуэм етIуанэ увыпIэр къыщихьащ. Ди спортсменхэм дыщэ медалу 28-рэ, дыжьыну 16, домбеякъыу 15 къахьащ.
Командэм и тренерхэр Апажэ Рашид, Шашэ Арсен, БецIыкIу Ибрэхьим, Пэрыт Альберт, Куэшмэнхэ Рустамрэ Иналрэ сымэщ.
Мыдрейуэ, Урысейм кикбоксингымкIэ пашэныгъэр къыщы­хьыным хуэунэтIа зэхьэзэхуэу накъыгъэм и 17-м Каспийск къалэм щекIуэкIынум Къэбэрдей-Балъкъэрым и командэ къыхэхам хэту цIыху 39-м зыкъыщагъэлъэгъуэнущ.