Испан къикъуэлъыкIхэмрэ инджылыз зэтеубыдахэмрэ

Пщэдей пщыхьэщхьэ сы­хьэт 22-м Германием и къалащхьэ Берлин дэт «Олимп стадионым» утыку къыщихьэнущ футболымкIэ Европэм и къыкIэлъыкIуэ чемпионатым и кIэух джэгугъуэм щызэпэ­щIэувэну Испаниемрэ Инджылы­зым­рэ я командэ къыхэхахэр. 

Зэхуэдэу тыншу е гугъуу мы командэхэр кIэух зэIущIэм хуэкIуауэ пхужыIэнукъым. Испанхэм зыхэхуа гупым я хьэрхуэрэгъу псори щы­хагъэщIащ: хорватхэр (3:0), албанхэр (1:0), итальянхэр (1:0). 
Инджылызхэр, я гупыр ­нэхъ тыншами, икъукIэ гугъу ехьащ. Сербхэр 1:0-у хагъэ­щIащ, Даниемрэ (1:1) Словениемрэ (0:0) текIуэфакъым. Абы щхьэкIэ къэмы­нэу, япэ увыпIэр яIыгъыу гупым къыхэкIащ.
АдэкIэ зы закъуэ фIэкIа мыхъу зэпэщIэуэ зэIущIэхэм щIадзащ. Финалым и 1/8-нэ Iыхьэм испанхэм къащыпэ­щIэ­хуащ Германием ще­кIуэкI Европэм и чемпионатым и кIэух Iыхьэм кIэ­лъыплъ­хэр хуабжьу къыдэ­зыхьэха ди гъунэгъу Грузием и командэ къыхэхар. Куржыхэр япэу апхуэдэ зэ­хьэзэхуэ инхэм хэхуауэ арат икIи махуэ зыбжанэ ипэкIэ Роналду Криш­тиану зи пашэ португалхэр 2:0-у хагъэщIат. АрщхьэкIэ Испанием и командэ къыхэхар къызэтегъэувыIэгъуейт икIи 4:1-уэ ар текIуэри, адэ­кIэ кIуэтащ. 
Инджылызыр Словакием ерагъкIэ пэлъэщауэ аращ. Абы папщIэ джэгум хухаха зэманым иджыри сыхьэт ныкъуэ щIагъун хуей хъуащ.
Топджэгур нобэрей щыты­кIэм иту къытхуэзыгупсыса инджылызхэр апхуэдэуи пэлъэщакъым Якин Мурат зи тренер нэхъыщхьэ Швейцарием и командэ къыхэхам. Абы папщIэ зэIущIэ нэужь пенальтихэм еуэн ­хуей хъуащ. 
Испанхэри щытыншакъым финалым и 1-нэ Iы­хьэм. Ар икIи гурыIуэгъуэт – хьэрхуэрэгъу къахуэхъуар зэхьэзэхуэр езыгъэкIуэкI хэгъэрейхэрат. Джэгум хухаха зэманыр зэрытемыгъэ­кIуауэ, 1:1-уэ иухати, хабзэм тету, сыхьэт ныкъуэ къыщIагъуащ. Мис абы Испанием Германиер щыхигъэщIэфащ. 
Финалым хуэкIуэ гъуэгум абы къыщыпэщIэуващ фра­н­джыхэр икIи куэд мыщIэу къыхагъащIэ ­хъуащ. Псоми яфIэхьэ­лэмэту мыбдежым «лIым и псалъэ щыжиIащ» Испанием и командэ къыхэхам и­ ­гъуащхьауэ ныбжьы­щIэ Ямаль Ламин. Зэпеуэм зэ­рыщIидзэрэ куэд дихьэх ­хъуат зи ныбжьыр иджыри илъэс пщыкIубл иримыкъуа а щIалэщIэм и Iэзагъым, ауэ а пщы­хьэщхьэм абы хузэ­фIэкIар егъэлеят. Ламин зэуа топыр апхуэдизу лъэщу икIи зи­гъазэу иу­тIып­щати, къе­зыгъэгъэ­зэ­фын щыIэу къыщIэ­кIын­тэкъым. Апхуэдэ щIыкIэкIэ бжыгъэр зэхуэдэ зэращIам испанхэм «дамэ къатригъэкIащ» икIи Франджым и командэ къыхэхар хагъэ­щIащ. 
Псалъэм къыдэкIуэу къы­хэдгъэщынщи, Испанием и гъуащхьауэ Ямаль Ламин нэхъ щIалэ Европэм и кIэух зэхьэзэхуэм хэтакъым икIи, дауи, топ щыдигъэкIакъым. Абы и къежьэкIэр «топджэгум и пащтыхь» Пеле дыдэм хуагъадэ. Дунейпсо хъыбар­егъащIэ IэнатIэхэм щызэбгрыкIащ иджыпсту нэхъ футболист Iэзэ дыдэ Месси Лионель зи ныбжьыр иджы­ри илъэс иримыкъуа сабий цIыкIу Ямаль Ямин тасыш­хуэм ису игъэпскIыу. Дуней псом, Олимп джэгухэм, Аме­рикэм я чемпион, дыщэ топрэ бутсэу нэхъыбэ дыдэ зиIэ, зи ныбжьыр топ джэгуным и хэкIыжыгъуэм нэса Месси и Iуэху телъыджэхэм пимыщэну пIэрэ «Бар­селона»-мрэ Испаниемрэ я гъуащхьауэ щIалэщIэ дыдэ Ямаль?
Финалыр гъунэгъу къы­щыхъум, икIэм-икIэжым зыкъызэкъуихащ Инджы­лызым. Иджыри къэс зы­пэплъа джэгукIэ лъэщыр абы къигъэлъэгъуащ икIи Нидерландхэм я командэ зэкъуэтыр васэжэщ 2:1-уэ хигъэщIащ. 
Аращи, пщэдей пщыхьэщ­хьэ зэхэкIынущ дызыхуэкIуэ илъэсиплIым Европэм и чемпиону хэт шытынуми. Ар зи лъыр пщтыр, къи­­къу­э­лъыкI испанхэрами псори зэпэ­зышэч инджылызхэрами мы­гувэу наIуэ хъунущ. Ауэ, куэдрэ къызэрыхъуращи, дахэу гъуэгуанэ къэ­зыкIуам нэхърэ иужьу зы­къызэ­къуэзыхар япэ ищ хабзэщ. Ари зэрыхъум деплъыну Iэмал щыIэщ.